Ukiuunerani 2023-mi tuttunniarnissamut aamma umimmanniarnissamut piffissaliussat pisassiissutillu pillugit- tusarniaaneq
Matumuuna Ukiuunerani 2023-mi tuttunniarnissamut umimmanniarnissamullu piffissaliussat sumiiffinnilu tuttutassiissutit kiisalu umimmattassiissutit pillugit siunnersuutit tusarniutigineqarput.
Ukiuni kingullerni Pinngortitaleriffimmiit Piniarfik 2-mi (Sisimiut-Kangerlussuaq) martsimi 2018-imi pisortatigoortumik qulimiguulimmik tuttunik aamma umimmannik kisitsisoqarnikuuvoq, taamatullu Piniarfik 3-mi (Akia-Maniitsoq) aamma Piniarfik 4-mi (Ameralik) martsimi 2019-imi pisortatigoortumik qulimiguulimmik tuttunik kisitsisoqarnikuulluni. Kisitsinermiit pisortatigoortumik nalunaarusiat siulliit Piniarfik 2-mi (Sisimiut-Kangerlussuaq) tuttunut tunngasoq taamatullu Maniitsup aqutsiveqarfiani umimmannut tunngasoq naammassineqareerput. Nalunaarusiat Piniarfik 3-mi (Akia-Maniitsoq) tuttunut tunngasoq aamma Piniarfik 4-mi (Ameralik) tuttunut tunngasoq ilaatigut immikkut ilisimasalimmik pisariaqartitsineq pissutigalugu maannamut suli naammassineqarnikuunngillat.
Tuttut
1. Aqutsiveqarfik Qaanaaq: Nuna Inglefield-imi aamma Prudhoe-mi ukiuunerani 2023-mi inuussutissarsiutigalugu aamma sunngiffimmi tuttunniarneq 1. januaarimiit 2023-mi 30. apriili ilanngullugu ingerlassaaq tassanilu aasaanerani ukiaaneranilu 2022-miit tuttutassiissutinit pisarinngitsuukkat piniarneqassallutik. Kangerluarsorujuk-mi tuttut ukiuunerani killeqanngitsumik piniarneqassapput.
2. Piniarfik Nuussuaq: Aasaanerani aamma ukiaanerani 2022-mi tuttutassiissutinit pisarinngitsuukkat piffissami 30. januaarimiit 2023-mi 19. februaari ilanngullugu piniarneqassapput.
3. Piniarfiit sinneri: Piniarfinni sinnerini ukiuunerani tuttunniartoqassanngilaq.
Tunngavilersuutit: Aasaanerani aamma ukiaanerani 2022-mi Piniarfimmi 2-mi (Sisimiut-Kangerlussuaq), Piniarfik 3-mi (Akia-Maniitsoq) aamma Piniarfik 4-mi (Ameralik) qaammatini tallimani killeqanngitsumik inuussutissarsiutigalugu tuttunniartoqareerpoq. Piniarfinni pineqartuni Pinngortitaleriffik naapertoglugu tuttut amerlavallaalersimanerat tassunga tunngaviuvoq ikilisaasoqartariaqarluni. Piniarfinni sinnerini ikinnerusunik tuttoqarfiusut qaammatit pingajuat qiteqqullugu killeqanngitsumik inuussutissarsiutigalugu tuttunniartoqareerpoq. Taamaammat ukiuunerani tuttunniarnissamut immikkut ittumik tunngavissaqanngilaq.
APN-ip kommunit qanimut suleqatigalugit akuersissutinik utertitsisarneq malinnaaffigivaa, utertinneqartannginnerat taamatullu pisanik nalunaaruteqartannginneq piniartunut ataasiakkaanut akuersissutinik qinnuteqarsinnaanissamut ukiuni aggersuni kinguneqassaaq. Erseqqissaatigineqarpoq qamuteralaannik, ATV-nik kiisalu qamutinik motoorilinnik allanik atuinermi kommunimi ileqqoreqqusat malinneqassasut, tuttunillu malersuinermi piniarnermilu atornissaat inerteqqutaammat. Assartuutit motoorillit tuttunut minnerpaamik 500 meterinik ungasissuseqassapput.
Umimmaat
4. Aqutsiveqarfik Maniitsoq: Piniarfik 1-imi ukiuunerani killilimmik umimmanniarneq assartuutinik atuiffigeqqusaanngitsoq 30. januaarimiit 2023-mi 26. februari ilanngullugu sapaatip akunnerini sisamani ingerlassaaq. Piniarfik 2-mi, Piniarfik 3-mi aamma Piniarfik 4-mi - Ilanngussaq 4 takuuk - ukiuunerani killilimmik inuussutissarsiutigalugu umimmanniarneq 30. januaarimi 2023-mi aallartissaaq 26. februaari ilanngullugu sapaatip akunnerini sisamani ingerlassalluni. Tiggaat tammajuitsussanik piniarnissamut pisassiissutaareersut aamma kulavaat norrallit piniaqqusaanngillat. Piniarfik 1-imi 100-nik umimmattassiisoqarpoq, Piniarfik 2-mi 100-nik umimmattassiisoqarpoq, Piniarfik 3–mi 600-nik umimmattassiisoqarpoq kiisalu Piniarfik 4-mi 200-nik umimmattassiisoqarluni. Kangerlussuup eqqaani kangerlummi sikuniarneq apeqqutaatillugu piniarnissamut piffissaliussaq nalimmassarneqarsinnaavoq.
5. Aqutsiveqarfik Sisimiut: Aasaanerani aamma ukiaanerani 2022-mi umimmattassanit pisarinngitsuukkat ukiuuneranut 2023-mi piniarnissamut nuunneqassapput piffissami 30. januaarimiit 26. februaari ilanngullugu ingerlanneqartussamut. Qeqqata Kommunia suleqatigalugu pisarinngitsuukkat amerlassusaat aalajangerneqassaaq.
6. Aqutsiveqarfik Kangaatsiaq: Aasaanerani aamma ukiaanerani 2022-mi Sisimiut aqutsiveqarfiani umimmattassanit pisarinngitsuukkat ukiuuneranut 2023-mi piniarnissamut nuunneqassapput piffissami 30. januaarimiit 26. februaari ilanngullugu ingerlanneqartussamut. Kommune Qeqertalik suleqatigalugu pisarinngitsuukkat amerlassusaat aalajangerneqassaaq.
7. Umimmaqarfik Naternaq: Aasaanerani aamma ukiaanerani 2022-mi umimmattassanit pisarinngitsuukkat ukiuuneranut 2023-mi piniarnissamut nuunneqassapput piffissami 13. februaarimiit 12. martsi ilanngullugu ingerlanneqartussamut. Kommune Qeqertalik aamma Avannaata Kommunia suleqatigalugit pisarinngitsuukkat amerlassusaat aalajangerneqassaaq.
8. Umimmaqarfik Ivittuut: Ukiuunerani umimmanniartoqassanngilaq.
9. Umimmaqarfik Sigguk: Ukiuunerani umimmanniartoqassanngilaq.
10. Aqutsiveqarfik Ittoqqortoormiit: Ukiuunerani 2023-mi inuussutissarsiutigalugu aamma sunngiffimmi umimmanniarneq martsi naallugu ingerlassaaq aqutsiveqarfimmilu umimmattassiissutit 60-iullutik.
11. Aqutsiveqarfik Qaanaaq: Nuna Inglefield-imi, Nuna Prudhoe-mi aamma Qooqquni ukiuunerani 2023-mi inuussutissarsiutigalugu aamma sunngiffimmi umimmanniarneq 1. januaarimiit 15. apriili ilanngullugu ingerlassaaq tassanilu aasaanerani aamma ukiaanerani 2022-mi umimmattassiissutinit pisarinngitsuukkat piniarneqassallutik. Taassuma saniatigut umimmaat Pituffimmi mittarfeqarfiup eqqaani akornusiisartut Pituffimmi Innuttaasut Siunnersuisoqatigiit, Avannaata Kommunia aamma Qaanaap aqutsiveqarfiani piniartut suleqatigalugit pisassiissutit iluanni killilimmik piniarneqarsinnaassapput.
12. Umimmaat allat Nanortalimmut nuunneqarsimasut aamma Nuup Kangerluanut ingerlaarnikut eqqissisimatitaalluinnarput.
Tunngavilersuutit: Aqutsiveqarfik Ivittuuni: Ukiuni kingullerni umimmannik ikinnerpaaffiliinikkut kisitsisoqartarnera tunngavigalugu ukiuunerani 2023-mi umimmanniartoqassanngilaq. Ivittuuni umimmaat maannakkut amerlavallaannginnerat tunngavigineqarpoq.
Aqutsiveqarfik Sisimiut-ni: Aasaanerani aamma ukiaanerani umimmattassat misilittakkat tunngavigalugit tamakkerneqartanngillat, taamaammat pisarinngitsuukkanik ukiuuneranut nuussisoqassaaq.
Aqutsiveqarfik Kangaatsiaq-mi: Aasaanerani aamma ukiaanerani Sisimiut aqutsiveqarfiani umimmattassat misilittakkat tunngavigalugit tamakkerneqartanngillat, taamaammat pisarinngitsuukkanik ukiuuneranut nuussisoqassaaq.
Aqutsiveqarfik Maniitsoq-mi: Aqutsiveqarfimmi ukiuunerani 2023-mi killilimmik umimmattassiisoqarnissaa biologinit inassuteqaammik tunngaveqarpoq. Aqutsiveqarfik Maniitsoq-mi umimmaat 2018-mi qulimiguulimmiit kisinneqarput. Umimmaat siornamut naleqqiullugu immamiit uuttorlugu qatsinnerusuni takuneqartarput (agguaqatigiissillugu 500 meterinit qutsinnerusuni). Umimmaat pingaartumik umimmaqarluarfiusuni marlunni Kangerlussuarmiit siornamut naleqqiullugu ungasinnerusuni takuneqartarput. Sumiiffiit umimmaqarluarfiusut neriniarfittut pitsaannginnerusutut nalilerneqarput. Umimmannik akornusiinnginnerunissaq siunertaralugu Pinngortitaleriffiup inassutigaa aqutsiveqarfimmi assartuutinik motorilinnik atuineq minnerpaaffimmiissinneqassasoq. Piniarfik 2-mi aamma taamaattoqartartoq ikinnerpaaffiliinikkut kisitsinerni paasineqareerpoq. Assartuutit motoorillit umimmannut akornutaasarnerat aqutsinermi minnerpaaffimmiissinniarneqarpoq taamaaliornikkut norraat amerliseqqinniarlugit.
APN-miit erseqqissaatigineqarpoq qamuteralannik, ATV-nik kiisalu qamutinik motoorilinnik allanik atuinermi kommunimi ileqqoreqqusat malinneqassasut, umimmannillu malersuinermi piniarnermilu atornissaat inerteqqutaammat. Assartuutit motoorillit umimmannut uumasunut minnerpaamik 500 meterinik ungasissuseqassapput.
Tusarniaanermut piffissarititaavoq novembarip 21-at 2022 ilanngullugu.
Ilanngussaq 1: Nunap immikkoortuini piniarnissamut piffissat pisassiissutillu.
Ilanngussaq 2: Kalaallit Nunaata kitaani tuttunut Piniarfik 1-11.
Ilanngussaq 3: Kalaallit Nunaanni umimmaqatigiit.
Ilanngussaq 4: Maniitsup Aqutsiveqarfiani umimmannut Piniarfik 1, 2, 3 aamma 4.
Ilanngussaq 5: Umimmaqarfik Sisimiut kommunip aalajangersagai ilanngullugit.
Ilanngussaq 6: Umimmaqarfik Naternaq.
Ilanngussaq 7: Tuttoqarfik Nuussuaq.