AtuartigukNaalakkersuisoq: Umiarsualiviit arlallit pitsanngorsassapput
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Naalakkersuisut nunatsinni umiarsualiviit aserfallatsaalinissaat iluarsartuunnissaallu suliaraat. Tamanna umiarsualiveqarnermut pilersaarut naapertorlugu suliarineqassaaq.
- Umiarsualiveqarneq pingaarutilittut inissisimajuaannarnikuuvoq sulilu pingaarutilittut inissisimavoq, Ineqarnermut Attaveqaasersuutinullu Naalakkersuisoq, Hans Peter Poulsen oqarpoq.
Kangerlussuarmi umiarsualiviup saavani sioqqat tulanniartunut ukiut tamaasa ajornartorsiortitsisarput. Tassa umiarsuit takornariartaatit piniariallu, umiarsualivimmik atuisut, tulanniarnerminni ulissiillutik utaqqeqqaartariaqartarput. Tamanna pitsanngorsarneqassaaq.
- Ukioq manna allaanerusumik periuseqassaagut. Suleriaatsit nutaat atorlugit Kangerlussuup umiarsualiviani sioqqanik ajornartorsiuteqalertarneq minnerpaaffissaaniitilissavarput. Inuussutissarsiutinik ineriartortitsinermi umiarsualiviit suliariuartarnissaat pisariaqarpoq, Hans Peter Poulsen oqarpoq.
Sikuki A/S Kangerlussuarmi umiarsualiviup orsernermut atortuinik nutaanik ikkussuinissamik suliaqassaaq. Atortutoqqat nutaanik taarserniarnerat sullissinermik pitsanngorsaanerussaaq.
Umiarsualiviit allat
Narsarsuarmi umiarsualiviup suliarinissaanut pilersaarutit suliarineqarput. Kullorsuarmi umiarsualivik aasaq manna pitsanngorsarneqassaaq. Tasiilami umiarsualiviup nutarsaanissaa ukioq manna pilersaarusiussaaq. Aasianni umiarsualivik aasamut aamma suliariumannittussarsiuunneqassaaq. Maniitsumi umiarsualiviup suliarineqarnissaa pillugu aamma suliariumannittussarsiuussisoqassaaq.
Sineriassuatsinni umiarsualiviit aserfallasimaqisut amerlaqaat. Taakkua pillugit nalunaarusiamik peqarpugut. Umiarsualiviit tulleriiaarinikkut aserfallatsaalineqassapput, Hans Peter Poulsen naggasiivoq.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl