Ilisimatusarnermut periusissiaq nutaaq-ineriartornermut aqqutissaavoq.

Ilisimatusarneq Kalaallit Nunaannut iluaqutaassaaq nunanullu assigiinngitsunut ilisimasarluarfiussalluni

Ilisimatusarnermut periusissiaq nutaaq qaffasissumillu anguniagaqartoq Naalakkersuisut maannakkut saqqummiuppaat, taanna Kalaallit Nunatsinni ilisimatusarnermut periusissiat siullersaraat! Kalaallit Nunaanni ilisimatusarnerup pitsaasunik sinaakkutissaqarnissaata qulakkeernissaa takorluugaavoq – ilisimatusarneq inuiaqatigiinnitsinnut iluaqutaaqqullugu. Kalaallit Nunaata maani ilisimatusarnertaaq ikorfartorsinnaasariaqarpaa, taamaasilluni nunat assigiinngitsut qaffasissumik ilisimatusarnerannut tapersiisareerneq ingerlateqqissinnaajumallugu.

Kalaallit Nunaat Issittumi ilisimatusarnerni pingaaruteqarpoq. Inuussutissarsiornerput pinngortitap atugassarititaanit tunngaveqartuarsimavoq amerlanertigullu piujuartitsineq tunngavigalugu inuusimalluta. Tassaniippullu ilisimasat misilittakkallu nunarsuarmiut sinnerisa ilinniarfigisinnaasaat. Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen Kalaallit Nunaata ilisimatusarnermut periusissiaa siulleq nuannaarutigaa:
“Nunatsinni ilisimatusarnermut periusissiaq siulleq saqqummiussinnaanngorakku assut nuannaarutigaara, neriullungalu ukiuni aggersuni anguniakkagut tamarmik piviusunngortinneqarumaartut. Anguniakkat angulertoqqullugit inuusuttunit utoqqarnut, pisortanit namminersortunut suliffeqarfinnullu ilisimatusarfiusunut ilisimasatigut misilittakkatigullu tapersiuteqartarnissaq kaammattuutigaara, nunatsinni ilisimatusarnerup uagut nammineq tunngaviliussagut naapertorlugit siammarteqqullugu”.

Anguniakkat pingaarnerit sisamat ilisimatusarnermut periusissiami allassimapput, taakkulu sinaakkusiillutik Naalakkersuisut angujumasaannut:

1. Ilisimatusarneq Kalaallit Nunaanni tunngaveqassaaq
2. Ilisimatusarneq piujuartitsisussamik inuiaqatigiinnik ineriartortitsinermik tapersersuissaaq
3. Ilisimatusarnermi angusat kikkunnit tamanit pissarsiariuminartuussapput
4. Ilisimatusarnermi suliniut nunat assigiinngitsut akornannisulli qaffasissuseqassaaq

Tunngaveqarneq isumaqarpoq ilisimatusarneq Kalaallit Nunaannit aallaaveqassasoq nunatsinni inuiaqatigiinnut qaninnerusumik attaveqassalluni. Sumiiffinni najugaqartut ilisimasaannik immikkullu piginnaasaannik ilanngussaqartarnissamik, ileqqorissaarnermullu najoqqutassiornissamik kiisalu ilisimatusarnerup Kalaallit Nunaanni ingerlanneqartarnissaanik piumasaqarpoq.

Sillimmatinik amerlanernik ilisimatusarnermut immikkoortitsinissaq Naalakkersuisut sulissutigissavaat, taakkulu nunatsinni suliffeqarfiit ilisimatusarfiusut issittumi ilisimatusarnermi nunat assigiinngitsut akornannisut qaffasissuseqartunik pingaartutut peqataaqqinnissaannut atorneqassapput.

Nunatsinni suliffeqarfiit ilisimatusarfiusut nalunaarput najukkani atugassanik aningaasaliisoqaraangat aningaasaliissutigineqartut naleqataannik nunanit allanit aningaasaleeqataanissamik kajumissuseqalersitsisartoq. Taamaalilluni ilisimatusarnermut aningaasaliissutigineqartut marloriaatinngorlutik nunatsinni inuiaqatigiinnut iluaqutissanngorlutik nakkartarput.

Ilisimasat nutaat inuiaqatigiinnut avatangiisinullu unammilligassat aaqqiiffiginiarnissaannut matuersaataallutik pingaaruteqarput peqatigisaanillu nunatsinni aningaasarsiornikkut siuariartortitsisussat inuussutissarsiutit nutaat ineriartortinnissaannut ikiuutaassallutik. Aaqqiissutissanik nassaarniarnermi ilisimatusarneq iluaqutaassaaq, taakkulu ungasinnerusoq eqqarsaatigalugu qulakkiissallugu aningaasarsiornikkut siuariartornissaq inuiaqatigiit, inuussutissarsiortut, avatangiisit aamma kulturi peqatigalugit.

Namminersortut pisortallu suleqatigiinnissaannut sinaakkutissanik pitsaanerusunik pilersitsinikkut tamanna pissaaq ilisimatusarnerullu inuusuttunut kajuminnassuseqarnerulerneratigut. Nunatsinni ilisimatusarnerit paasiuminarsarniarlugit inuiaqatigiinnilu atorneqarsinnaaneruleqqullugit tamanit iserfigineqarsinnaanngortariaqarput.

Ilisimatusarnermut periusissiap nutaap saqqummiunneratigut anguniagassat piviusunngortinneqarnissaannut Naalakkersuisut sinaakkutissiipput, taassumalu nunagisami aamma nunat assigiinngitsut akornanni annertunerusumik ilisimatusarnikkut suleqatigiinnerunissaq malitsigissavaa. Aamma ilisimatusarneq inuit tamarmik pigilersinnaanngussavaat. Taamaattumik ilisimatusaatissatut pilersaarusiat pilersinneqartarnissaat najukkani innuttaasut qanittumik suleqatiginerisigut, kiisalu angusat tamanit paasineqarsinnaanngortinneqartarnissaat pingaaruteqartorujussuuvoq.

“Periusissiap suliarineqarnerani suliffeqarfiit ilisimatusarfiusut aamma soqutigisaqartut ilanngussaqartarsimanerannut qujamasuppunga. Periusissiap nunatsinni nunallu allat akornanni suleqatitsinnut iluaqutaalernissaanut neriuut tamatuma pilersippaa” Peter Olsen naggasiivoq.

Aana linkimi Kalaallit Nunaata ilisimatusarnermut periusissiaa

Annertunerusumik paasisaqarusukkuit attavigiuk: Naalakkersuisup allattaa Rosa Thorsen, rose@nanoq.gl mobil.tlf.: 553303