Inissiat Qungujulasut ingerlanneqarnerani Eqalugalinnguit naammassineqarluinnarput, najukkamilu sulisartunut suliassaqartitsilluni

Nuna tamakkerlugu nutarterinissamik suliniutip Inissiat Qungujulasut ingerlanneqarnerani Eqalugalinnguit naammassineqarluinnarput. Ukiup ingerlanerani inissiat sulisartunit nutarterneqarsimasut, iserterfigineqarnissaminnut maanna piareerluinnarput. Inissianik oqoqalersimasunik, taamaalillunilu nutarterinissami nuna tamakkerlugu annertuumik kinguaattooruteqarnerup iliuuseqarfigineqarnissaannik Naalakkersuisut suliniuteqarnerinut Inissiat Qungujulasut ilaavoq. Inissianik amigaateqarnerup iliuuseqarfigineqarnissaanut suliniut aamma tapertaavoq. Suliniut attartortunut pitsaanerusunik inissiaqalersitsivoq, najukkamilu sanasutut suliffeqarfeeqqanut aamma suliassaqartitsilluni.

Suliniut Inissiat Qungujulasut avatangiisinut sunniuteqarluarneranut Eqalugalinnguani nutarterineq assersuutaavoq. Inissiat pisoqalillutik nungullarsimasut najorneqarsimanngitsut maanna iserterfigineqariaannanngorlutik ilisarsaanngillat.

Illup iluani iikkat, naqqit, igaffik uffarfillu ingutseriarlugit, attartortussanut piareerlugit nutaanik sanaartorneqarput.

Nuummi inissiat piumaneqaleraluttuinnarnerinut Eqalugalinnguani inissiat nutartikkat naammassinneqataassapput. Isumaginninnermi suliniutinik nutaanik aallartitsinikkut Nuummi attartortittakkanik suli annerusumik ujartuisoqalissasoq naatsorsuutigineqarpoq – Eqalugalinnguani inissiat nutarterneqareerunik ujartuinerunermut tassunga naammassinneqataassapput. Taamaalilluni inuiaqatigiinnut tamanut iluaqutaasussaallutik isumaginninnermi suliniutinut, inissiat nutartikkat qulakkeerinneqataassapput.

Namminersorlutik Oqartussat suliniutaannut tunngatillugu najukkami sanasutut suliffeqarfeeqqat suliffissuarnut nalinginnaasumik unammillersinnaanngitsunut, suliniut Inissiat Qungujulasut neqeroorsinnaalersitsipput, taamaalillunilu suliassanik suliaqarsinnaalersillugit.

ILJ Entreprisep, piginnittullu Iver Lund Josefsenip Eqalugalinnguani Inissiat Qungujulasut suliarinerini suliffeqarfiup ineriartortinnissaanut, namminerlu pisinnaasat unammillernissaannut immikkuullarissumik periarfissiisimavoq. Nutarterinerup ingerlanneqarnerani iluatsinnissaanullu pingaartumik sanatitsisup, siunnersortaallunilu suliffeqarfiup Rambøllip suleqatigineri annertuumik iluaqutaasimavoq. Suleqatigiinnermi illuatungeriit tamarmiullutik piumassuseqarluarsimapput, aaqqiissutissallu piviusorsiorpalaartut ukkatarisimallugit. Suleqatigiinni tamani piumassuseqarluarnerup kingunerisaanik suliffeqarfeeqqat aallarterlaat, soorlu Iver Lund Josefsenip suliffeqarfeeraa, suliassanik annertuunik tigusisinnaasimapput.

Ineqarnermut Attaveqaasersuutinullu Naalakkersuisoq Erik Jensen ima oqaaseqarpoq:

“Inuiaqatigiinni pingaaruteqartuni ullumikkut suliassarpassuatta ilaasa iliuuseqarfiginissaannut suliniut Inissiat Qungujulasut annertuumik periarfissiivoq. Najukkami innuttaasut, suliffeqarfiit ingerlatsiviullu suleqatigiilluarnerisigut, najukkamilu inuutissarsiorfinni periarfissaasut atorlugit inuiaqatigiittut angusaqarluarsinnaanitsinnut, Eqalugalinnguani suliaq assersuutissatsialaavoq.”

Suliniut Inissiat Qungujulasut suliniutaavoq siunissami nunatsinni suliniutinut arlaqarnerusunut aamma siammarterneqartussaq, nutarterinissamilu kinguaattoorutit angummaffigineqarnissaannut suli qitiusussaq. Suliniut aqqutigalugu najukkami sanasutut suliffeqarfeeqqat akuutinneqarlutillu ineriartortinneqarnerat ilutigalugu, inissiat pioreersut sivisunerusumik pigineqarsinnaalissapput, attartortunullu atugassarititaasut pitsanngoriarlutik. Imaappoq, suliniut arlalinnut qungujutsitsisinnaasoq pineqarpoq.

Suliniut Inissiat Qungujulasut inissianik pisoqalillutik nungullarsimasunik nutaannguisitsivoq

Suliniutip 2015-imi aallartinneraniilli nuna tamakkerlugu inissiat 200-t sinneqartut maanna nutarterneqarsimalerput. Namminersorlutik Oqartussat inissiat attartortittagaatai oqoqalersimallutik najorneqanngitsut, najukkami sanasutut suliffeqarfeeqqat akuutillugit iliuuseqarfigineqarnissaannut ilusissamik nassaarniarnissaq suliniutitigut siunertaanikuvoq. Inissiat Qungujulasut aqqutigalugu inissiap tamakkiisumik nutartertinneqarnissaani toqqaannartumik neqeroortitsisoqartarpoq, taamaalilluni suliffeqarfiit minnerusut neqerooruteqarnissaannut periarfissinneqartarlutik. Inissiat Qungujulasut tassaapput inissiat pisoqalillutik nungullarsimasut nutaanngorumallugit, ilui tamakkiisumik nutarterneqarsimasut.