Issittumi Eqqumiitsuliornermik Ataatsimeersuarneq -Arctic Arts Summit 2022: Nunarput sinnerlugu peqataasoqarluassaaq

Arctic Arts Summit 2022-mi, 27. – 29. juni Whitehorse, Canadami pisussami,  nunarput sinnerlugu 15-it peqataassapput.

Oqaatsit, silap pissusaa, imminut aalajangiinissamut pisinnaatitaaneq aamma kulturikkut kingornussat ilaatigut qulequtaralugit Arctic Arts Summit 2022-mi oqallisigineqassapput.

Arctic Arts Summit 2022-mi Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Peter P. Olsen peqataasunut 15-imut ilaassaaq, ataatsimeersuarnermilu nunatta tusaaneqarnissaa pingaartuusoq taanna isumaqarpoq:

• Naalakkersuisut kulturilerisut eqqumiitsuliortullu atugarisaannik pitsanngorsaallutik suliaqarput, taakkumi anersaakkut inuttullu annertuumik nukittorsaaqataasarput. Eqqumiitsuliornerup inuutissarsiutitut isigineqarnissaa Naalakkersuisut sulissutigaat, Arctic Arts Summitimilu tamanna oqallisigissallugu periarfissatsialaavoq, Peter P. Olsen oqarpoq.

Nunatsinnit peqataasoqarluassaaq

Ukioq manna Arctic Arts Summitimi nunatsinnit peqataasussat ukunaneerput: Katuaq, Nunani Avannarlerni Piorsarsimassutsikkut Attaveqaat (NAPA), Ilisimatusarfik, Kalaallit Nunaata Isiginnaartitsisarfia, Nuummi Eqqumiitsulianik Saqqummersitsivik, Eqqumiitsuliornikkut Pinngorartitsisut Ingerlatsisullu (EPI) aamma nunatsinni eqqumiitsuliortut.

• Nunatsinnit peqataasoqarluarnera nuannaarutigaara. Ataatsimeersuarnermi nunat issittumiittut akornanni kulturikkut suleqatigiinnermi ataatsimut soqutigisat unammillernartitallu eqqartornissaannut periarfissaqarluarpoq. Canadap nunattalu eqqumiitsuliornikkut kultureqarnikkullu piviusut tunngavigalugit suleqatigiinnissaannut aallarnisaaffiulluarumaartoq neriuppunga, Peter Olsen oqarpoq.

Arctic Arts Summit ukioq manna pingajussaanik ingerlanneqassaaq, ataatsimeersuarnerlu siulleq Norgemi 2017-imi ingerlanneqarsimavoq.

Saaffissaq: Naalakkersuisup allattaa Paninnguaq Steenholdt, pslt@nanoq.gl