Imarisassat tusarnaarlugit atuarlugitAvatangiisinut suliniutit nutaat 21-t aallartinneqarput
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Avatangiisinut aningaasaateqarfik aqqutigalugu 8 million koruunit Naalakkersuisut avatangiisinut suliniutinut nutaanut 21-nut agguaappaat. Avatangiisinut suliniutit innuttaasunit, suliffeqarfinnit kommuniniillu suliarineqassapput.
Avatangiisinut Aningaasaateqarfik aqqutigalugu avatangiisinut suliniutinut nutaanut 21-nut tapersiinissaq Naalakkersuisut nalunaarutigeqqammerpaat.
Ukioq manna assersuutigalugu kommunit eqqagassalerinerannut, aalisarnermut atortunik katatanik saliinermut, anartarfilerinermut suliassaqarfimmi pitsanngorsaanermut aammalu suliniutinut mikroplastinik kuutsitsinermik annikillisitsinissamik aallussiviusunut, tapersiisoqarpoq.
- Avatangiisinut suliniuterpassuarnut maannakkut tapersiisinnaagatta nuannaarutigisorujussuuara. Ilungersuussisunik pitsaasunik isumassarsialinnik suliniuteqarumasunik akisussaassusilinnillu akornatsinniittoqarnera, inuiaqatigiinni mingutsitsinnginnerusup tungaanut ineriartortitsinermut pingaaruteqarpoq. Suliniuterpassuit inernerisa takunissaat qilanaaraara, oqarpoq Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund
Ilaatigut nunatsinni sumiiffinni arlalinni aalisarnermut atortunik saliinissamut tapersiisoqarpoq aammalu Pinngortitaleriffik saliinermut periaasissamik misissuinissamut tapersiivigineqarpoq.
Avatangiisinut aningaasaateqarfik aqqutigalugu aamma meeqqanut atuakkamut, meeqqat avatangiisinik paarsilluarnissamik ilinniartinnissaannik siunertaqartumut, tapersiisoqarpoq.
Avatangiisinut aningaasaateqarfik nunami namminermi eqqagassalerinermut aaqqiissutissamut aningaasassanik aamma 2022-mi tapersiivoq. ESANI A/S Sisimiuni aamma Nuummi nunami namminermi ikuallaavinnik nutaaliaasunik marlunnik sanasussaavoq, nunarput tamakkerlugu eqqakkanik tigusisinnaasussanik. Ikuallaavissat taakkua 2023-mi aamma 2024-mi naammassinissaat naatsorsuutigineqarpoq. Avatangiisinut Aningaasaateqarfik ukiorpassuit ingerlaneranni nunami namminermi ikuallaavinnik pilersitsinissamut katillugit 50 mio. koruuninik, nunami namminermi eqqagassalerinermut aaqqiissuteqarnissamut tapersiisarsimavoq.
Inatsisartut 2018-mi Ukiaanerani ataatsimiinnermi Avatangiisinut Aningaasaateqarfiup, nunarput tamakkerlugu avatangiisini pissutsinik pitsanngorsaanermik sulinermut tapersiisartussap, pilersinneqarnissaa akueraat. Ukiut tamaasa suliniutinut avatangiisinut iluaqutaasussanut tapersiisoqartassaaq. Avatangiisinut Aningaasaateqarfik innuttaasunit, suliffeqarfinnit kommuniniillu avatangiisinut suliniutinut pitsaasunik isumassarsiaqartunit, qinnuteqaatinik tigusaqartarpoq.
Suliniutit tapersiivigineqarsimasut allassimaffiat takuuk uani.
Paasissutissanik annertunerusunik piniarnermi attaveqarfigineqassaaq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Naalakkersuisoqarfimmut pisortaaneq, Mette Skarregaard Pedersen, tlf.: +299 346476, e-mail: mesp@nanoq.gl