Uunga siunnersuummik tusarniaanermut tunngasoq: Pisortanit ikiorsiissutit pillugit Inatsisartut inatsisaat

Isumaginninnermut Naalakkersuisoqarfiup matumuuna nassiuppaa: ”Uunga siunnersuut: Pisortanit ikiorsiissutit pillugit Inatsisartut inatsisaat pisortatigoortumik tusarniaassutinngorlugu.

 

Tusarniaanerup nassuiarneqarnera

Pisortanit ikiorsiissuteqartarnermik aaqqissuussinerup nutaap inunnut ilaqutariinnullu imminnut napatissinnaanngitsunut aningaasaqarnikkut isumannaallisaassutitut sunniuteqarluartutut atorneqarnissaa anguniarneqarpoq. Pisortanit ikiorsiissutit meeqqat piitsuusuni peroriartornissaannut pinaveersaartitseqataasinnaanerat pingaaruteqarpoq. Inuiaqatigiit sanngiinnerpaanik isumagisaqassapput meeqqallu alliartornerminni pitsaasumik atugaqarlutillu inuunerminni atugarissaarnissaat qulakkeerneqassapput.

 

Ilutigisaanillu aaqqissuussineq, pisortanit ikiorsiissutinik pisartagaqartut atugarisamik pitsanngorsarnissaat anguniarlugu akisussaaffimmik tigusinissaannut – sapinngisamillu – imminnut pilersugarilernissaannut sunniuteqaqataassaaq. Tamanna ilaatigut pisortanit pilersuinermut ikiorsiissutinit allanit appasinnerusunik aalajangersimasumik akigititaqarnikkut - pisariaqarpallu tapeqartitsinikkut – tapersersorneqassaaq.

 

Aaqqissuussineq sapinngisamik annertunerpaamik paasiuminartuussaaq pisartagalinnut toqqissisimanartuulluni, taamatullu pisortat – kommunit – aaqqissuussinerup siunertaanut atatillugu kinguneqarluartussamik aamma allaffissornermut tunngasut eqqarsaatigalugit iliuuseqarniartartussaallutik.

 

Allatigut pissarsiassaqannginnermi pisortanit ikiorsiissutisisinnaatitaaneq inatsisaavoq, tassa imaappoq pilersornissamut il.il. allatut aningaasarsiornissaq periarfissaappat taava pisortanit ikiorsiissutinik qinnuteqannginnermi taanna atorneqassaaq.

Tunuliaqutaasut

Pisortanit ikiorsiissutit aaqqissuussiffigeqqinnissaat pillugit siunnersuut Naalakkersuisut naalakkersuisoqarfiit akornini suliniutip nammineq pilersorsinnaanerulernermut atatillugu atuutitsilernerisa ilaattut isigineqassaaq. Inuiaqatigiit piujuartitsilernissaat anguniarlugu pisinnaatitaaffiit pisussaaffiillu ersarissuunissaat aammalu innuttaasut tamarmik ataatsimoorfinnut tunniussinnaasaminnik tunniussinissaat pingaaruteqarpoq. Matumani pisortanit ikiorsiissutit aaqqissuussiffigeqqinnissaat pingaaruteqarpoq, tassami aaqqissuusseqqinneq inuit amerlanerusut sulilernissaannut taamaalillutillu ataatsimoorfinnut tunniussaqarnissaannut iluaqutaassammat. Innuttaasuni piitsuussuseq annikillisarniarlugu innuttaasup inuunermi atugarisaanik pitsanngorsaanissamut aamma kajumissuseqalernissaanut aaqqissuusseqqinnermi innuttaasoq periarfissinneqassaaq.

 

Pisortat ikiorsiissutaannik aaqqissuusseqqinneq ilinniartitaanikkut, suliffeqarnikkut akileraartarnikkullu aaqqissuusseqqinnissamut tunngatillugu annertunerusumik ataqatigiissaarinertut isigineqassaaq, aaqqissuusseqqinnikkullu suliassaqartitsinerup siuarsarnissaanut imminullu pilersornerup annertunerulernissaanut pingaarutilerujussuarmik sunniivigeqatigeqatigiinnissaq qulakkeerneqassaaq.

 

Maannakkut pisortanit ikiorsiisarnermut peqqussut atuuttoq arlalippassuartigut unammilligassaqarpoq aalajangersagarpaaluillu ullutsinnut naleqqukkunnaarsimallutik.

 

Maannakkut pisortanit ikiorsiissutinut aaqqissuussineq maannakkut atuuttoq piffissami sivitsulersumi arlalinnillu isornartorsiorneqartarsimavoq. Pisortanit ikiorsiissutinut tunngatillugu sunniivigeqatigiittarnerup ajornartorsiorfiusarsimanera ilaatigut Akileraartarnermut Atugarissaarnermullu Isumalioqatigiissitamit aamma Kalaallit Nunaanni Aningaasaqarnermut Siunnersuisoqatigiinnit isornartorsiorneqartarsimavoq. Inuit ilaat pisortanit ikiorsiissutinik pisartagaqarunnaarlutik nalinginnaasumik suliffissarsiornissaasa ilinniakkamilluunniit aallartitsinissaasa imminut akilersinnaannginnera ataqatigiissutsikkut ajornartorsiutinik taaneqartarpoq.

 

 

Tusarniaaneq pillugu nalinginnaasut

Siunnersuummut oqaaseqaataasinnaasut Isumaginninnermut Sulisoqarnermullu Naalakkersuisoqarfimmut nassiunneqassapput ugguuna isn@nanoq.gl assilineralu uunga Uffe Jensen ufje@nanoq.gl

 

Tusarniaanermut akissuteqarfissaq kingulleq tassaavoq ulloq 24. september 2021

 

Allagaatit attuumassuteqartut

Ilanngussanut takussutissiaq malillugu tusarniaanermut allagaatit attuumassuteqartut ilanngunneqarput.

 

Ilanngussat:

  1. Pisortanit ikiorsiissutit pillugit Inatsisartut inatsisissaattut siunnersuut
  2. Siunnersuummut nassuiaatit

Sammisaq:

Inunnik isumaginninneq

Tusarniaanerup suunera:

Nalunaarut

Saqqummiunneqarfia:

27 aggusti 00:00:00

Tusarniaanermi piffissaliussaq:

24 septembari 00:00:00

Tusarniaanermi akissutit uunga nassiuteqquneqarput:

isn@nanoq.gl, ufje@nanoq.gl