Inatsisartut inatsisaannut suliffissarsiornermi ikiorsiissutinut tunngasumut tusarniut

Isumaginninnermut Sulisoqarnermullu Naalakkersuisoqarfiup matumuuna nassiuppaa ”Inatsisartut inatsissaat Suliffissarsiornermi ikiorsiissutinut inatsit”-mut tusarniut tamanut ammasoq.

Tusarniutip nassuiarnera
Pisortaniit ikiorsiissutinut inatsisip aamma suliffeerunnermi ikiorsiissutinut inatsisip aqqissuuteqqinnissaat anguniagaavoq.
Una tusarniaaneq Inatsisartut inatsisaannut suliffissarsiornermi ikiorsiissutinut imaqarpoq, tusarniut oqartussanit ikiorsiissutinut pisartagaqarnermut tunngasoq immikkut pissaaq.
Una tusarniaaneq Naalakkersuisut suleriaasiat pillugu Namminersorlutik oqartussat nalunaarutaat § 8, imm. 1 malillugu, anguniagaralugulu tusarniaaffigineqartut, oqartussat, suliffeqarfiit, kattuffiillu allallu, suliap ingerlanerani malunnaataasumik peqataasuusut inatsisiliortoqarnerani peqataanissaat, tassanilu ilisimasatik misilittakkatillu aallaavigalugit ilanngusseqataatinneqarnissaannut suliarineqassaaq.
Aammattaaq aaqqissuusseqqinnermut ataatsimut isiginnittumik oqallinnermik ammasumik naliliisinnaanissamik pilersitsinissaq anguniarlugu.

Tunuliaqutigineqartoq
Inatsisartut inatsisaata anguniagaraa inuiaqatigiinnik imminnut ikiorsinnaasunik pilersitsinissaq, amerlanerusut suliffeqalernissannut anguniagaqarnikkut, taamaasillutillu inuiaqatigiinnut tunniussaqarlutik.
Suliffissarsiornermi ikiorsiissutit suliffeerunnermi ikiorsiissutit taarsissavaa. Maannakkut ingerlasarnerup illuatungaanik piffissamik killilimmik ingerlasarneq pisarunnaassaaq, taamaasillunilu apeqqutaajunnaassalluni qanoq sivisutigisumik suliffissarsiortuusimaneq.
Suliffissarsiornermi ikiorsiissutinut aaqqissuusseqqinnerup anguniagaraa suliffeqarneq imminut akilersinnaalissasoq. Taassumalu isumap innuttaasut tamarmik akisussaaffimmik tiguseqataarusussuseqarnermik kissaatigisaqarnerat, imminnullu pilersorsinnaassutsimik kissaateqarnerat aallaaviuvoq.
Suliffissarsiornermi ikiorsiissutinik pisartagallit ukununnga suliffissarsiuussisarfiup ataani piareersimasuusassapput: suliffimmik tulluuttumik tunineqarnissamut, suliffimmi sungiusarnissamut neqeroorutinut, pikkorissarnissamut neqeroorutinut allanullu.
Suliffissarsiornermi ikiorsiissutit qularnaveeqqutitut ikiorsiissutaapput, isumaginninnermut ikiorsiissutaanatik.
Inatsisartut inatsisaat piumasaqaateqassaaq inissisimaffinni assigiinngitsuniissinnaanermik eqaassuseqarnissamut, suliffissarsiornermi ikiorsiissutinik ukiumi ataatsimi, ukiuniluunniit marlunni ikiorsiissutinik pisartagaqarsimasut illoqarfimmut allami suliffissamik tulluunnerusumik peqarpat, illoqarfimmut allamut nuunnissamut piumasaqarfigineqarsinnaammata.

Tusarniaaneq ataatsimut isigalugu
Ilassutaasinnaasut Isumaginninnermut Sulisoqarnermullu Naalakkersuisoqarfimmut nassiunneqassapput uunga isn@nanoq.gl, uunga kopeerlugu Inuk Lundblad mailikkut inlu@nanoq.gl

Tusarniaanermut akissuteqarnissamut killigititaavoq ulloq 24. september 2021

Ilanngussat:
1. Inatsisartut Inatsisissaattut siunnersuut Suliffissarsiornermut ikiorsiissutit pillugit inatsit, nr. xx, ulloq xx 2022
2. Oqaaseqaatit nalinginnaasut

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Naalakkersuisoqarfik:

Inuussutissarsiornermut, Niuernermullu Naalakkersuisoqarfik

Saqqummiunneqarfia:

27 aggusti 17:04:00

Tusarniaanermi piffissaliussaq:

24 septembari 00:00:00

Tusarniaanermi akissutit uunga nassiuteqquneqarput:

isn@nanoq.gl, nlu@nanoq.gl