Uunga siunnersuut: Nipisanniarneq pillugu Namminersorlutik Oqartussat nalunaarutaat nr. Xx, xx. 2021-meersoq

Nipisanniarneq pillugu nalunaarummik atuuttumik nutarterineq

Tusarniaanermi uani uku ilanngunneqarput:

- Uunga siunnersuut: Nipisanniarneq pillugu Namminersorlutik Oqartussat nalunaarutaat nr. Xx, xx. 2021-meersoq
- Ilanngussaq 1. Aqutsiveqarfiit

Uunga siunnersuut ilanngunneqarpoq: Nipisanniarneq pillugu Namminersorlutik Oqartussat nalunaarutaat nr. xx, xx 2021-meersoq nalunaarummik maannakkut atuuttumik nutarterineruvoq. Siunnersuummi ullutsinnut naleqqunnerusunik malittarisassiornissaq aamma innuttaasunut oqartussanullu paasiuminartitsinerulernissaq siunertaralugit allannguutit arlallit atuutilersinneqarput.

Inatsisilerinermi teknikkikkut allannguutit
Nalunaarutip paasiuminarnerulersinneqarnissaa siunertaralugu inatsisilerinermi teknikkikkut arlalinnik allannguisoqarpoq. Allannguutit taakku inatsisitigut maannakkut inissisimanermik allannguinerupput.

Siunnersuut paragraffinik nutaanik inatsisitigut inassisimanermut pingaaruteqartunik ukuninnga imaqassaaq.

Aqutsiveqarfiit
§ 2. Nipisanniarnermi aqutsiveqarfiit ilanngussaq 1-imi aalajangersarneqarput

Pisassiissutit
§ 5. Naalakkersuisut inuttut atukkatigut aningaasaqarneq eqqarsaatigalugu aamma biologit siunnersuinerat tunngavigalugu aqutsiveqarfiit ilanngussaq 1-imi aalajangersarneqartut naapertorlugit nipisannik pisassiissutinik ukiut tamaasa aalajangiisarput.

Aalisarsinaanermut akuersissutit pillugit paragraffi nutaaq:
§ 4. Inussutissarsiutigalugu nipisanniarnermi aalisarsinnaanermut akuersissut qinnuteqartoqarnera malillugu Aalisarnermut, Piniarnermut Nunalerinermullu Naalakkersuisoqarfimmit tunniunneqartartoq piumasaqaataavoq.
Imm. 2. Ukiumi pisassiiffiusumi ataatsimi aqutsiveqarfimmut ataatsimut aalisarsinnaanermut akuersissummik qinnuteqartoqarsinnaavoq.
Imm. 3. Aalisarsinnaanermut akuersissutit piffissamut killiligaapput pisarisinnaasatullu akuerineqartut annertunerpaaffeqaratik.
Imm. 4. Taamaallaat angallammut qinnuteqartumit aalisarnermi atorneqartussamik pigineqartumut inuussutissarsiutigalugu nipisanniarsinnaanermut akuersiissummik tunniussisoqarsinnaavoq.
Imm. 5. Taamaallaat angallatit takissusaat tamarmiusoq 12,8 meterimit mikinerusunut inuusssutissarsiutigalugu nipisanniarsinnaanermut akuersissutinik tunniussisoqarsinnaavoq.
Imm. 6. Aalisarsinnaanermut akuersissut atorneqanngippat ukiumi pisassiiffiusumi tulliuttumi aalisarsinnaanermut akuersissummik ingerlaannaq tunineqarsinnaatitaaneq atorunnaassaaq. Ukiumi pisassiiffiusumi tulliuttumi aalisalersut nutaat naligalugit qinnuteqartoqarsinnaavoq.
Imm. 7. Aalisarnermut, Piniarnermut Nunalerinermullu Naalakkersuisoqarfik piffissami ukiuni marlunni ulloq 31. marts 2021-miit 28. februar 2022 tikillugu aalisalersunut nutaanut inuussutissarsiutigalugu nipisanniarsinnaanermut akuersissutinik tunniussissanngilaq.

Uani oqaatigineqassaaq:
- Qinnuteqartut qinnuteqarnermi immersugassaq atussavaat.

- Ukiumi pisassiiffiusumi ataatsimi aqutsiveqarfimmut ataatsimut aalisarsinnaanermut akuersissummik qinnuteqartoqarsinnaavoq.

- Qinnuteqartoq angallammik aalisarnermi atorneqartussamik pigisaqassaaq.

- Atuinngikkaanni, tassa tunisinngikkaanni, ukiumi tulliuttumi aalisarsinnaanermut akuersissutip assinganik tunineqarsinnaatitaaneq annaaneqassaaq. Kisiannili ukiumi tulliuttumi aalisalersunut nutaanut atugassaritinneqartut naligalugit qinnuteqartoqarsinnaavoq.

- Angallatinut takissusaat tamarmiusoq 12,8 meterit sinnerlugit takitigisunut (42 fod) aalisarsinnaanermut akuersissutinik tunniuussisoqarsinnaanngilaqer.

- Aalisalersunut nutaanut aalisarsinnaanermut akuersissutinik ukiuni marlunni tunniussisoqassannngilaq.

Piffissaq aalisarfiusoq nutaaq
Piffissaq aalisarfiusoq
§ 6. Piffissami 16. julimiit 1. aprilimut inuussutissarsiutigalugu nipisanniarnissaq inerteqqutaavoq.
Imm. 2. Inuussutissarsiutigalugu nipisanniarneq piffissap aalisarfiusup § x, imm. x naapertorlugu aalajangerneqartup avataani inerteqqutaavoq.

§ 7. Angutivissanik inuussutissarsiutigalugu nipisanniarneq piffissami 16. julimiit 31. januarimut inerteqqutaavoq.

§ 8. Najukkani tunitsiviit aalisartullu kattuffiisa sinniisuisa ilanngussaq 1 naapertorlugu aqutsiveqarfinni ataasiakkaani inuussutissarsiutigalugu nipisanniarnermi piffissaq aalisarfissaq qaqugu aallartinneqassanersoq isumaqatigiissutigisassavaat.
Imm. 2. Piffissaq aalisarfiusoq tassaavoq ullut aalisarfiusut 60-it ataannartut.
Imm. 3. Imm. 1 naapertorlugu piffissat aalisarfiusussat isumaqatigiissutigineqartut nipisanniarnerup aqutsineqarfimmi pineqartumi aallartinnginnerani kingusinnerpaamik sapaatip akunnera sioqqullugu Aalisarnermut, Piniarnermut Nunalerinermullu Naalakkersuisoqarfimmut nalunaarutigissavaat.

Immikkoortoq nutaaq usinik nuussineq pillugu malittarisassanik imalik

Usinik nuussineq
§ 10. Aalisarsinnaanermut akuersissuteqartup nammineq umiatsiaaraata aamma nammineq angallataata akornanni usinik nuussisinnaanermut akuersissut aalisarsinnaanermut akuersissuteqartup angallataa inuussutissarsiutigalugu aalisariutaappat Aalisarnermut, Piniarnermut Nunalerinermullu Naalakkersuisoqarfimmit tunninneqassaaq.
Imm. 2. Imm. 1 naapertorlugu usinik nuussisinnaanermut akuersissut aalisarsinnaanermut akuersissummi tunniunneqartumi allassimassaaq. Usinik nuussisinnaanermi akuersissuteqarnissaq piumasaqaataavoq. Usinik nuussisinnaaneq § 3, imm. 2-mi nassuiaaserneqarpoq.
Imm. 3. Imm. 1 naapertorlugu usinik nuussineq nalunaaruteqartussaatitaanermut ilaanngilaq.

Aalisarneq pillugu inatsimmi 1996-imeersumi allaqqavoq usinik nuussisinnaanermi akuersissuteqartoqartoqassasoq. Tamanna nipisanniarnermut naleqquppallaanngilaq, tassani umiatsiaaqqamit angallammut usinik nuussisariaqarneq nalinginnaasuulluinnarluni. Taamaammat aalisartunut angallammik atuisunut akuersissut ingerlaanneq tunniunneqartassaaq. Kisiannili taamaallaat nammineq umiatsiaaqqamiit nammineq angallammut usinik nuussisoqarsinnaavoq.

Usinik nuussinerit tamarmik malittarisassat atuuttut naapertorlugit naliginnaasumik nalunaarutigineqartassapput. Nipisanniarnermi usinik nuussinerit nalunaarutigineqassanngillat taamaammallu nalunaaruteqartussaatitaanermut ilaanatik.

Aalisarnermi atortut aamma qassutinik qimaannakkanik qaqitsineq
§ 13. Aalisarneq unitsinneqarpat aalisarnermi nammineq atortorisat pissutissaqanngitsumik uninngatitsinani ingerlaannaq qaqinneqassapput.
Imm. 2. Imm. 1 naapertorlugu aalisarnermi atortut qaqinneqanngitsut piginnittoq kinaassusersineqarsinnaappat piginnittup akiligassaanik qaqinneqassapput.

§ 14. Qassutit aalisarnerup unitsinneqarnerata kingorna ullut arfineq marluk kingorna qaqinneqarnikuunngitsut qassutinik uninngatitsiinnartoq kinaassusersineqarsinnaanngippat qaqinneqarsinnaapput tigummiinnarneqarlutillu.
_____________________________________________________________

Tusarniaanermi akissut sapinngisamik kalaallisut danskisullu ulloq 19-02-2021 nal. 16.00 nallertinnagu mailikkut uunga nassiunneqassapput APNN@nanoq.gl

Sammisaq:

Aalisarneq

Tusarniaanerup suunera:

Inatsisartut inatsisaat

Saqqummiunneqarfia:

22 januari 11:01:00

Tusarniaanermi piffissaliussaq:

19 februari 00:00:00

Tusarniaanermi akissutit uunga nassiuteqquneqarput:

apnn@nanoq.gl