Canadami aatsitassarsiornerup ’Mary River Project’-ip killeqarfiit qaangerlugit sunniutissaanik naliliinerup tamanut ammasumik tusarniaassutigineqarnissaa

Nassuiaat
Ingerlatseqatigiiffik Baffinland Iron Mines Corporation (matuma kinguliani Baffinland) Baffinip qeqertaani, Canadamiittumi saviminernik aatsitassarsiorfimmik pilersitsisimavoq. Saviminissaq Kalaallit Nunaata Canadallu akornanni imartaq aqqutigalugu umiarsuakkut assartorneqartussaavoq. Saviminissap umiarsuakkut assartorneqarnerani kalaallit soqutigisaannut sunniuteqarsinnaammat, Espoo-mut isumaqatigiissut naapertorlugu Kalaallit Nunaat tusarniaaffigineqartussaavoq.

Espoo-mut isumaqatigiissut FN-ip ataani isumaqatigiissutaavoq, suliat nunat killeqarfii qaangerlugit ajoqutaasinnaanerinik akiuiniarnissamik siunertaqarfiusut. Isumaqatigiissut nunat killeqarfii qaangerlugit avatangiisinut sunniutissanik naliliinissamut, kiisalu nunami(ni) eqqorneqartussami(ni) inuit tamat, oqartussaasut soqutigisaqaqatigiiffiillu tusarniaaffigineqarnissaannut aalajangersakkanik imaqarpoq. Kalaallit Nunaat 1997-imi Espoo-mut isumaqatigiissummut ilaalerpoq.

Baffinland Espoo-mut nalunaarusiamik suliaqarpoq, tassanilu suliamiit killeqarfiit qaangerlugit sunniutissat, pisariaqarpallu iliuusissat pinaveersaartitsissutaasussat allaaserineqarnissaat naliliiffigineqarnissaallu siunertarineqarpoq. Nalunaarusiaq taanna maanna Kalaallit Nunaanni tamanut ammasumik tusarniaassutigineqartussanngorlugu nassiunneqarpoq. Nalunaarusiamut ilanngussatut Baffinlandip aamma Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup (matuma kingorna Naalakkersuisoqarfik) akornanni attaveqaqatigiinneq ilanngunneqarpoq.

Attaveqaqatigiinnermi allassimavoq, Naalakkersuisoqarfiup arlaleriarluni Baffinland Espoo-mut nalunaarusiaq iluarsaateqqullugu qinnuigisimagaa, Naalakkersuisoqarfimmit nalunaarusiami aatsitassarsiornerup killeqarfiit qaangerlugit avatangiisinut sunniutigisinnaasai naammattumik annertussusilimmik suliarineqarsimasutut isumaqarfigineqanngimmat. Baffinland Naalakkersuisoqarfiup isumaanut isumaqataanngilaq, isumaqarlunilu Naalakkersuisoqarfiup sunniutaasinnaasunut annilaangassutigisai naammattumik allaaserisimallugit. Suliaq canadamiut suliarimmassuk, Naalakkersuisoqarfiup taamaallaat Espoo-mut nalunaarusiap iluarsaanneqarnissaa qinnuteqaatigisinnaavaa, piumasarisinnaanaguli. Tamatumunnga taarsiullugu Naalakkersuisoqarfiup killeqarfiit qaangerlugit sunniutissat aammalu Kalaallit Nunaannut kingunerisassat nalinginnaasumik tusarniaanermi akissuteqaatit aqqutigalugit Canadamut saqqummiunniarpai.

Naalakkersuisoqarfik naliliivoq, suliami killeqarfiit qaangerlugit sunniutissat annerit ukununnga tunngasuusut:

  • Qilalukkanik qernertanik, Canadap aamma Kalaallit Nunaata akornanni nuttartunik akornusersuinissaq. Uumasooqatigiit taakku pitsaanngitsumik sunnerneqarpata, tamanna Kalaallit Nunaanni pisassiisarnermut kinguneqarsinnaavoq.
  • Arfivinnik, Canadap aamma Kalaallit Nunaata akornanni nuttartunik akornusersuinissaq imaluunniit toqqaannartumik apugaqartarnissaq.
  • Aarrinik akornusersuinissaq aammalu uumasooqatigiit uumaffiinut sunniinissaq.
  • Ikkannersuarmi qaleraleqarfiusumi, Kalaallit Nunaanni Aningaasaqarnikkut Killeqarfiup (EEZ) iluani immami pinngortitami malussajasumiittumi mingutsitsinissaq.
  • Ajutoortoqarnerani uuliaarluertoqarneranilu Kalaallit Nunaata imartaanut aamma timmissanut imarmiunut mingutsitsinissaq.
Tusarniaaneq
Suliamut soqutigisaqartut tamarmik tusarniaanermi akissuteqaqqullugit kaammattorneqarput. Tusarniaaneq tamanut ammasuuvoq aammalu ullormit saqqummiunneqarfimminiit sapaatit akunnerini sisamani ingerlassalluni. Naalakkersuisoqarfiup tusarniaanermi akissuteqaatit tiguneqartut Canadami oqartussaasunut attuumassutilinnut nassiutissavai.

Tusarniaanermi najoqqutassat tassaapput:
  • Espoo-mut nalunaarusiaq, Imm. 2-mi siunnersuutit – Mary River Project.
  • Ilanngussat 1-5: Canadami Baffinland Iron Mines Corporation-ip aamma Kalaallit Nunaanni Namminersorlutik Oqartussani Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup akornanni attaveqaqatigiinneq.
Tusarniaanermi killissarititaasoq: Marlunngorneq 15. juuni 2021, nal. 16:00.

Tusarniaanermi akissuteqaat uunga nassiunneqassaaq:

Nunalerinermut, Imminut Pilersornermut, Nukissiutinut Avatangiisinullu Nalaakkersuisoqarfik
Postboks 1614
3900 Nuuk

Imaluunniit e-mail una aqqutigalugu: pan@nanoq.gl.

Sammisaq:

Aatsitassat

Tusarniaanerup suunera:

Avatangiisinik nalilersuinerit

Naalakkersuisoqarfik:

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik

Saqqummiunneqarfia:

18 maaji 16:04:00

Tusarniaanermi piffissaliussaq:

15 juni 16:00:00

Tusarniaanermi akissutit uunga nassiuteqquneqarput:

pan@nanoq.gl