Siunnersuummut uunnga tusarniaaneq: Kalaallit qimmiinik qimuttunik qimmeqarneq illersuinerlu pillugit Inatsisartut Inatsisissaattut siunnersuut aamma Qimmeqarneq qitsuuteqarnerlu pillugit Inatsisartut inatsisaat

Inatsisartut 2022-mi upernaakkut ataatsimiinneranni siunnersuutip suliarineqarnissaminut saqqummiunneqarnissaa naatsorsuutigineqarpoq.

Kalaallit qimmiinik qimuttunik qimmeqarneq aammalu qimmeqarneq qitsuuteqarnerlu pillugit maleruagassat nutarterneqarlutillu uummasut pineqartut immikkoortillugit maleruagassaqartinneqarnissaat piffissami sivisuumi kissaataasimavoq, tamatumalu inerneratut inatsisissatut missingiutit marluk ilanngullugit nassiunneqartut suliarineqarsimapput, taakkulu UPA22-mi ataatsikkoortillugit Inatsisartunut saqqummiunneqarnissaat kissaataasimalluni.

Kalaallit qimmiinik qimuttunik qimmeqarneq illersuinerlu pillugit inatsisartut siunnersuut siusinnerusukkut susassaqartunut attuumassuteqartunut tusarniutigineqarsimavoq, taakku tusarniaanermut allattorsimaffimmi ataani allaqqasumi atuarneqarsinnaapput, aamma tusarniaanermut akissutit pisariaqartut inatsimmut nassuiaatinullu ilanngunneqarput. Missingiutilli annertuumik suliareqqinneqarnissaa pisariaqarsimavoq, taamaammallu Naalakkersuisoqarfik naliliivoq inatsisissamut missingiutip tusarniaassutigineqaqqilluni nassiunneqarnissaa pisariaqarsimasoq.

Siunnersuutip pingaarnersarivai kalaallit qimmiata qimuttup akuneqatsaalinissaa illersorniarlugu suliniutinik arlalinnik eqqussisoqarnissaa, ilaatigut qimminik qimuttoqarfiusunut qimminik qimuttuunngitsunik eqqussinissaq sunaluunniit inerteqqutaassasoq taamaasillunilu akusinissamut aarlerinartoqannginnerussaaq, ilaatigut annertusisamik akiuussutissamik kapisisoqartarnissaanut pilersaarusiornikkut nappaalalernissamut illersuisoqassaaq kiisalu qimminik nuussinissamut sakkortusisamik malittarisassaqarnikkut, aammalu uumasunik illersuinermut malittarisassat pitsanngorsaavigineqarlutik. Aamma susassaqarfimmi oqartussat attuumassuteqartut akornanni akisussaaffimmik avitseqateqarnissaq annertunerusumik ersarissarneqassasoq qinnutigineqarsimavoq.

Qimmeqarneq qitsuuteqarnerlu pillugit inatsisissatut siunnersuuteqarneq ilaatigut kalaallit qimmiisa qimuttut immikkut inatsiseqalernerata kingunerisaanik pivoq kiisalu qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaat nr. 18, 30. oktober 1998-imeersoq akuerineqarmalli allanngortinneqarsimanngitsoq ineriartornerup kingunerisaanik naleqqussartariaqalersimammat. Uani qimmit qitsuillu ajunngitsumik pineqartarnissaasa aammalu uummasut pineqartut illersorneqarsinnaasumik pineqartariaqartarnerisa ilisimaneqaleraluttuinnarnera inatsimmi allassimasariaqarneri eqqarsaatigineqarput kiisalu qimmit, qitsuit uummasuutillu allat Kalaallit Nunaanni tamarmi siammarsimaneri isiginiarneqarlutik.

Oqaaseqaatit nassiunneqassapput uunga APN@nanoq.gl, ajornanngippat danskisut aamma kalaallisut, kingusinnerpaamillu Naalakkersuisoqarfimmit tiguneqarsimassallutik

Sisamanngorneq 14. oktober 2021.

Inatsisissatut missingiut aamma Namminersorlutik Oqartussat tusarniaanermut nittartagaanni atuarneqarsinnaavoq: www.naalakkersuisut.gl

Tusarniaanerup suunera:

Inatsisartut inatsisaat

Naalakkersuisoqarfik:

Aalisarnermut Piniarnermullu Naalakkersuisoqarfik

Saqqummiunneqarfia:

16 septembari 14:00:00

Tusarniaanermi piffissaliussaq:

14 oktobari 00:00:00

Tusarniaanermi akissutit uunga nassiuteqquneqarput:

apn@nanoq.gl