Uunga siunnersuutip tusarniaassutigineqarnera: Silaannakkut angallassinermut inatsimmut allannguutissatut inatsisip Kalaallit Nunaannut atuuttussanngortinneqarnissaa pillugu peqqussummut missingiut

Matumuuna silaannakkut angallassinermut inatsimmut allannguutissatut inatsisip Kalaallit Nunaannut atuuttussanngortinneqarnissaa pillugu peqqussummut missingiut, Naalakkersuisut nittartagaanni tusarniaanernut iserfissiaq aqqutigalugu tamanut ammasumi tusarniaassutigineqartussaq nassiunneqarpoq.
Tusarniaanermi piffissarititaasoq:
Tusarniaanermi akissuteqaat uunga nassiunneqassaaq:
mail-ikkut Ineqarnermut, Attaveqatigiinnermut Naligiissitaanermullu Naalakkersuisoqarfimmut, uunga: box909@nanoq.gl
imaluunniit
allakkatigut, uunga: Ineqarnermut, Attaveqatigiinnermut Naligiissitaanermullu Naalakkersuisoqarfik, Imaneq 1A – 601, Postboks 909, 3900 Nuuk
kingusinnerpaamik ulloq 27. august 2021 nal. 12.00
Ilanngussat:

  • Imaqarniliaq, DK aamma KAL
  • Silaannakkut angallassinermut inatsimmut allannguutissatut inatsisip Kalaallit Nunaannut atuuttussanngortinneqarnissaa pillugu peqqussut
  • Nutserneqarnerani maluginiagassat
Siunnersuut pillugu:
Angallannermut Aqutsisoqarfiup qinnuteqarneratigut matumuuna Ineqarnermut, Attaveqatigiinnermut Naligiissitaanermullu Naalakkersuisoqarfiup silaannakkut angallassinermut inatsimmut allannguutissatut inatsisip Kalaallit Nunaannut atuuttussanngortinneqarnissaa pillugu peqqussummut missingiut nassiuppaa.
Peqqussummi silaannakkut angallassinermut inatsimmut allannguutissatut inatsisit ilaat (inatsit nr. 731/2018 aamma inatsit nr. 2073/2020), kingullermik allannguutissatut inatsisip 2017-imi Kalaallit Nunaanut atuuttussanngortinneqarnerata kingorna Danmarkimi atuutsinneqalersut katersuunneqarput.
Allannguutissatut inatsisit pingaarnersiorlugit silaannakkut angallannermut inatsimmi allaffissornermut allannguutinik minnernik arlalinnik, aningaasaqarnikkut kinguneqartussaanngitsunik imaqarpoq. Taakku allakkiami Angallannermut Aqutsisoqarfimmit suliarineqartumi matumunnga ilanngunneqartumi allaaserineqarput.
Peqqussut taamaallaat allannguutissatut inatsisinut, Naalagaaffeqatigiit iluanni sillimaniarnermut akitsuusiisarnerit assigiinnissaannik qulakkeerinissaq aamma Kangerlussuup Mittarfiata aamma EU-mi mittarfiit akornanni OSS-ip (One Stop Security) attatiinnarneqarnissaanik qulakkeerinissaq eqqarsaatigalugu nukingiullugu suliarineqartussatut pisariaqartinneqartutut naliliiffigineqartunut tunngasuuvoq.
Peqqussut allannguutinut, 1. januar 2022-mi Danmarkimi atuutilersussanut tunngasuuvoq. Peqqussut UKA2021-mi aalajangiiffigineqanngippat, aatsaat allannguutit 2022-p ingerlanerani Kalaallit Nunaanni atuutilersinnaapput. Tamanna Kangerlussuarmiit Københavnimut angallavimmi kiffartuussinerup qaffasissusianut kinguneqarnerlorujussuarsinnaavoq, kiisalu Naalagaaffeqatigiit iluanni sillimaniarnermut akitsuutit akornanni naapertuutinngitsumik equtitsisinnaalluni.

Sillimaniarnermut akitsuut

Ukiuni tulliuttuni Coronap nunarsuarmi tuniluunnera peqqutaalluni silaannakkut angallassineq nalorninartoqangaatsiartussaavoq. Sillimaniarnermut akitsuut, 2017-imi Kalaallit Nunaannut peqqussutaalersoq iluarseeriaatsit, ilaasut ikilineri peqqutigalugu 2022-mi akinik qaffasippallaanik kinguneqartussat malillugit aalajangerneqarsimavoq.
2020-mi decembarimi silaannakkut angallannermut inatsimmut allannguut, iluarseeriaatsinik 2025-mut kinguartitsiviusoq akuersissutigineqarpoq. Maleruagassat nutaat atuutilersussallu Danmarkimi aamma Kalaallit Nunaanni ataatsikkut atuutsinneqalinngippata, tamanna akitsuutit, silaannakkut angallasseqatigiiffiit mittarfimmit aallarnerminni akiligassaat, Danmarkimi imaluunniit Kalaallit Nunaanni mittarfimmiit aallarneq apeqqutaalluni, annertuumik assigiinngissuteqarnerinik kinguneqartussaavoq.
Kangerlussuup Mittarfiata aamma EU-mi mittarfiit akornanni OSS-ip atuutsiinnarneqarnissaa
Kangerlussuup Mittarfia EU suleqatigalugu One Stop Security-mik (OSS) taaneqartartumik atuutsitsivoq. Tamatuma kingunerisaanik EU-p mittarfimmi sillimaniarneq EU-mi sillimaniarnerup nalingatut akuersaarpaa. Akuersaarnermut Kangerlussuup Mittarfiani danskit silaannakkut angallassinermi sillimaniarnissamut maleruagassiaannik malinnittoqarnera tunngavigineqarpoq. OSS-imi inissisimaneq pitsaaqutitaqarpoq, tassalu ilaasut, nassatat tigummiaannakkat, nassatat nalunaarsukkat nassiussallu Kangerlussuup Mittarfianiit EU-p mittarfianut tikiunneqarnerminni sillimaniarnermi nutaamik misissuiffigineqanngikkaluarlutik ingerlaqqissinnaapput. Tamanna ilaasunut iluaqutaaginnanngilaq, aammali mittarfinnut taamatullu silaannakkut angallasseqatigiiffinnut aningaasaqarnikkut piffissarlu eqqarsaatigalugu iluaqutitaqarpoq.
EU-mi OSS-ip atuutiinnarnissaa qulakkeerneqassappat, Kalaallit Nunaata silaannakkut angallassinermi sillimaniarnissamut danskit piumasaqaataanik, tassungalu ilanngullugu inuit ilaannut sillimaniarnermi akuersissuteqarnissamut piumasaqaatinik malinniinnarnissaa pisariaqarpoq.

Sammisaq:

Attaveqaqatigiinnermut Allaffeqarfik

Saqqummiunneqarfia:

12 aggusti 15:56:00

Tusarniaanermi piffissaliussaq:

27 aggusti 12:00:00

Tusarniaanermi akissutit uunga nassiuteqquneqarput:

box909@nanoq.gl