Uranimik misissueqqaarnermut, ujaasinermut piiaanermullu inerteqquteqarnissaq pillugu Inatsisartut inatsisissaannut siunnersuummik tusarniaaneq

Matumuuna Aatsitassanut Naalakkersuisoqarfiup Uranimik misissueqqaarnermut, ujaasinermut piiaanermullu inerteqquteqarnissaq pillugu Inatsisartut inatsisissaannut siunnersuut ilanngussaq nassiuppaa.

Siunnersuummut tunngavigisaq tassaavoq inatsisikkut attueqqusinngilluinnarnermut politikkip eqquteqqinnissaa pillugu naalakkersuinikkut kissaateqarneq.

Siunnersuummiipput uranimik misissueqqaarnermut, ujaasinermut piiaanermullu inerteqqut, kiisalu uranimut naleqqiullugu aatsitassanut allanut tunngasunik misissueqqaarnermut, ujaasinermut piiaanermullu atatillugu uranip imaqassusissaanut killingisassaq.

Tamatuma saniatigut siunnersuutip imaraa toqqammavissiissummut aalajangersagaq, pinngoqqaatinut radioaktiviusunut allanut inerteqqummik assingusumik eqqussinissamut Naalakkersuisunut periarfissiisoq, kiisalu inerteqqummik naapertuuttumik piiaasoqarsinnaassanngippat aatsitassarsiornermut akuersissutinik killilersuinissamut aamma utertitsinissamut toqqammavissaq.

Kiisalu siunnersuutip imaraa pineqaatissiisarnermut aalajangersagaq.

Siunnersuummut, taassuma siunertaanut imarisaanullu erseqqinnerusumik tunngavigisat pillugit siunnersuummut ilanngullugit nassiussatut oqaaseqaatit innersuutigineqarput.

Oqaaseqaataasinnaasut kingusinnerpaamik ataatsinngornermi, ulloq aggustip aappaani Aatsitassanut Naalakkersuisoqarfimmit tiguneqartussanngorlugit nassiunneqarsimassapput. Oqaaseqaatit uunga nassiuteqquneqarput: asn@nanoq.gl.

Sammisaq:

Aatsitassat

Tusarniaanerup suunera:

Inatsisartut inatsisaat

Naalakkersuisoqarfik:

Aatsitassanut Inatsisit Atuutsinneqarnerannut Naalakkersuisoqarfik

Saqqummiunneqarfia:

02 juli 00:00:00

Tusarniaanermi piffissaliussaq:

02 aggusti 00:00:00

Tusarniaanermi akissutit uunga nassiuteqquneqarput:

asn@nanoq.gl