Nappaatit tunillaassortut akiorniarlugit iliuutsit pillugit Inatsisartut inatsisissaattut siunnersuut

Peqqissutsimut Naalakkersuisoqarfik matumuuna Nappaatit tunillaassortut akiorniarlugit iliuutsit pillugit Inatsisartut inatsisissaattut siunnersuut” tamanut tusarniaassutigaa.
Siunnersuut tusarniassutigineqarpoq Nappaatit tunillaassortut akiorniarlugit iliuutsit pillugit Inatsisartut peqqussutaat kingornalu allannguutit, 2022-mi juulip aallaqqaataani atorunnaarnissaat naatsorsuutigineqarmat.
Inatsisartut inatsisissaatut siunnersuummi matumani ilaatigut Nappaatit tunillaassortut pillugit Inatsisartut allannguutitalimmik peqqussutaannit atuuttumit aalajangersakkat ilaat ingerlateqqinneqarput ilaatigullu malittarisassanik, nunarsuaq tamakkerlugu Covid-19-imik tunillaassuuttoqarneranit Danmarkimi nunatsinnilu misilittakkat aallaavigalugit aalajangersarneqartunik nutaanik imaqarluni.

Taamaammat aalajangersakkat qallunaat inatsisaannut annerusumik assingupput, nunarsuaq tamakkerlugu Covid-19-imik tunillaassuuttoqarnerata kingunerisaanik killilersuisariaqarnikkut inerteqqusiortariaqarnikkullu unammilligassat amerlasuutigut assigiissimammata, soorluttaaq innuttaasut ataasiakkaat inatsit tunngaviusoq naapertorlugu pisinnaatitaaffii aamma inuiaqatigiit ataatsimut illersornissaata oqimaaqatigiissinniarnerat assigiimmik inatsisitigut tunngaveqarlutillu najoqqutaqartut.

Nunarsuaq tamakkerlugu Covid-19-imik tunillaassuuttoqarnerani iliuuserineqarsimasut annertunerusumik Covid-19-imik tuniluuttoqannginnissaanut siammaasoqannginnissaanullu pingaaruteqarsimapput. Naalakkersuisut isumaqarput, siunissami iliuutsit taakku aamma atorneqarsinnaasariaqartut.

Inatsisissatut siunnersuut 2022-mi juulip aallaqqaataani atuutilersussatut siunnersuutigineqarpoq.

Oqaaseqaatit naalakkersuisoqarfiup pisortatigoortumik emailianut uunga nassiuteqquneqarput: pn@nanoq.gl assingalu uunga aamma nassiuteqquneqarpoq ajba@nanoq.gl.

Oqaaseqaatit oktoberip 29-ani 2021 nal. 16:00 nassiunneqarnissaanut killeqarput.

Sammisaq:

Peqqinnissaq

Tusarniaanerup suunera:

Inatsisartut inatsisaat

Naalakkersuisoqarfik:

Peqqissutsimut Naalakkersuisoqarfik

Saqqummiunneqarfia:

01 oktobari 16:00:00

Tusarniaanermi piffissaliussaq:

29 oktobari 16:00:00

Tusarniaanermi akissutit uunga nassiuteqquneqarput:

pn@nanoq.gl assingalu uunga aamma nassiuteqquneqarpoq ajba@nanoq.gl