Tuttunniarnissamut Umimmanniarnissamullu piffissaliussat pisassiissutillu. Aasaanerani aamma Ukiaanerani 2021

Matumuuna aasaanerani ukiaaneranilu 2021-imi piffissaliussat piniarfiusussat, tuttutassiissutit kiisalu umimmattassiissutit pillugit siunnersuutit tusarniutigineqalerput. Tuttunik aamma umimmannik ukiup qanoq ilinera najoqqutaralugu piniarnikkut pitsaanerpaamik atorluaanissaq APN-miit pingaartinneqarpoq. Taamaammat neqit, ammit, qiviut allallu pitsaanerpaamik atorluarnissaat pillugu tuttut sapinngisamik aasaanerani ukiaaneranilu piniarneqartarnissaat umimmaallu aasaanerani, ukiaanerani kiisalu ukiuunerani piniarneqartarnissaat anguniarneqartarpoq.

Piniarfik 2-mi – Sisimiut-Kangerlussuaq – ukiuni arfineq-pingasuni kisitsisoqarnikuunani Martsimi 2018-mi Pinngortitaleriffimmiit tuttunik umimmannillu pisortatigoortumik kisitsisoqarpoq. Piniarfik 3-mi – Akia-Maniitsoq – ukiuni qulingiluani kisitsisoqarnikuunani Martsimi 2019-mi aamma taamatut kisitsisoqarpoq taamatullu Piniarfik 4-mi – Ameralik – ukiuni arfineq-marlunni kisitsisoqarnikuunani kisitsisoqarluni. Kisitsinerit tunngavigalugit siorna Pinngortitaleriffimmiit nutaamik siunnersuisoqarpoq, tassanilu piniarfinni annerpaani tuttunniarnerup sivitsorneqarnissaa ilaatigut inassutigineqarluni. Taassuma saniatigut piniartullu ilisimasaat tunngavigalugu siornamut naleqqiullugu allannguutit annikitsuinnaat APN-miit siunnersuutigineqarput.

Ivittuuni umimmannik minnerpaaffiliinermik kisitsinissaq Apriilimi 2021-mi ingerlanneqartussatut pilersaarutigineqartoq aputip aqippallaarnera pissutigalugu ingerlanneqarsinnaasimanngilaq, tusarniaanerulli ingerlanerani ingerlanneqarnissaa naatsorsuutigineqarpoq. Taamaammat Ivittuuni umimmattassanut siunnersuutit tusarniaanermi uani ilanngunneqarsinnaasimanngillat.

Tuttut
1. Piniarfik 2, 3 aamma 4: Inuussutissarsiutigalugu tuttunniarneq 1. Augusti-mi aallartissaaq 31. Decembari ilanngullugu ingerlassalluni. Sunngiffimmi tuttunniarneq 1. August-mi aallartissaaq 31. Oktobari ilanngullugu ingerlassalluni. Kulavaat norrallit piniaqqusaanngillat.
2. Piniarfik 1, 5, 6, 7, 8 aamma 11: Inuussutissarsiutigalugu tuttunniarneq 1. August-mi aallartissaaq 15. Oktobari ilanngullugu ingerlassalluni. Sunngiffimmi tuttunniarneq 1. August-mi aallartissaaq 30. Septembari ilanngullugu ingerlassalluni. Kulavaat norrallit piniaqqusaanngillat.
3. Piniarfik 9 aamma 10 (Kangerluarsorujuk, Nuna Prudhoe aamma Nuna Inglefield): Inuussutissarsiutigalugu aamma sunngiffimmi tuttunniarneq 1. Augusti-mi aallartissaaq 31. Decembari ilanngullugu ingerlassalluni. Kulavaat norrallit piniaqqusaanngillat.
4. Piniarfiit tamarmik: Tuttut angutivissat oktobarimi nuliunerup nalaani tippassinnaasut tuttunniarnermi ileqqorissaarnissaq pillugu piniaqqusaanngillat.

Tunngavilersuutit: Piniartut ilisimasaat malillugu Piniarfik 5-mi Qeqertarsuatsiaani tuttut Piniarfik 2-mi, Piniarfik 3-mi aamma Piniarfik 4-mi tuttunut sanilliullugit ikinnerupput taamaammat piniarfimmi pineqartumi ukiuni kingullerni marlunni ingerlanneqartup tuttunniarnermik sivitsuinerup unitsinneqarnissaa siunnersuutigineqarpoq.
Piniarfinni arlalinni tuttut angutivissat tippalernikut pisarineqartut qimaannarneqartartunik arlalissuarnik naammattuisoqartarnera pillugu piniartut ilisimasaat malillugu tuttut angutivissat tippassinnaasut oktobarimi nuliunerup nalaani piniaqqusaannginnissaat siunnersuutigineqarpoq.

Ilisimatitsissut: Nuup aqutsiveqarfiani 2020-mi tuttunniarnissamut akuersissutit 3.263-it tunniunneqarput kisianni taamaallaat 1.442-it pisanik nalunaarutitalimmik utertinneqarlutik, tassalu affaannaalluunniit inorlugit. Taamatut inissisimasoqarnera naammaginanngilluinnarpoq tamannalu pillugu tuttoqatigiit piniarfinni qanoq sakkortutigisumik piniarneqartarnerat qanorlu innerat APN-mut Pinngortitaleriffimmullu nalileruminaappoq. Pisanik nalunaaruteqarneq inatsisitigut pisussaassutaammat pisanik nalunaaruteqartanngitsunut kinguneqartitsisinnaaneq APN-mi inatsisinik sukaterinikkut sulissutigineqarpoq.

Erseqqissaatit: Erseqqissaatigineqarpoq kommunimiit tuttunniarnissamut akuersissutit piniarfikkaartumik ataasiakkaarlugit tunniunneqartassasut, tamannalu inuussutissarsiutigalugu (akuersissummut tuttut qulit) aamma sunngiffimmi piniartunut (akuersissummut tuttut tallimat) siorna 2020-mi kommunit nalunaarsuinerat malillugu akuersissutinik utertitsinikkut pisanik nalunaaruteqarsimanngitsunut tamanut atuuppoq. Taamatut inissisimasut aatsaat akuersissummik pisanik naammaginartumik immersorneqartumik utertitsinikkut akuersissummik nutaamik qinnuteqarsinnaassapput.
APN-ip kommunit qanimut suleqatigalugit akuersissutinik tunniussisarneq utertitsisarnerlu malinnaaffigivaa.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniarnermilu atornissaat inerteqqutaammata.

Umimmaat
5. Aqutsiveqarfik Maniitsoq: Piniarfik 1-mi, 2-mi, 3-mi aamma 4-mi inuussutissarsiutigalugu aamma sunngiffimmi umimmanniarneq 1. Augusti-mi aallartissaaq 15. Oktobari ilanngullugu ingerlassalluni. Tiggaat tammajuitsussanik piniartitsinermi piniagassat aamma kulavaat norrallit piniaqqusaanngillat.
6. Aqutsiveqarfik Sisimiut: Inuussutissarsiutigalugu aamma sunngiffimmi killilimmik umimmanniarneq 1. Augusti-mi aallartissaaq 15. Oktobari ilanngullugu ingerlassalluni umimmattassiissutillu 400-iupput. Umimmattassat pisarinngitsuukkat Ukiuunerani 2022-mut nuunneqassapput. Tiggaat tammajuitsussanik piniartitsinermi piniagassat aamma kulavaat norrallit piniaqqusaanngillat.
7. Umimmaqarfik Naternaq: Inuussutissarsiutigalugu aamma sunngiffimmi umimmanniarneq 1. August-mi aallartissaaq 15. Oktobari ilanngullugu ingerlassalluni umimmattassiissutillu 120-iupput. Ussuit Nunaat, Ipiutaarsuup Nunaa aamma Eqalummiut Nunaat umimmaqarfimmut Naternamut ilanngunneqarnikuupput. Umimmattassat pisarinngitsuukkat Ukiuunerani 2022-mut nuunneqassapput. Tiggaat tammajuitsussanik piniartitsinermi piniagassat kulavaat norrallit piniaqqusaanngillat.
8. Aqutsiveqarfik Qaanaaq: Piniarfimmi Kap Atholl-mi inuussutissarsiutigalugu sunngiffimmilu umimmanniarnissamut umimmattassiissutit 40-runiit 60-inut qaffanneqarnissaat siunnersuutigineqarpoq. Piniarfimmi Nuna Inglefield aamma Nuna Prudhoe-mi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 60-iunissaat siunnersuutigineqarpoq. Tiggaat tammajuitsussanik piniartitsinermi piniagassat aamma kulavaat norrallit piniaqqusaanngillat.
9. Aqutsiveqarfik Ivittuut: Umimmattassanut piffissaliussanullu siunnersuutit pillugit minnerpaafiliinermik kisitsinissaq tusarniaanerup nalaani ingerlanneqartussaq utaqqineqarpoq.
10. Aqutsiveqarfik Sigguk: Inuussutissarsiutigalugu aamma sunngiffimmi umimmanniarneq 1. Augusti-mi aallartissaaq 15. Oktobari ilanngullugu ingerlassaaq. Umimmattassiissutit allannguuteqaratik 150-iupput. Tiggaat tammajuitsussanik piniartitsinermi piniagassat aamma kulavaat norrallit piniaqqusaanngillat.
11. Aqutsiveqarfik Ittoqqortoormiit: Inuussutissarsiutigalugu aamma sunngiffimmi umimmanniarneq 1. Augusti-mi aallartissaaq 15. Oktobari ilanngullugu ingerlassaaq aammattaaq 10. Novembari-miit 10. Decembari ilanngullugu. Umimmattassiissutit allannguuteqaratik 115-iupput. Tiggaat tammajuitsussanik piniartitsinermi piniagassat aamma kulavaat norrallit piniaqqusaanngillat.

Tunngavilersuutit: Aqutsiveqarfimmi Maniitsumi umimmanniarnerup 1. Augusti-mi aallartinnissaa siunnersuutigineqarpoq, imm. 5 takuuk, naak Biologit siunnersuinerat siornameersoq malillugu aatsaat 15. Augusti-mi allartinnissaa inassutigineqaraluartoq. Ileqqutoqqat malillugit umimmanniarnerup neqinillu panertulisarnerup APN-miit pingaartinneqarnera tassani tunngaviuvoq, umimmannillu akornusiisarnerup ilaatigut ukiuunerani umimmanniarnerup assartuutinillu motoorilinnik atuinerup nalaani pisartup allatigut millisinneqarnissaa sulissutigineqarpoq.
Umimmaat Ussuit Nunaanni, Ipiutaarsuup Nunaani aamma Eqalummiut Nunaanni takuneqartartut Piniarfik Naternamut ilanngunneqarput pissutigalugu umimmaat taakku suli avannamut kimmullu ingerlaarsinnaanissaat Naternamilu umimmaqatigiinnut ilanngunnissaat APN-miit pingaartinneqarmat, imm. 7 takuuk.
Qaanaap aqutsiveqarfiani Piniarfik Kap Atholl-mi inuussutissarsiutigalugu sunngiffimmilu umimmattassat Biologit nunaminertap neriniarfissatut killilimmik nammassinnaanera pillugu siunnersuinerat aamma umimmaat amerlisimanerat piniarfiullu avataanut siaruaassimanerat pillugu piniartut ilisimasaat tunngavigalugu 40-runiit 60-inut qaffanneqarnissaat siunnersuutigineqarpoq, imm. 8 takuuk.

Erseqqissaatit: Erseqqissaatigineqarpoq qamuteralaat, ATV-t aamma qamutit motoorillit allat umimmannik malersuinermi piniarnermilu atornissaat inerteqqutaammat.

Piniarnermut allagartap 2021-mi 1. maaji sioqqullugu akilereersimanissaa pillugu piumasaqaat inuussutissarsiutigalugu aamma sunngiffimmi piniartunut tamanut atuuppoq. Soorlu aamma sunngiffimmi piniarnermut akuersissutit inunnut ukiut kingulliit qulit iluanni ataavartumik ukiuni marlunni Kalaallit Nunaanni najugalittut inuit nalunaarsorsimaffiannut nalunaarneqarsimasunut taamaallaat tunniunneqarsinnaanerat pillugu piumasaqaat atuuttoq.

Tusarniaanermut akissuteqaatit kingusinnerpaamik Juulip aappaani 2021-mi APNN-mut uunga apn@nanoq.gl aamma numl@nanoq.gl nassiunneqassapput, akissuteqanngikkaannilu tusarniaanermik akuerinninnertut isigineqassaaq.

Sammisaq:

Piniarneq

Tusarniaanerup suunera:

Nalunaarut

Naalakkersuisoqarfik:

Aalisarnermut Piniarnermullu Naalakkersuisoqarfik

Saqqummiunneqarfia:

01 juni 14:37:00

Tusarniaanermi piffissaliussaq:

02 juli 00:00:00

Tusarniaanermi akissutit uunga nassiuteqquneqarput:

apn@nanoq.gl aamma numl@nanoq.gl