Akuutissat ozonimik aseruisartut ilaat pillugit nalunaarutissamut missingiutip tusarniaassutigineqarnera

Pinngortitamut Avatangiisinullu Naalakkersuisoqarfiup matumuuna akuutissat ozonimik aseruisartut ilaat pillugit nalunaarutissamut missingersuut tusarniaassutigalugu nassiuppaa. Siunnersuut aqqutigalugu Sananeqaatit ozonimik aseruisartut ilaasa atorneqarnerannut inerteqqut pillugu Namminersornerullutik Oqartussat nalunaarutaat nr. 30, 10. august 2001-imeersoq nutarterneqarpoq.

Siunnersuummut matumunnga nunani tamalaani ilaatigut tunisassiornermut, akuutissanik ozonimik aseruisartunik atuinermut igitsisarnermullu piumasaqaatit nutaat tunngavigineqarput. Piumasaqaatit taakku akuutissat ozonimik aseruisartut pillugit Montreal-imi peqqussummit, Kalaallit Nunaata ilaaffigisaanit pisuupput.

Ozonip aseroriartornera annikillisinniarlugu akuutissat ozonimik aseruisartut ukiuni arlalinni maleruagassaqartinneqarput. Maleruagassani akuutissanik taamaattunik aniatitsinerup annikillisinneqarnissaa siunertarineqarpoq.

Nalunaarut maanna atuuttoq piumasaqaatinik naleqquttunik imaqanngimmat nutarterneqarpoq, taamaalillunilu Kalaallit Nunaat Montreal-imi peqqussummi akuutissat ozonimik aseruisartut pillugit maleruagassanik malinnissinnaalissaaq.

Nalunaarummut atuuttumut allannguutissatut siunnersuutigineqartunit ilaatigut uku taaneqarsinnaapput:

  • Qatserutinik halon-inik akulinnik aalaakkaasunik angallattakkanillu inerteqquteqarneq, umiarsuarni timmisartunilu atortut kisimik pinnatik.
  • Akuutissanik ozonimik aseruisinnaasunik akulinnik aniatitsinissaq pinaveersaartinniarlugu naammaginartunik tamanik iliuuseqarnissamut piumasaqaateqarneq.
  • Halon-inik immiinissamut inerteqquteqarneq, timmisartuni atortunik immiinerit kisiisa pinnagit.
  • Akuutissanik ozonimik aseruisinnaasunik sananissamut inerteqquteqarneq.
  • Atortunik akuutissanik ozonimik aseruisartunik imalinnik piffissalikkamik misissuisarnissamik piumasaqaateqarneq.
  • Atortunik akuutissanik ozonimik aseruisartunik imalinnik misissuisarnissamut, aserfallatsaaliuinissamut piiasarnissamullu piumasaqaateqarneq.
  • Nalunaarummi saneqqutsinissamik akuersissuteqartarnermut maleruagassanik erseqqissaaneq.
  • Nalunaarutip aamma umiarsuarnut imartamiittunut atuunnera pillugu erseqqissaaneq.
Tusarniaanermi killissarititaasoq
Tusarniaanermi akissuteqaat kingusinnerpaamik 12-03-2020-imi Pinngortitamut Avatangiisinullu Naalakkersuisoqarfimmut nassiuteqquneqarpoq. Tusarniaanermi akissuteqaatit Naalakkersuisoqarfiup pisortatigoortumik e-mail-adresseanut nassiunneqassapput: pan@nanoq.gl.

Sammisaq:

Avatangiisit

Tusarniaanerup suunera:

Nalunaarut

Saqqummiunneqarfia:

12 februari 13:13:00

Tusarniaanermi piffissaliussaq:

12 martsi 00:00:00

Tusarniaanermi akissutit uunga nassiuteqquneqarput:

pan@nanoq.gl