Tusarniaaneq Namminersorlutik Oqartussat nalunaarutissaat piffissami ajornartoorfiusumi atuartitsisarneq, misilitsittarneq aamma soraarummeertarneq, tiguneqartarneq il.il. covid-19-ip kingunerisaanik atugassarititaasut pillugit.

Ilanngullugu nassiunneqarpoq tuaviortumik tusarniaassutigineqartoq Namminersorlutik Oqartussat nalunaarutissaat piffissami ajornartoorfiusumi atuartitsisarneq, misilitsittarneq aamma soraarummeertarneq, tiguneqartarneq il.il. covid-19-ip kingunerisaanik atugassarititaasut pillugit.

Nalunaarummut siunnersuut suliaavoq ilassutitut Inatsisartut tuaviortumik inatsisiliornerisa kingunerisaanik, siunnerfigalugu pisariaqartunik iliuuseqartoqarluni aalajangersaasoqarnissaa, qularnaarumallugu covid-19-ip tunillaassuutinnginnissaa, aammalu pisariaqartunik tamatumunnga atatillugu nalunaarutinik suliaqartoqarnissaa. Tamatumani ilaapput ilaatigut malittarisassiornissaq ajornartoorfiusumi atuartitsisarneq il.il. pillugit, periarfissaqartitsisunik inatsisini aalajangersakkanik atuarfiit aamma ilinniarfiit atuartitsisarneranni ilinniartitsisarnerannilu aalajangersakkanik sanioqqutsisoqartarsinnaanissaa.

Nalunaarummut siunnersuut suliarineqarpoq Nappaatit tunillaassortut akiorniarlugit iliuutsit pillugit Inatsisartut peqqussutaanni nr. 20, 12. november 2001-imeersumi, kingullermillu allanngortinneqartumi Inatsisartut inatsisaanni nr. 1, 1. April 2020-imeersumi § 22, imm. 2 naapertorlugu.

Siunnersuummi pingaarnertut siunertaavoq qularnaassallugu ajornartoorfiusumi atuartitsisarneq il.il. atuartunut aamma ilinniagaqartunut covid-19-ip kingunerisaanik pinaveersaartitsinerugallartut iliuutsillu tunngavigalugit nalinginnaasumik atuartinneqarsinnaanngitsunut il.il. malittarisassat atuuttut pineqartut naapertorlugit.

Nalunaarut aallaavittut ilinniarfiup imaluunniit atuarfiup ajornartoorfiusumi atuartitsinermik aaqqissuussinissaanik siunnerfeqarpoq atuartut ataasiakkaat pisariaqartitsinerannut naapertuuttumik piffissami maanna immikkut ittumik inissisimaffigisatsinni aaqqissuunneqarsinnaasut iluanni ingerlanneqarsinnaasunik.
Kiisalu aamma sapinngisamik annertunerpaatigut isiginiarneqartussaapput iliuutsit nalunaarut naapertorlugu aallartinneqartartussat atuartunut aamma ilinniagaqartunut atugassarititaasunik ajornerusunik pilersitsinnginnissaat, nalinginnaasumik atuartitsisarnermi pissarsiarisassaannut sanilliullugu.

Pissutsit immikkut ittut covid-19-imut tunngatillugu atuunnerat pissutigalugu pisariaqarpoq tusarniaaneq tuaviortumik tusarniaanertut ingerlatissallugu.

Taamaattumik oqaaseqaataasinnaasut Ilinniartitaanermut, Kultureqarnermut Ilageeqarnermullu Naalakkersuisoqarfimmut nassiutereeqquneqarput kingusinnerpaamik ulloq 20. april 2020 nal. 12.00. Tamatumunngalu atatillugu oqaaseqaatit nassiuteqquneqarput Naalakkersuisoqarfiup pisortatigoortumik mail-adresse-anut: ikin@nanoq.gl.

Sammisaq:

Ilinniartitaaneq

Tusarniaanerup suunera:

Nalunaarut

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

17 apriili 09:25:00

Tusarniaanermi piffissaliussaq:

20 apriili 12:00:00

Tusarniaanermi akissutit uunga nassiuteqquneqarput:

ikin@nanoq.gl