Minamata pillugu isumaqatigiissummut Kalaallit Nunaata nunatut ilaatinneqannginnerata atorunnaarsinneqarnissaa pillugu tusarniaaneq

Naalakkersuisunit aalajangiiffigisassatut siunnersuuteqartoqarnissaa sioqqullugu Inatsisartut isummerfigissavaat Kalaallit Nunaat Minamata pillugu isumaqatigiissummut ilanngutissanersoq, Minamata pillugu isumaqatigiissummut Kalaallit Nunaata nunatut ilaatinneqannginnerata atorunnaarsinneqarneratigut. Taamaammat Pinngortitamut Avatangiisinullu Naalakkersuisoqarfiup Minamata pillugu isumaqatigiissummut atsioqataanissaq tusarniaassutigaa.

Nassuiaat
Nunarsuaq tamakkerlugu kviksølv pillugu isumaqatigiissummut, Minamata pillugu isumaqatigiissummut, isumaqatigiinniarnerit januar 2013-imi naammassineqarput. Isumaqatigiissummi anguniarneqarpoq inuit silaannarmut aniatitsinerinit kviksølv-imillu kviksølv-italinnillu aniatitsinernit inuit peqqissusiisa avatangiisillu illersorneqarnissaat. Danmark-ip isumaqatigiissut 10. oktober 2013 atsioqataaffigaa Kalaallit Nunaat aamma Savalimmiut nunatut ilaatinnagit.

Isumaqatigiissummi killilersuutigineqartut ilagaat kviksølv-imik piiaaneq nunallu tamalaat akornanni kviksølv-ip niuerutigineqarnera, inerteqqutigineqartut tassaapput nioqqutissat arlalissuit kviksølv-imik akullit sanaartorneqarneri, eqqussorneqarneri avammullu niuerutigineqarneri, inerteqqutigineqartut imaluunniit ingerlatsinermi piumasaqarfigineqartut tassaapput kviksølv-imik atuilluni sanaartornerit assigiinngitsut pinngitsoortinniarneqartullu tassaapput nioqqutissani suliffissuaqarfinnilu kviksølv-imik nutaamik atuiniarnerit. Taamaalillunilu isumaqatigiissummi aalajangersakkat kviksølv-ip aallaqqaataaniit atorunnaarnissaanut atuupput; piiaanermi atuinermilu taavalu aniatitsinermut eqqakkanillu suliaqarnermut.

Kalaallit Nunaata nunatut ilaatinneqannginnerata atorunnaarsinneratigut Minamata pillugu isumaqatigiissummut atsioqataanerup inuiaqatigiit aningaasaqarnerannut sunniutissai ilisimatitsissummi ilanngunneqartumi ersarinnerusumik nassuiarneqarput. Pinngortitamut Avatangiisinullu Naalakkersuisoqarfiup siunnersuutigaa Minamata pillugu isumaqatigiissutip atortinneqarnera minnerpaaffianiitinneqassasoq.

Sammisaq:

Avatangiisit

Tusarniaanerup suunera:

Avatangiisinik nalilersuinerit

Saqqummiunneqarfia:

05 maaji 15:59:00

Tusarniaanermi piffissaliussaq:

17 juni 00:00:00

Tusarniaanermi akissutit uunga nassiuteqquneqarput:

pan@nanoq.gl