Kunngip peqqussutaatigut illersornissaqarfiup sulisui pillugit inatsisip allangorneranut inatsisit aalajangersimasut Kalaallit Nunaannut atuutilernissaannut missingiut pillugu tusarniaaneq

”Illersornissaqarfiup sulisui pillugit inatsisip allangorneranut inatsisit aalajangersimasut Kalaallit Nunaannut atuutilernissaannut peqqussut” missingiut pillugu tusarniaaneq, upernaakkut 2020 Inatsisartut ataatsimiinneranni suliarineqarnissaa siunertaralugu nassiunneqarpoq. 

 

Kunngip peqqussutaatut siunnersuummi uani illersornissaqarfiup sulisui pillugit inatsisit marluk allannguutissatut siunnersuuteqartut pineqarput, taakkulu inatsisinik allanngueqqingikkaluarluni atuutilersinneqassapput. Inatsisit allannguuteqartussat marluk tassaapput inatsit nr. 1539 decemberip 18-ani 2018-imeersoq aammalu inatsit nr. 328 martsip 30-ani 2019-imeersoq, taakkulu marluk peqqussusiortoqarnissamut pisinnaatitsipput. Allannguutissat taakku marluk Kalaallit Nunaannut aalajangersakkanut inatsisinut illersornissaqarfiup sulisuinut tunngasunut atuutereersunut tunngassuteqarput, taakkulu danskit inatsiaannik allannguisuunatik.

 

 

Allannguutit annertunerusut

 

illersornissaqarfiup sulisuinut tunngatillugu inatsit nr. 1539 decemberip 18-anit 2018-meersumik allannguineq

 

Inatsisissatut allannguutissami pineqarpoq aaqqissuussinerit sulisut ilungersunartunut aallartinneqarnerini utoqqalinersiassanut ajunngitsorsiassanullu tunngasut, taamatullu sulisut augustip 14-anni 1996 sioqqullugu aammalu ullormi tassani kingornatigulluunnit  aallartitaasimasunut aningaasanik taarsiiffigitinnissamut naligiissaarineq.

Illersornissaqarfiup sulisuinut inatsimmi allannguisoqannginnerani siornatigut sulisunut qimagaasunullu, suliaqartinneqartoq nunani allani suliartoqqusaanermi nalaani aqqunarsimappat ajunaarsimappalluunnit aningaasanik taarsiiffiginnittoqarsinnaavoq. Taassumattaaq saniatigut ilungersunartunik suliaqarsimanermi illersornissaqarfiup taarsiiffigisinnaanngisaanni ajunngitsorsiaqartitsisoqarsinnaavoq.

Aaqqissuussinerit marluk qulaani pineqartut tassaapput augustip 14-anni 1996 taasumaluunnit kingorna sulisut nunanut allanut suliartortinneqarnerminni aqqunarsimasunut atuupput. Aaqqissuussap atuutilinnginnerani siusinnerusukkut illersornissaqarfik avammut aallartitaqartarnikuuvoq, soorlu Cypernimut Balkanimullu, 2018-2023-mullu illersornissaqarfimmut isumaqatigiissuteqarnermi sulisunut naligiissumik aaqqissuussinissaq taamaalilluni augustip 14-anni 1996 sioqqullugu aqqunarsimasut assigiimmik pisinnaatitaaffeqaleqqullugit.

 

Illersornissaqarfiup sulisuinut tunngatillugu inatsit 328 martsip 30-anit 2019-meersumik allannguineq

 

Inatsimmi allannguutaasut tamakkiisumik illersornissamut aaqqissuussinermik aammali nikigasartartutut suliaqartinneqartunut tunngasuuvoq. Taassuma malitsigaa sorsunneqalissappat ajornartoortoqassappalluunnit nikigasurtillugit suliaqartinneqartartut pilersinnissaat suliaqartinneqarnissamullu ilinniartinneqarnissaat. Nikigasuartinneqarlutik suliaqartinneqartartut qaammatini arfineq pingasuni sakkutuujusussaatitaanermut ilinniarfimmi ilinniareersimasuussapput nikigasuartinneqarnissamullu qaavatigut ilinniartinneqartassallutik suliartortitaannginnerminni.

Ilutigaluguttaaq inatsisikkut tamakkiisumik illersornissaq nukittorsarneqarpoq, tassani qaammatini arfineq pingasuni sakkutuujusussaatitaanermik ilinniartitaanermik ingerlatsereersimasut nikigasuarsinnaanermut angerlartinneqareernermit ukiuni tallimani aggersarneqarsinnaanngorllugit.

 

Tusarniaanermut akissutit uunga nassiunneqassapput

 

Nunanut Allanut Naalakkersuisoqarfiup ataatsimut mailianut NAP@nanoq.gl assilinerilu uunga nassiullugit Nanna Nivi Pedersen (nanp@nanoq.gl) kingusinnerpaamik februarip 26-ni 2020.

Sammisaq:

Nunanut allanut tunngassuteqartut

Naalakkersuisoqarfik:

Nunanut Allanut Naalakkersuisoqarfik

Saqqummiunneqarfia:

11 februari 00:00:00

Tusarniaanermi piffissaliussaq:

26 februari 00:00:00

Tusarniaanermi akissutit uunga nassiuteqquneqarput:

NAP@nanoq.gl