Sumiiffiit kulturikkut oqaluttuarisaanermi pingaarutillit kulturikkut eriagisassanut suliat ingerlanneqartut sunniutaannik nalilersuisarneq pillugu Namminersorlutik Oqartussat nalunaarutaat nr. xx, xx. xxx 2020-meersoq

Siunnersuutip matuma saqqummiunneqarneranut tunuliaqutaavoq Eqqissisimatitsisarneq aamma allatigut kulturikkut eriagisassanik kulturikkut kingornussatut illersuineq pillugu Inatsisartut inatsisaannik allanngortitsineq pillugu Inatsisartut inatsisaat nr. 5, 12. juni 2019-imeersoq, ulloq 1. juli 2019 atortuulersoq.

Inatsimmi § 24 a, imm. 4 malillugu Naalakkersuisut ersarinnerusunik aalajangersagaliornissaannut piginnaatinneqarput, kulturikkut kingornussanut sunniutaasunik nalilersuisarnerit pillugit, kiisalu kulturikkut kingornussanut sunniutaasunut tunngatillugu nalunaarusiortarnerit taakkualu akuersissutigineqartarneri pillugit.

Siunnersuut imaqarpoq aalajangersakkanik kulturikkut kingornussanik nalilersuinermik suliaqartarnermi periaasissat pillugit, tamatumanissaaq nalilersuinermit nalunaarusiami pingaarnerutitanik naliliisarneq pillugu, nalunaarusiaq nammineq pillugu, kiisalu tusarniaaneq tamanullu saqqummiussisarneq.

Siunnersuummi siunertaavoq naammaginartunik sakkussanik atortussaqartitsinissaq sumiiffinni kulturikkut kingornussanik peqarfiusuni, eqqissisimatinneqartuni imaluunniit eqqissisimatinneqalernissaannik isumaliuteqarfiusuni, imaluunniit allatigut kulturikkut kingornussatut aaqqiivigineqarsimasuni, tamatumani aamma UNESCO -mi nunarsuarmiut kingornussaattut inissinneqarsimasuni imaluunniit nunarsuarmiut kingornussaattut ilanngunneqartussatut inassutigineqarsimasuni.

Nalunaarut siunnersuutigineqarpoq 1. august 2020 atortuulertussatut. Oqaaseqaataasinnaasut qinnutigineqassapput Ilinniartitaanermut, Kultureqarnermut Ilageeqarnermullu Naalakkersuisoqarfimmut tunniunneqareersimassasut kingusinnerpaamik ataasinngorneq 15. juni 2020.

Qinnuigissavassi oqaaseqaatit Naalakkersuisoqarfiup pisortatigoortumik e-mail adressianut nassiuteqqullugit, uunga: ikin@nanoq.gl, taamaanngippat

Naalakkersuisoqarfiup allakkanut adressianut nassiunneqarsinnaapputtaaq: Ilinniartitaanermut, Kultureqarnermut Ilageeqarnermullu Naalakkersuisoqarfik, Postbox 1029, 3900 Nuuk.

Sammisaq:

Kulturi

Tusarniaanerup suunera:

Nalunaarut

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

12 maaji 09:07:00

Tusarniaanermi piffissaliussaq:

15 juni 00:00:00

Tusarniaanermi akissutit uunga nassiuteqquneqarput:

ikin@nanoq.gl