Uunga siunnersuummik tusarniaanermut tunngasoq: Siusinaartumik pensionisiat pillugit Inatsisartut inatsisaata allanngortinneqarnera pillugu Inatsisartut inatsisaat nr. xx. xx. xxx-2020-meersoq

Isumaginninnermut Inatsisinillu Atuutsitsinermut Naalakkersuisoqarfik matumuuna uunga siunnersuummik nassiussivoq: Siusinaartumik pensionisiat pillugit Inatsisartut inatsisaata nr. Xx, xx. xxx 2020 allanngortinneqarnissaa pillugu pisortatigoortumik tusarniaassutigineqarnissaa.

Tusarniaanerup nassuiarneqarnera
Allannguutissatut siunnersuummi Siusinaartumik pensionisiat pillugit Inatsisartut inatsisaanni nr. 40, 9. december 2015-imeersumi, kingusinnerusukkullu allanngortinneqartumi, aalajangersakkat erseqqissaaffiginissaat siunertarineqarpoq, taamaalilluni Inatsisartut inatsisaat siunertaareersumut naapertuuttumik paasineqarniassammat.

Siusinaartumik pensionisiat pillugit Inatsisartut inatsisaata nr. 40, 9. december 2015-imeersup allanngortinnissaa pillugu siunnersuut manna §§ 8, 9, 19 aamma 39-imi aalajangersakkat allanngortinneqarnerannik imaqarpoq.

Kapitali 3-mi aalajangersakkat siunnersuuteqartoqarneratigut avinneqassapput, taamaalilluni § 8-mi paasiniaasarnerit pillugit malittarisassat pineqassallutik § 9-milu piginnaanngorsaqqinnerit pillugit malittarisassat pineqassallutik.

§ 19 siunnersuummi aalajangersakkami oqaasertaliunneqartut allanngortinneqarnissaanik imaqarpoq, taamaalilluni siusinaartumik sulisinnaajunnaarnersiutit tunniunneqartartut amerlanerpaartaannik tunineqarallarnissaq pineqarunnaarpoq, paarlattuanilli tapit siusinaartumik sulisinnaajunnaarnersiutillip massakkut aningaasarsiaasa aamma siusinaartumik sulisinnaajunnaarsiutilinnut tunniunneqartartut annertunerpaat akornanni nikingassummut naapertuuttut tunniunneqartalissammata.

Siunnersuut sulisinnaassutsimut naliliinernut naammagittaalliuutit kisimik Siusinaartumik sulisinnaajunnaarnersiutilinnut Naammagittaalliuuteqartarfimmiit suliarineqartussat taakkuinnaassasut § 39, imm. 2-mi erseqqissarneqarneranik aamma imaqarpoq. Inatsit naapertorlugu kommunalbestyrelsimit aalajangerneqartut allat § 39, imm. 1 naapertorlugu Isumaginninnermut Naammagittaalliuuteqartarfimmut naammagittaaliuutigineqarsinnaanerat allanngortinneqassanngitsoq siunnersuutaavoq. Taamaaliornikkut aalajangersagaq massakkut nassuiaatinut atuuttunut aamma § 10-mi siunertarineqartumut naapertuuttunngussaaq.

Tusarniaaneq pillugu nalinginnaasut
Siunnersuummut oqaaseqaataasinnaasut Isumaginninnermut Inatsisinillu Atuutsitsinermut Naalakkersuisoqarfimmut nassiunneqassapput ugguuna iian@nanoq.gl assilineralu uunga Uffe Jensen ufje@nanoq.gl.

Tusarniaanermut akissuteqarnissamut piffissaliunneqarpoq kingusinnerpaamik ulloq 15. maj 2020 nal. 16.

Allagaatit attuumassuteqartut
Ilanngussanut takussutissiaq malillugu tusarniaanermut allagaatit attuumassuteqartut ilanngunneqarput.

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Naalakkersuisoqarfik:

Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik

Saqqummiunneqarfia:

17 apriili 15:44:00

Tusarniaanermi piffissaliussaq:

15 maaji 16:00:00

Tusarniaanermi akissutit uunga nassiuteqquneqarput:

iian@nanoq.gl assilineralu uunga Uffe Jensen ufje@nanoq.gl