Gassit silaannarmik kissakkiartortitsisartut flourinik akullit pillugit nalunaarutip tusarniaassutigineqarnera

Pinngortitamut Avatangiisinullu Naalakkersuisoqarfiup matumuuna gassit silaannarmik kissakkiartortitsisartut flourinik akullit pillugit nalunaarusiassamut siunnersuut tusarniaassutigalugu nassiuppaa. Gassit silaannarmik kissakkiartortitsisartut flourinik akullit pillugit nalunaarutissamut nutaamut siunnersuummi Montreal-imi peqqussutip, ersarinnerusumik oqaatigalugu Kigali-mi tapiliussap qanittukkut akuerineqartup, 2036-p tungaanut gassinik silaannarmik kissakkiartortitsisartunik atuinermik annikillititsiartuaarnissamut tunngasup ilaata atuutsinneqalernissaa siunertarineqarpoq.

Nalunaarummi 1. januar 2021 aallarnerfigalugu gassinik silaannarmik kissakkiartortitsisartunik annertuumik atuinerup inerteqqutigineqalernissaa siunnersuutigineqarpoq. Inerteqquteqarneq taanna 31. december 2035 tikillugu atuutsitsinngiffiusumut ilaqartinneqassaaq, taannalu malillugu gassinik silaannarmik kissakkiartortitsisartunik siunertanut aalajangersimasunut atuisinnaaneq, taakkununngalu umiarsuarni silaannakkullu angallatini, atortuni pioreersuni aamma mikisuni suliaqartarnerit ilanngullugit ingerlaannarsinnaavoq.

Nalunaarutissamut siunnersuummi pissutsini immikkut ittuni inerteqquteqarnermik saneqqutsisinnaanermut akuersissuteqartoqarsinnaanera akuerineqarpoq, tassungalu akuutissanik naleqquttunik niuerfimmi soqannginnera imaluunniit isumannaallisaaneq aningaasartuutissallu annertuut peqqutaallutik immikkut ittumik akuersissuteqarnissap pisariaqarnera ilaatinneqarput.

Siunnersuut aamma suliffeqarfinnut, gassinik silaannarmik kissakkiartortitsisartunik taakkuninnga atuisunik atortulinnut piumasaqaatinik, taamatullu suliffeqarfinnut atortunik, gassinik silaannarmik kissakkiartortitsisartunik imalinnik ikkussuisunut, suliarinnittunut matusisunulluunniit piumasaqaatinik imaqarpoq.

Siunnersuutip ukioq 2021-miit gassinik silaannarmik kissakkiartortitsisartunik ajoqutaasunik aniatitsinermik annikillisitsereersinnaanissaa, kiisalu 2036-miit aniatitanik annikillititseqqinnissaa naatsorsuutigineqarpoq.

Tusarniaanermi killissarititaasoq
Tusarniaanermi akissuteqaat kingusinnerpaamik 12-03-2020-imi Pinngortitamut Avatangiisinullu Naalakkersuisoqarfimmut nassiuteqquneqarpoq. Tusarniaanermi akissuteqaatit Naalakkersuisoqarfiup pisortatigoortumik e-mail-adresseanut nassiunneqassapput: pan@nanoq.gl.

Sammisaq:

Avatangiisit

Tusarniaanerup suunera:

Nalunaarut

Saqqummiunneqarfia:

12 februari 13:07:00

Tusarniaanermi piffissaliussaq:

12 martsi 00:00:00

Tusarniaanermi akissutit uunga nassiuteqquneqarput:

pan@nanoq.gl