Ulluunerani paaqqinnittarfiit pilersinneqartarnerat tulluarsagaanerallu aamma suleqatigiinnik pilersitsisarneq pillugit nalunaarut

Meeqqanut suli atualinngitsunut tunngatillugu sulisunut Naalakkersuisut periusissanik iliuusissanullu pilersaarummik sulinerannut ilanngullugu Ilinniartitaanermut, Kultureqarnermut Ilageeqarnermullu Naalakkersuisoqarfik kommunit peqatigalugit Ulluunerani paaqqinnittarfiit pilersinneqartarnerat tulluarsagaanerallu aamma suleqatigiinnik pilersitsisarneq pillugit nalunaarutissatut siunnersuut ilanngunneqartoq suliaraat.

Nalunaarutissatut siunnersuut kommuninik 3. aamma 4. april 2019-imi taanna pillugu oqaloqateqartarsimanerit tunngavigalugit suliarineqarpoq. Tamatuma saniatigut nalunaarutissatut siunnersuut Ineqarnermut Attaveqaatinullu Naalakkersuisoqarfimmi misissorneqarpoq illuliornermut malittarisassanut naapertuuttuunissaata qulakkeerneqarnissaa siunertaralugu.

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaat nr. 16, 3 december 2012-imeersoq inatsisitigut tunngavigalugu nalunaarutissatut siunnersuut suliarineqarpoq. Inatsimmi § 12, imm. 2-mi atuarneqarsinnaavoq kommunalbestyrelsip nakkutissagaa ulluunerani paaqqinnittarfik sukkulluunniit inatsisit atuuttut malillugit aaqqissugaasimanissaa. Taamatuttaaq aalajangersakkami imm. 3-mi atuarneqarsinnaavoq Naalakkersuisut meeqqeriviit pilersinneri pisatsersornerilu pillugit malittarisassanik aalajangersaasinnaasut.

Tamakku saniatigut inatsimmi § 6, imm. 1-imi atuarneqarsinnaavoq meeqqat ataasiakkaat pillugit attaveqatigiit ataqatigiissakkamik suleqatigiinnissaat qularnaarumallugu, kommunalbestyrelsit pisariaqartitsineq naapertorlugu suleqatigiinnik pilersitsissapput, ingerlatsiveqarfiit ataasiakkaat akimorlugit meeqqat ataasiakkaat pillugit toqqaannartumik suliaqartunik inuttalikkanik. Taamatuttaaq § 6, imm. 3-mi aalajangersagaavoq Suleqatigiit pillugit Naalakkersuisut malittarisassanik aalajangersaasinnaapput.

Nalunaarutissatut siunnersuummiipput ilaatigut annertussutsinut pisatsersuinissamullu piumasaqaatit, assersuutigalugu ininut katersuuttarfinnut, qasuersaartarfinnut, immikkut suliaqarfinnut, igaffinnut, perusuersartarfinnut uffartarfinnut, errorsivinnut, sulisut atisaajartarfiinut il.il. Nalunaarutissatut siunnersuutikkut taamaakkaluartoq pissutsit sanaartorneq pillugu inatsimmut ilaasut malittarisassaqartitaassanngillat imaammammi illunut tunngatillugu malittarisassatigut pissutsit isumannaallisaanermut peqqinnissamullu tunngasut pillugit piumasaqaatinik minnerpaaffiusunik kiisalu tikikkuminartuunermut illuliornermi malittarisassani aalajangersagaqareermat.

Nalunaarutissatut siunnersuut allanneqarpoq pissutsit kommunalbestyrelsip ulluunerani paaqqinnittarfinnik pilersitsinermut pisatsersuinermullu (tulluarsaanermullu) taamatullu inatsimmi tunngaviusumi suleqatigiinnik taaneqartunik pilersitsinermut atatillugu sianiginiagassai taakkartorlugit.

Naggasiullugu oqaatigineqarsinnaavoq nalunaarut imarisamigut ulluunerani paaqqinnittarfinnik pilersitsineq, tulluarsaaneq, aqutsineq ingerlatsinerlu pillugit annertunerusutigut ilitsersuinermut attuumassuteqarmat. Taamaammat annertunerusutigut pineqarpoq periaasioreersunik inatsinngortitsineq, taamaammat nalunaarut taannaannaalluni kommuninut aningaasaqarnermut allaffissornermullu tunngatillugu annertuunik nammakkiinernik kinguneqarnaviarnani.

Oqaaseqaatigineqarsinnaasut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmit kingusinnerpaamik ulloq 26. marts 2020. tiguneqareersimassasut qinnutigineqarpoq. Oqaaseqaatit Naalakkersuisoqarfiup pisortatigoortumik mail-adresseanut uunga nassiuteqquneqarput: ikin@nanoq.gl, imaluunniit Naalakkersuisoqarfiup pisortatigoortumik allakkanut najugaqarfianut:

Ilinniartitaanermut, Kultureqarnermut, Ilageeqarnermullu Naalakkersuisoqarfik, Postboks 1029, 3900 Nuuk.

Sammisaq:

Ilinniartitaaneq

Tusarniaanerup suunera:

Nalunaarut

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

20 februari 10:26:00

Tusarniaanermi piffissaliussaq:

26 martsi 00:00:00

Tusarniaanermi akissutit uunga nassiuteqquneqarput:

ikin@nanoq.gl