Eqqakkat pillugit Namminersorlutik Oqartussat nalunaarutaat nr. XX XX 2020-imeersoq pillugu siunnersuut

Matumuuna Pinngortitamut Avatangiisinullu Naalakkersuisoqarfiup eqqakkat pillugu nalunaarutissatut siunnersuut tusarniaassutigalugu nassiuppaa.

Pinngortitamut Avatangiisinullu Naalakkesuisoqarfimmit inussiarnersumik qinnutigineqarpoq, tusarniaanermi akissuteqaat kingusinnerpaamik marlunngorneq ulloq 18. Februar 2020 nal. 16.00 nassiuteqqullugu. Tusarniaanermi akissuteqaat Naalakkersuisoqarfiup email-adresseanut tamanut atuuttumut nassiuteqquneqarpoq, tassaavorlu: pan@nanoq.gl.

Siunnersuut avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq, Inatsisartut inatsisaatigut nr. 1-ikkut, 29. maj 2012-imeersukkut aamma Inatsisartut inatsisaatigut nr. 10-kkut, 27. november 2018-imeersukkut allannguuteqartinneqartoq tunngavigalugu suliarineqarpoq.

Nalunaarummi ilaatigut uku pillugit maleruagassat aalajangersarneqarput:

  • Suliassaqarfimmi oqaatsit atorneqartut assigiissarneqarnissaat siunertaralugu taaguutit allattorsimaffiannik annertuumik atuutsitsisoqalerpoq.
  • Kommunini eqqakkanut pilersaarutinut maleruagassanik, kiisalu kommunit ataatsimoorlutik eqqakkanut ingerlatseqatigiiffiata eqqakkanut pilersaarusiorsinnaaneranik aalajangiisinnaaneranerat pillugu maleruagassat sukumiisut aalajangersarneqarput.
  • Mingutsitsisup akiliisarnissaanik tunngaveqarnerup atulersinneqarnissaanik nukittorsaanissaq siunertaralugu eqqakkanut akitsuutit naatsorsorneqartarnerinut tunngavissat aalajangersarneqarput.
  • Kommunalbestyrelsip illoqarfinni nunaqarfinnilu sumiiffinni tamanit atorneqartuni arsakoorfilersuinissaa piumasarineqarpoq.
  • Naalakkersuisut eqqagassanik ammasumik ikuallaasoqarsinnaaneranut killilikkamik immikkut akuersissuteqarsinnaanerat periarfissinneqarpoq.
Nalunaarut inuiaqatigiinnut kalaallinut tamanut, tassalu innuttaasuniit suliffeqarfinnut kommuninullu tunngatinneqarpoq.

Sammisaq:

Avatangiisit

Tusarniaanerup suunera:

Nalunaarut

Naalakkersuisoqarfik:

Pinngortitamut Avatangiisinullu Naalakkersuisoqarfik

Saqqummiunneqarfia:

21 januari 15:48:00

Tusarniaanermi piffissaliussaq:

18 februari 16:00:00

Tusarniaanermi akissutit uunga nassiuteqquneqarput:

pan@nanoq.gl