’Kangerlussuarmiit Kangerluarsuk Tullermut aqqusineq’

Sanaartugassaq ’Kangerlussuarmiit Kangerluarsuk Tullermut aqqusineq’ pillugu ASN-imut nassuiaatip (Avatangiisinut Sunniutissanik Naliliineq) tamanut ammasumik tusarniaassutigineqarnera.

Nassuiaat
Qeqqata Kommuniata Sisimiut aamma Kangerlussuup akornanni aqquserniornissani kissaatigaa. Kommunip Kangerlussuarmiit Kangerluarsuk Tullermut aqqusinissamut 130 km-inik isorartussuseqartussamut ASN-imut nassuiaat suliarisimalerpaa. Sisimiunut aqqusinissap sinnera 20 km-inik isorartussuseqartoq ASN-imut nassuiaammi immikkoortumi sammineqarluni suliarineqarpoq.

Aqquserniassaq inaarutaasoq ujaraaqqanik qallerneqarluni sinaakkutaa ilanngullugu 7 meterit missaannik silissuseqartinneqassaaq. Aqqusineq ujaraaqqanik qalligaq sinerlugu unittarfiit perusuersartarfiillu sananeqassapput. Kangerluarsuk Tullermi talittarfiliortoqassaaq, angallatit minnerit taliffigisinnaasaannik.

Innuttaasut ataatsimiinneri
Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq naapertorlugu Qeqqata Kommunia ASN-imut nassuiaat pillugu innuttaasunik ataatsimiititsissaaq. Ataatsimiititsinissamut sumiiffissaq piffissarlu pillugit kommuni najukkami tusagassiuutit aqqutigalugit allagarsiissaaq.

Tusarniaaneq
Kikkulluunniit suliamut soqutigisaqarsinnaasut tusarniaanermi akissuteqaqqullugit kajumissaarneqarput. Tusarniaaneq tamanut ammasuuvoq aammalu ullormit tamanut ammasumik saqqummiussiffiusumiit sapaatit akunnerini arfineq pingasuni ingerlassalluni. Tusarniaanermi akissuteqaatit tiguneqartut Naalakkersuisut nittartagaanni tusarniaanermut iserfissiamut ivertinneqassapput.

Tusarniaanermi najoqqutassat uunga tunngasuupput:

  • Kangerlussuarmiit Kangerluarsuk Tullermut aqqusineq, ASN-imut nassuiaat.
Tusarniaanermi piffissaliussaq: Pingasunngorneq martsi 11-ani 2020, nal: 16:00.

Tusarniaanermi akissuteqaatit uunga nassiunneqassapput:
Pinngortitamut Avatangiisinullu Naalakkersuisoqarfik,
Postboks 1614
3900 Nuuk

Sammisaq:

Avatangiisit

Tusarniaanerup suunera:

Avatangiisinik nalilersuinerit

Naalakkersuisoqarfik:

Pinngortitamut Avatangiisinullu Naalakkersuisoqarfik

Saqqummiunneqarfia:

15 januari 16:00:00

Tusarniaanermi piffissaliussaq:

11 martsi 16:00:00

Tusarniaanermi akissutit uunga nassiuteqquneqarput:

pan@nanoq.gl