Tusarniaaneq Tuttut aamma Umimmaat Aasaanerani aamma Ukiaanerani 2020

Matumuuna aasaanerani ukiaaneranilu 2020-imi piffissaliussat piniarfiusussat, tuttutassiissutit kiisalu umimmattassiissutit pillugit siunnersuutit tusarniutigineqalerput. Tuttut aamma umimmaat ukiup qanoq ilinera najoqqutaralugu pitsaanerpaamik piniarneqartarnissaat APNN-miit pingaartinneqarpoq. Taamaammat tuttut sapinngisamik aasaanerani ukiaaneranilu piniarneqartarnissaat aamma umimmaat aasaanerani, ukiaanerani kiisalu ukiuunerani piniarneqartarnissaat anguniarneqartarpoq.

Piniarfik 2-mi – Sisimiut-Kangerlussuaq – ukiuni arfineq-pingasuni kisitsisoqarnikuunani martsimi 2018-mi Pinngortitaleriffimmiit tuttunik umimmannillu pisortatigoortumik kisitsisoqarpoq. Piniarfik 3-mi – Akia-Maniitsoq – ukiuni qulingiluani kisitsisoqarnikuunani martsimi 2019-mi aamma taamatut kisitsisoqarpoq taamatullu Piniarfik 4-mi – Ameralik – ukiuni arfineq-marlunni kisitsisoqarnikuunani. Kisitsinerit tunngavigalugit Pinngortitaleriffimmiit nutaamik siunnersuisoqarpoq, taamaattorli Aasaanerani aamma Ukiaanerani 2019-mut sanilliullugu allannguutit annikitsuinnaat siunnersuutigineqarlutik.

Ivittuuni maajimi 2020-mi minnerpaaffiliinikkut umimmannik kisitsisoqarpoq tamannalu pillugu Ivittuuni pisassiissutit piniarnissamullu piffissaliussat nutaat tusarniutigineqarlutik.

Tuttut

1.       Piniarfik 2, 3, 4 aamma 5: Inuussutissarsiutigalugu tuttunniarneq 1. augusti-mi aallartissaaq 31. decembari ilanngullugu ingerlassalluni. Sunngiffimmi tuttunniarneq 1. august-mi aallartissaaq 31. oktobari ilanngullugu ingerlassalluni. Kulavaat norrallit piniaqqusaanngillat.

2.       Piniarfik 1, 6, 7, 8 aamma 11: Inuussutissarsiutigalugu tuttunniarneq 1. august-mi aallartissaaq 15 oktobari ilanngullugu ingerlassalluni. Sunngiffimmi tuttunniarneq 1. august-mi aallartissaaq 30. septembari ilanngullugu ingerlassalluni. Ivittuuni taamaallaat piffissami 1. august-miit 15 augusti ilanngullugu tuttunniartoqassaaq. Kulavaat norrallit piniaqqusaanngillat.

3.       Piniarfik 9 aamma 10 (Kangerluarsorujuk, Nuna Prudhoe aamma Nuna Inglefield): Inuussutissarsiutigalugu aamma sunngiffimmi tuttunniarneq 1. augustimi aallartissaaq 31. decembari ilanngullugu ingerlassalluni. Kulavaat norrallit piniaqqusaanngillat.

4.       Aqutsiveqarfik Ivittuut: Inuussutissarsiutigalugu aamma sunngiffimmi tuttunniarneq 1. august-miit 15. augusti ilanngullugu ingerlassaaq. Kulavaat norrallit piniaqqusaanngillat.

Tunngavilersuutit: Ivittuuni tuttunniarneq taamaallaat ulluni 15-ni ingerlassaaq pissutigalugu tuttunniarneq Ivittuuni umimmannut aamma assut akornusiisarmat.

Nuup aqutsiveqarfiani 2019-mi tuttunniarnissamut akuersissutit 3.152-it tunniunneqarput kisianni taamaallaat 442-it pisanik nalunaarutitalimmik utertinneqarlutik. Tamanna naammaginanngilluinnaqqissaarpoq tuttullu piniarfinni qanoq sakkortutigisumik piniarneqartarnerat qanorlu innerat APNN-mut Pinngortitaleriffimmullu nalileruminaappoq. Pisanik nalunaaruteqarneq inatsisit malillugit pisussaassutaammat Inatsisit sukaternissaat APNN-mi sulissutigineqarpoq.

Erseqqissaatigineqarpoq kommunimiit tuttunniarnissamut akuersissutit marlukkaarlugit (aqutsiveqarfinnut marlunnut) tunniunneqartassasut tamannalu inuussutissarsiutigalugu

(akuersissummut ataatsimut tuttut qulit) aamma sunngiffimmi piniartunut (akuersissummut ataatsimut tuttut tallimat) atuuppoq. Akuersissummik pisanik naammaginartumik immersorneqartumik utertitsinikkut aatsaat akuersissummik nutaamik qinnuteqartoqarsinnaavoq. APNN-ip kommunit qanimut suleqatigalugit akuersissutinik utertitsisarneq malinnaaffigivaa. Pisanut nalunaarutit utertinneqartannginnerat akuersissummik qinnuteqaqqissinnaannginnermik kinguneqarsinnaavoq, takujuk §§ 19-20 aamma § 25 tuttunniarneq pillugu nalunaarummi aamma §§ 20-21 aamma § 26 umimmanniarneq pillugu nalunaarummi. Ajornerpaamik pisoqarneratigut piniarsinnaanermut allagartamik piffissami aalajangersimasumi arsaagaasoqarsinnaalluni.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniarnermilu atornissaat inerteqqutaammata.

Umimmaat

5.       Aqutsiveqarfik Maniitsoq: Piniarfik 1-mi, 3-mi aamma 4-mi inuussutissarsiutigalugu aamma sunngiffimmi umimmanniarneq 15. augustimi aallartissaaq 15. oktobari ilanngullugu ingerlassalluni. Tiggaat tammajuitsussanik piniartitsinermut pisassiissutaasut aamma kulavaat norrallit piniaqqusaanngillat.

6.       Aqutsiveqarfik Sisimiut: Inuussutissarsiutigalugu aamma sunngiffimmi killilimmik umimmanniarneq 1. augustimi aallartissaaq 15. oktobari ilanngullugu ingerlassalluni umimmattassiissutillu 400-iupput. Tiggaat tammajuitsussanik piniartitsinermut pisassiissutaasut aamma kulavaat norrallit piniaqqusaanngillat.

7.       Umimmaqarfik Naternaq: Inuussutissarsiutigalugu aamma sunngiffimmi umimmanniarneq 1. august-mi aallartissaaq 15. oktobari ilanngullugu ingerlassalluni umimmattassiissutillu 120-iullutik. Ussuit Nunaat, Ipiutaarsuup Nunaa aamma Eqalummiut Nunaat umimmaqarfimmut Naternamut ilanngunneqarsimapput. Tiggaat tammajuitsussanik piniartitsinermut pisassiissutaasut aamma kulavaat norrallit piniaqqusaanngillat.

8.       Aqutsiveqarfik Qaanaaq: Piniarfimmi Kap Atholl-mi inuussutissarsiutigalugu sunngiffimmilu umimmanniarnissamut umimmattassiissutit 40-ruupput.

Kap Atholl-mi umimmaat piniarfiup avataanut siaruaassimapput tamannalu pillugu piniarfiup allineqarnissaa Pituffimmi oqartussat piniartullu suleqatigalugit APNN-miit sulissutigineqarpoq. Piniarfimmi Nuna Inglefield aamma Nuna Prudhoe-mi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 60-iupput. Tiggaat tammajuitsussanik piniartitsinermut pisassiissutaasut aamma kulavaat norrallit piniaqqusaanngillat.

9.       Aqutsiveqarfik Ivittuut: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. augusti ilanngullugu ingerlassalluni. Minnerpaaffiliinikkut kisitsineq maajimi 2020-mi ingerlanneqartoq tunngavigalugu umimmattassiissutit 22-iupput taakkulu tamarmik 1-2-ukiullit. Tiggaat tammajuitsussanik piniartitsinermut  pisassiissutaasut aamma kulavaat norrallit piniaqqusaanngillat.

10.     Aqutsiveqarfik Sigguk: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni. Umimmattassiissutit allannguuteqaratik 150-iupput. Tiggaat tammajuitsussanik piniartitsinermut pisassiissutaasut aamma kulavaat norrallit piniaqqusaanngillat.

11.     Aqutsiveqarfik Ittoqqortoormiit: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni aammalu 10. novembarimiit 10. decembari ilanngullugu. Umimmattassiissutit allannguuteqaratik 115-iupput. Tiggaat tammajuitsussanik piniartitsinermut pisassiissutaasut aamma kulavaat norrallit piniaqqusaanngillat.

Tunngavilersuutit: Aqutsiveqarfimmi Maniitsumi umimmanniarneq Biologit siunnersuinerat malillugu aatsaat 15. august-mi aallartissaaq umimmaat nuliunerat sioqqullugu kulavaat timikkut pitsaanerpaamik inissisimanissaat pissutigalugu, imm. 5 takuuk, taamaaliornikkut agguaqatigiissillugu amerlanerusunik norrisinnaanissaat anguniarlugu. Qaanaap aqutsiveqarfiani Kangaarsummi (Kap Atholl) 2015-mi minnerpaaffiliinikkut kisitsereernerup kingorna inuussutissarsiutigalugu aamma sunngiffimmi umimmanniarnissamut pisassiissutit allannguuteqaratik 40-put, imm. 8 takuuk. Siggummi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 150-iupput, 2016-mi tusarniaareernerup kingorna aalajangerneqartutut, kisianni piniarfimmi minnerpaaffiliinikkut kisitsisoqaqqinn-ginnerani qaffanneqaqqissanngillat, imm. 10 takuuk.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat umimmannik malersuinermi piniarnermilu atornissaat inerteqqutaammata. Qamuteralaat, ATV-t kiisalu qulimiguullit atorlugit umimmannik ungoorinissaq immikkut APNN-imut qinnutigineqarsinnaavoq.

Piniarnermut allagartap 2020-mi 1. maaji sioqqullugu akilereersimanissaa pillugu piumasaqaat inuussutissarsiutigalugu aamma sunngiffimmi piniartunut atuutinneqarpoq.

Sunngiffimmi piniarnermut akuersissutit inunnut ukiut kingulliit qulit iluanni ataavartumik ukiuni marlunni Kalaallit Nunaanni najugalittut inuit nalunaarsorsimaffiannut nalunaar-neqarsimasunut taamaallaat tunniunneqarsinnaanerat pillugu piumasaqaat atuuppoq.

Tusarniaanermut akissuteqaatit kingusinnerpaamik juunip 26-iani 2020-mi APNN-mut uunga apnn@nanoq.gl aamma numl@nanoq.gl nassiunneqassapput, akissuteqanngikkaannilu tusarniaanermik akuerinninnertut isigineqassaaq.

Sammisaq:

Piniarneq

Tusarniaanerup suunera:

Nalunaarut

Saqqummiunneqarfia:

02 juni 00:00:00

Tusarniaanermi piffissaliussaq:

26 juni 00:00:00

Tusarniaanermi akissutit uunga nassiuteqquneqarput:

numl@nanoq.gl