Uunga siunnersuutip tusarniaassutigineqarnera: Inuit innarluutillit tapersersorneqarnissaat pillugu Namminersorlutik Oqartussat nalunaarutaat nr. xx, xx. xxx 2020-meersoq.

Inuit innarluutillit tapersersorneqarnissaannut Inatsisartut inatsisaata nr. 13, 12. juni 2019-imeersumi aalajangersakkat arlallit aqqutigalugit Naalakkersuisut maleruagassiortussaatinneqarput maleruagassiorsinnaatinneqarlutillu.

Taamaattumik Isumaginninnermut, Inatsisinillu Atuutsitsinermut Naalakkersuisoqarfik pisinnaatinneqarluni siunnersuummi matumani pineqartumi suliaqarsimavoq: Inuit innarluutillit tapersersorneqarnissaat nr. xx af xx. xxx 2020-meersoq pillugu Namminersorlutik Oqartussat nalunaarutaat

Siunnersuut inummik ulluinnarni inummut innarluutilimmut nammineq najukkaminiittumut aammalu tapersersorneqarnissamik isumassorneqarnissamillu aningaasaliiffigineqarsimasumut ullormut isumassuisussamik kommunip atorfinitsitsinerani atugassarititaasussat piumasaqaataasussallu pillugit aalajangersakkanik imaqarpoq, tak. siunnersuummi § 6.

Aammattaaq siunnersuut inummut innarluutilimmut oqilisaassinissaq pillugu aalajangersakkanik imaqarpoq, tamatumunnga ilanngullugit pilersuinissamut isumaqatigiissusiornerit akiliuteqartarnerlu, kiisalu oqilisaassilluni najugaqartitsinermi akissarsiaqartitsisarnissaq pillugit malittarisassanik imaqarluni, tak.siunnersuummi §7 aamma §8.

Tamatuma saniatigut Inuit innarluutillit tapersersorneqarnissaannut Namminersorlutik Oqartussat nalunaarutaanni nr. 18-imi, 4. november 2019-imeersumut maannakkut atuuttumut maleruagassanut atuuttunut sanilliullugu allannguuteqartinneqanngilaq.

Siunnersuutip malitsigisaanik kommune aningaasartuuteqarnerulissagaluarpat, Inatsisartut inatsisaani aalajangersakkat nalunaarusiornikkut piviusunngortitsinissaannut sillimmatinut Namminersorlutik Oqartussat immikkoortinnikuusaannut ilaatinneqassaaq.

Siunnersuummut nassiunneqartumut oqaaseqaataasinnaasut Isumaginninnermut Inatsisinillu Atuutsitsinermut Naalakkersuisoqarfimmit kingusinnerpaamik ulloq 29. maaji 2020-mi tiguneqareernissaat qinnutigineqarpoq.

Tusarniaanermut akissut e-mailikkut iian@nanoq.gl.-imut imaluunniit allakkatigut uunga nassiunneqassaaq: Isumaginninnermut Inatsisinillu Atuutsitsinermut Naalakkersuisoqarfik, Postboks 260, 3900 Nuuk

Sammisaq:

Inunnik isumaginninneq

Tusarniaanerup suunera:

Nalunaarut

Naalakkersuisoqarfik:

Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfik

Saqqummiunneqarfia:

01 maaji 11:14:00

Tusarniaanermi piffissaliussaq:

29 maaji 00:00:00

Tusarniaanermi akissutit uunga nassiuteqquneqarput:

iian@nanoq.gl