Plastikkinik atuinerup annikillisarnissaanut suliniutissanut pilersaarusiassamut missingiutip tusarniaassutigineqarnera

Plastikkinik atuinermik, taamaalillunilu plastikkit eqqagassat plastikkinillu mingutsitsinerup ajornartorsiutaanerinik qanoq ililluni killilersuisoqarsinnaanerata aallunneqarnissaa Naalakkersuisunit kissaatigineqarpoq. Naalakkersuisut plastikkinik atuinerup annikillititsiniarlutik suliniutissanut pilersaarutaat ”Pinngortitami plastikkit ikinnerusut” maanna tusarniaassutigineqarluni nassiunneqarpoq.

 

Pilersaarut suliniutissanut siunnersuutinik arlalinnik, ukiualunnguit ingerlanerini naammassiniarneqartussanik imaqarpoq. Suliniutissat aalajangersimasunik iliuuseqarnissamut innersuussutitalerlugit, aammalu aningaasaqarnermut avatangiisinullu kingunerisassanik pingaarnernik naliliiffigineqarlutik allaaserineqarput.

Kalaallit Nunaanni plastikkit ajornartorsiutaanerinut nalunaarsukkat aamma FN-imi Nunarsuarmi Anguniagassat aallaavigineqarput. Tamatuma saniatigut suliniutissanut pilersaarummi EU-mi anguniagassat annertussusii, taamaalillunilu pilersaarummi suliniutissatut siunnersuutigineqartut suliniutissanut, EU-mi ingerlanneqartussatut naatsorsuutigineqartunut naapertuunnersut misissuiffigineqarput. Tamatuma saniatigut suliniutissat Naalakkersuisut eqqagassalerinermut pilersaarutaannut naapertuupput.

 

Suliniutissanut pilersaarut aallutassani arfiniliusuni anguniagaqarfissatut suliniuteqarfissatullu siunnersuutinik imaqarpoq:

 

  1. Puussiat pisiniarfiliartaatit/puussiat plastikkit

  2. Anartarfinnut puussiat

  3. Atortut plastikkit ataasiaannarluni atugassat

  4. Mikroplastit

  5. Plastikkit, aalisarnermik inuussutissarsiuteqartunit atorneqartut

  6. Paasititsiniaanerit

 

Suliniutissatut pilersaarutit suli Naalakkersuisunit politikkikkut akuerineqanngillat.

Sammisaq:

Avatangiisit

Tusarniaanerup suunera:

Nalunaajaatit-Nalunaarusiat

Saqqummiunneqarfia:

10 juni 15:26:00

Tusarniaanermi piffissaliussaq:

26 aggusti 00:00:00

Tusarniaanermi akissutit uunga nassiuteqquneqarput:

pan@nanoq.gl