Pisortat Digitalinngorsaanermik Aqutsisoqatigiivisa suliassatut allassimaffiat - PDA

PDA sunaava?
Pisortani ataatsimut digitalimik ineriartortitsinissaq maanna kommunit Namminersorlutillu Oqartussat suliaqarfigereersimalerpaat. Digitalillu ineriartortinneqarneranut tunngatillugu ataatsimoorussamik pilersitsiviuvoq taaneqartumik Pisortat Digitalinngorsaanermik Aqutsisoqatigiivi - PDA.

PDA kommuninit, tassa nalinginnaasumik kommunaldirektørinik, aamma Namminersorlutik Oqartussani Aningaasaqarnermut Naalakkersuisoqarfimmi pisortamik, Peqqissutsimut aamma Ilisimatusarnermut Naalakkersuisoqarfimmi pisortamik kiisalu Ilinniartitaanermut, Kultureqarnermut, Ilageeqarnermut Ilisimatusarnermullu Naalakkersuisoqarfimmi pisortamik inuttaqartinneqarpoq. Digitalimik Sullissinermut Aqutsisoqarfik aqutsisoqatigiinnut allatseqarfiuvoq.

Aningaasanut inatsimmut konto 40.98.02-mit aningaasaliissutit atorlugit nuna tamakkerlugu digitalinngorsaanermut periusissiami PDA suliniutinik suliakkiisinnaavoq.

Tusarniaanermut tunuliaqutaasoq
PDA-p sinaakkutai 2019-imi misissuataarneqarput, 2011-mi aggustip qaammataani suliassatut allassimaffik 2018-imilu septembarip qaammataani suleriaasissaq misissuataarneqarluni. Taamaattumik PDA-mi suliassatut allassimaffiit nutaat, suleriaasissaq nutaaq malittarisassallu nutaat ilusilersorneqarput. Taakku 2019-imi septembarip qaammataani PDA-mit akuersissutigineqarput.
PDA pisortat digitalinngorsaanermik aqutsisoqatigiiffigimmagu suliassatut allassimaffik kommuninut tamanut tusarniaassutigineqarpoq.

Tusarniaanermi atortorineqartut
PDA-mi sinaakkutissat nutaat naapertorlugit periusissiami suliniutit sivisunerpaamik ukiuni sisamani utertitsilluni akiliinissamut naatsorsuuteqarnertalimmik peqqinnartumik suliassaqartussaasoq, soorlu Aningaasanut inatsisissami tamanna allaaserineqartoq (allaaserisamut uunga ilanngussaq 1 takuuk), immikkut ukkatarineqarpoq. Aammattaaq suliniuteqarnerni ingerlatsinermut aningaasaqarneq ingerlatsinermullu ikaarsaarneq immikkorluinnaq isummerfigineqassasoq ukkatarineqarpoq. Tamatumunnga peqatigitillugu konto 40.98.02-mit aningaasaliissutini sinaakkutit nutaat paasiuminartuulersitsissapput.

Tusarniaassutigineqartoq tassaavoq:

  • Pisortat Digitalinngorsaanermik Aqutsisoqatigiivisa suliassatut allassimaffiat nutaaq
Tamatuma saniatigut nassiunneqartut ukuupput:
  • Suleriaasissaq malittarisassallu: ilisimatitsissutitut
  • Malittarisassani ilanngussaq A: oqaaseqaateqarfigeqquneqarpoq
  • Innersuussutitut sinaakkutigineqartoq: suliassatut allassimaffik suleriaasissarlu atuuttut (dansk-isuinnaq allaqqapput)
Tusarniaanermut akissuteqaatit uunga nassiunneqassapput digitalisering@nanoq.gl Digitalimillu Sullissinermut Aqutsisoqarfimmi tigoreerneqarsimassallutik kingusinnerpaamik 26. februar 2020.

Ilanngussaq 1
Pingaarnertut kontup 40.98.02-p siunertaa, naleqq. Aningaasanut inatsit – tamakkiisumik allanneqarnera:
‘Konto pingaarnermi matumani Naalakkersuisut nuna tamakkerlugu Digitaliseeriinermut periusissaata atuutsinneqalernissaanut aningaasanik immikkoortitsisoqarpoq. Aningaasaliissutitigut aningaasatigut killiliussat iluini siunnerfilimmik anguniakkat amerlanerpaat naammassineqarnissaat pingaarnerutinneqarpoq. Periusissap sammisartai arfinillit suliniutinik arlalinnik pisariaqartumik ineriartortitsinermut tapertaasinnaasunik imaqarput, taakkulu ulluinnarni digitalikkut annertunerusumik nunamut ineriartuutaasinnaapput. Tamatuma saniatigut periusissap siunertarivaa suleqatigiinnerunermik pilersitsinissaq tamannalu aqqutigalugu nunatsinni pisortat ingerlataannik pisariillisaaneq. Kiisalu innuttaasup digitalikkut aamma ilinniartitaanikkut annertunerusumik isiginiarneqarnera, innuttaasut aqqutigalugit malunnaatilimmik kinguneqassaaq, taakkumi internetikkut periarfissanik amerlasuunik unamminarsinnaasunillu atuinissaminnut piareersimanerulersimassapput. Periusissaq suliniutinik nutaanik arlalinnik imaqarpoq, ineriartornermut pisariaqartumut nunamik ataatsimuulersitsisinnaasumut tapertassanik kiisalu tamanut siuariartuutaasumik atugarissaarnerulersitsisumillu nunarsuarmiooqataasutut inuiaqatigiinnik ineriartortitseqataaffiusinnaasunik.

Periusissami suliniutit sammisanut arfinilinnut makkununnga agguarsimapput:

- Innuttaasoq digitalikkut piareersimasoq
- Digitalikkut pitsaassuseq kiisalu it-isumannaatsoq
- Digitalikkut atuarfik
- Niuerfiit aamma periarfissat nutaat
- Ataatsimoorussineq aamma pisortat ataatsimoortumik suleqatigiinnerat
- Peqqissutsimik aamma digitalikkut atortunik qitiutitsineq

Suliniutit piffissaq ungasinnerusoq eqqarsaatigalugu malunnaatilinnik angusaqarfiussapput imminnullu aningaasalersortuussallutik.

Periusissami suliniutaasut piviusunngortinnissaannut tulleriiaarnissaannullu sulineq ilaatigut Pisortat Ataatsimoorlutik IT-qarnikkut Aqutsisoqatigiivi (FOIS) aamma naalakkersuisoqarfiit pisortaqatigiivi suleqateqatigalugit ingerlanneqarpoq. Siuariartortoqarnera pillugu ukiumoortumik nalunaarusiamik Naalakkersuisunut aamma Aningaasaqarnermut Akileraartarnermullu Naalakkersuisoqarfimmut tunniussisoqartassaaq.

Aalajangiisarnerup ilusaa periusissami aalajangersarneqarpoq, taamatullu aamma assersuutigalugu pisortat ataatsimut pilersaarutaannut ilusiliussamik atuinissap aningaasaliiffigineqarnissamut pisortatigut piumasaqaataanissaanut kiisalu sivisunerpaamik ukiuni sisamani utertillugit akileereersimanissaanik naatsorsuuteqarnermut uppernarsaasiisarluni niuernikkut tunngavissanik nalilersuilluartarnissamik arlalinnik aalajangersaasoqarluni.
Digitaliseeriinermut Aqutsisoqarfik suliaqarfinnik aqutsinermut allattoqarfiuvoq ilaatigullu periusissamik piviusunngortitsinissamut akisussaasuulluni.

AIS2020-p pingajussaaneerneqarnerani aningaasaliissutit 2020-mi 3.289.000 kr.-nik ilanngarneqarput. Ilanngaaneq 'Ilanngaassivik'-up inerisarnissaanut aningaasaliissutinik aningaasanut atunngitsuukkanut tunngassuteqarpoq. Aningaasat kontumut pingaarnermut 82.24.01 Akileraartarnermut Aqutsisoqarfimmi allaffissornermi atortorissaarutit il.il.-mut nuunneqarput taamalu Akiliisarfik Ilanngaassivik pillugu Inatsisartut inatsisaat nr. 30, 28. november 2019-imeersoq(UKA2019/19) akuerineqareerpat Ilanngaassivimmik suliniutip inerisarlugu naammassisarneqarnera isumagineqarumaarpoq.’

Sammisaq:

Digitalinngortitsineq

Saqqummiunneqarfia:

04 februari 11:10:00

Tusarniaanermi piffissaliussaq:

26 februari 11:10:00

Tusarniaanermi akissutit uunga nassiuteqquneqarput:

digitalisering@nanoq.gl