Qaffasinnerusumik ilinniaqqiffiusuni misilitsittarneq censoreqartarnerlu pillugit Namminersorlutik Oqartussat nalunaarutaannut siunnersuutip tusarniaassutigineqarnera

Qaffasinnerusumik ilinniaqqiffiusuni misilitsittarneq censoreqartarnerlu pillugit nalunaarutissatut siunnersuutip tusarniutigineqarnera ilanngullugu nassiunneqarpoq.

Siunnersuutip saqqummiunneqarneranut tunngavigineqarpoq, Qaffasinnerusumik ilinniartitaanerit pillugit Inatsisartut inatsisaat nr. 14 12. juni 2019-imeersup akuersissutigineqarnera, taanna atuutilerpoq ulloq 1. august 2019.

Inatsimmi § 17-imi, imm. 5-imi aalajangersarneqarpoq, Naalakkersuisut ilinniarnermik aaqqissuussineq pillugu malittarisassanik aalajangersaasinnaasut, tamatumunnga ilanngullugit censoreqartarneq aamma misilitsittarneq, kiisalu ilinniarnerup sivisunerpaaffissaa pillugit malittarisassat.

Nalunaarutip Ilisimatusarfimmi ilinniagaqarnerit soraarummeertarnerillu pillugit Namminersornerullutik Oqartussat nalunaarutaat nr. 27, 1. september 1995-imeersoq, Ilisimatusarfimmi nalileeqataasoqartarnissaa pillugu Namminersornerullutik Oqartussat nalunaarutaat nr. 6, 2. januar 1990-imeersoq aamma Ilinniarfissuarmi il.il. ilinniaqqinneq pillugu Namminersornerullutik Oqartussat nalunaarutaat nr. 23, ulloq 8. juli 1991-imeersoq taarsissavai. Taamaammat tamatuma ilutigisaanik nalunaarutit taakku pingasut atorunnaarsinneqassasut siunnersuutigineqarpoq.

Nalunaarutit taakku eqqaaneqartut ataatsimut isigalugit arlalitsigut pisoqalisimapput, aamma pissutsit arlallit ilinniarnerit aamma misilitsittarnerit pillugu nalunaarummi atuarneqarsinnaasut massakkut qaffasinnerusumik ilinniartitaanerit pillugit inatsimmi naleqqussarneqarput. Tamatuma saniatigut misilitsittarneq aamma censoreqartarneq pillugit malittarisassat siunissami qaffasinnerusumik ilinniartitaanernut tamanut atuutissapput taamaasillunilu manna tikillugu taamaallaat Ilisimatusarfimmi ilinniarnernut attuunnatik.

Nalunaarummut atuuttumut atatillugu siunnersuummi pingaarnertut allannguut tassaavoq, misilitsinnerit amerlassusaasa allanngornerat. Ilinniartoq misilitsinnermi nalilersuinermiluunniit allami angusinissaminut suli pingasoriarluni misiliisinnaavoq, kisianni aalajangersagaq allanngortinneqarpoq imaalillugu, misilitsinnermik misileeqqinnissamut killilersuisumik aalajangersaasoqanngilaq, Ilinniarfik pisuni immikkut ittuni misileeqqinnissamut akuersisinnaammat.

Tamatuma saniatigut misilitsinnissamut nalunaaruteqartarneq pillugu aalajangersagaq allanngortinneqarpoq. Aalajangersagaq allanngortinneqarpoq imaalillugu, ilinniartoq ilinniartitsissummut ataatsimut misilitsiffiusussamut nalunaarsorsimaguni misilitsinnissamut ingerlaannartumik nalunaarsorneqartassaaq aamma misilitsittussatut nalunaarsorsimajunnaartoqarsinnaanngilaq.

Siunnersuut Ilisimatusarfimmut tusarniaassutigineqarsimavoq, oqaaseqaataasalu annertunersaat massakkut siunnersuutaasumut ilanngunneqarnikuupput. Aammattaaq tusarniaanerup kingorna siunnersuummi inatsisitigut oqaaseqaatit ilanngunneqarput.

Nalunaarutip 1. november 2020-mi atuuttussanngortinneqarnissaa siunnersuutigineqarpoq.

Oqaaseqaatigineqarsinnaasut Ilinniartitaanermut, Kultureqarnermut, Ilageeqarnermullu Naalakkersuisoqarfimmi kingusinnerpaamik ulloq 28. august 2020 tiguneqareersimassasut qinnutigineqarpoq.

Oqaaseqaatit Naalakkersuisoqarfiup pisortatigoortumik mail-adresseanut uunga nassiuteqquneqarput: ikin@nanoq.gl imaluunniit Naalakkersuisoqarfiup pisortatigoortumik najugaqarfianut:
Ilinniartitaanermut, Kultureqarnermut, Ilageeqarnermullu Naalakkersuisoqarfik, Postbox 1029, 3900 Nuuk.

Sammisaq:

Ilinniartitaaneq

Tusarniaanerup suunera:

Nalunaarut

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

10 juli 00:00:00

Tusarniaanermi piffissaliussaq:

28 aggusti 00:00:00

Tusarniaanermi akissutit uunga nassiuteqquneqarput:

ikin@nanoq.gl