Uunga siunnersuutip tusarniutigineqarnera: Inuit Pisinnaatitaaffii pillugit Kommissioni pillugu Inatsisartut inatsisaat nr. xx, uu. qqqq 20yy-meersoq

Peqqissutsimut Naalakkersuisoqarfiup uunga siunnersuut: Inuit Pisinnaatitaaffii pillugit Kommissioni pillugu Inatsisartut inatsisaat nr. xx, uu. qqqq 20yy-meersoq pisortatigoortumik tusarniutigalugu matumuuna nassiuppaa.

Tunuliaqut
Kalaallit Nunaanni sullissiviit arlallit inuit pisinnaatitaaffii pillugit suliassaqarfimmi suliassanik assigiinngitsunik ullumikkut isumagisaqarput.

Inuit Pisinnaatitaaffii pillugit Siunnersuisoqatigiit saniatigut innuttaasut pisinnaatitaaffii siuarsaaffiginiarlugit illersorniarlugillu Meeqqat pisinnaatitaaffiinik sullissivik, Innarluutillit Illersuisuat, Naligiissitaanermut Siunnersuisoqatigiit aamma Utoqqaat Illersuisuat pingaarutilinnik suliaqartarput.

Taama amerlatigisunik mikisunik allaffeqarfeqarnikkut nukiit tulluarnerpaamik tamatigut atorneqarneq ajorput, tamannalu aqqutigalugu suliatigut nukittuujunissaq kissaatigineqartoq anguneqarneq ajorluni.

Naalakkersuisut taamaattumik siunnersuutigaat sullissiviit taaneqartut ataatsimut inuit pisinnaatitaaffiinik sullissivimmik arlaannaannulluunniit pituttorsimanngitsumut katersorneqassasut Kalaallit Nunaanni inuit pisinnaatitaaffiisa siuarsarneqarnerannik illersorneqarnerannillu arlaannaannulluunniit pituttorsimanngitsumik sulinerup nukittorsarneqarnissaa pingaarnertut anguniagaralugu.

Suliassat kommissionimi ataatsimi katersorneqarnerisigut iluaqutissarsiassat arlaqarsinnaapput, taakkununnga ilanngullugit:

- pisinnaatitaaffiit assigiinngitsut illersorneqarnerat pillugu ulluinnarni suleqatigiinneq,
- ataatsimoortumik allaffeqarfeqarnikkut suliassat assiginngitsut naammassisaqarfiunerusalernerat,
- assersuutigalugu siunnersortinut avataaneersunut ingerlatsinermullu aningaasartuutit killilerneqarnerat, suliassanullu allanut aningaasanik atugassaqalerluni,
- pisinnaatitaaffeqarfiit akornanni sulinissamut periarfissat pitsaanerusut,
- assigiinngisitsinernut suugaluartunulluunniit tamatigoornerusumik illersorneqarneq, aamma
- aaqqissuussaaneq ataatsimoortoq akuersaarneqarsinnaanerusoq sunniuteqarnerusinnaasorlu.
Ullumikkut illersuisuusut pingasut imaaliallaannaq kommissionimut ilaasortatut ingerlaannarsinnaassapput, soorlu aamma Naligiissitaanermut Siunnersuisoqatigiit aamma Inuit Pisinnaatitaaffii pillugit Siunnersuisoqatigiit siulittaasui kommissionimut ilaasortatut ingerlaannarsinnaassasut.

Tusarniaaneq ataatsimut isigalugu


Siunnersuummut nassiunneqartumut oqaaseqaataajunnartut nassiunneqaqquneqarput kingusinnerpaamik ulloq 1. februar 2021 Peqqissutsimut Naalakkersuisoqarfimmit tiguneqareersimasussanngorlugit.

Tusarniaarnermut akissutit Peqqissutsimut Naalakkersuisoqarfimmut e-mailikkut pn@nanoq.gl-imut allakkatigulluunniit Peqqissutsimut Naalakkersuisoqarfik, Postboks 1160, 3900 Nuuk-mut nassiunneqassapput.

Sammisaq:

Inuit pisinnaatitaaffii

Tusarniaanerup suunera:

Inatsisartut inatsisaat

Naalakkersuisoqarfik:

Peqqissutsimut Naalakkersuisoqarfik

Saqqummiunneqarfia:

18 decembari 15:36:00

Tusarniaanermi piffissaliussaq:

01 februari 00:00:00

Tusarniaanermi akissutit uunga nassiuteqquneqarput:

pn@nanoq.gl