2021-imut qilalukkanut qaqortanut qernertanullu pisassiissutit pillugit tusarniut

Matumuuna 2021-imut qilalukkanut qaqortanut qernertanullu pisassiissutit pillugit tusarniutnassiunneqarpoq.

 

APNN 2020-mi qilalukkanik qaqortanik qernertanillu aqutsinermut atatillugu ilaatigut iluarsiissuteqarpoq, Covid-19-imilli pissuteqartumik ataatsimiinnerit 2021-imut kinguartinnerat pissutigalugu, 2020-mut sanilliullugu pisassiissutit pillugit pilersaarut allanngortinneqanngilaq.

 

Inatsisitigut tunngavigisat

Piniarneq aallaaniarnerlu pillugit Inatsisartut inatsisaat nr. 12, 29. oktober 1999-imeersoq tassaavoq inatsisitigut pingaarnersaq, piniagassallu aqunneqarnerata nalunaarutaannullu tunngavik.  Nalunaarut pineqartoq tassaavoq qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 3, 27. januar 2017-imeersoq.

 

Pisassiissutit aalajangersarneqarnerani nunat tamalaat akornanni isumaqatigiissutit, uumassusilinnik misissuisut siunnersuinerat, atuisut ilisimasaat kiisalu Piniarneq pillugu Siunnersuisoqatigiit ilaasortaannut tusarniaasimaneq tunngavigineqassapput.

 

Piniarneq aallaaniarnerlu pillugu Naalakkersuisut Naalakkersuisooqatigiinnissamut isumaqatigiissutaat innersuussutigalugu Aalisarnermut, Piniarnermut Nunalerinermullu Naalakkersuisup piviusunngortikkusuppaa. Naalakkersuisooqatigiit isumaqatigiissutaat innersuutigissavara tassani allassimavoq piniakkanik atuineq illersorneqarsinnaasumik tunngaveqartumik ingerlanneqassasoq tamatumalu ilutigisaanik tamakkiisuusumik isigalugu piniakkat piujuaannarlutillu piniarnermik inuussutissarsiuteqarnerup ingerlatiinnarneqarnissaa qulakkiissagatsigu.

 

Pisassiissutinik aalajangersaaneq

Pisuussutinik piniakkanik kingulissavut eqqarsaatigalugit piujuaannartitsinissaq pillugu Naalakkersuisut piniakkat killilersukkat pillugit uumassusilerituuniit siunnersorneqartarput. Siunnersuineq uumasoqatigiikkaartumik ingerlanneqartarpoq tassanilu uumasoqatigiit ataasiakkaat amerlassusaat, uumasoqatigiit ataasiakkaat katitigaanerat, qanoq piniarneqartiginerat kiisalu sumiiffinni peqarfiusuni pissutsit qanoq innersut tunngavigineqartarlutik.

Siunnersuinermi missingersorneqartarpoq uumasoqatigiit ataasiakkaat qanoq piniarneqartigisinnaanersut piniarneq piujuaannartitsisumik aallaaveqassappat.

 

Qilalukkat qaqortat qernertallu pillugit pisassiissutinut inassuteqaatit Canada-p Kalaallit Nunaatalu ataatsimoortumik Ataatsimiititaliarsua (JCNB) aammalu Atlantikup Avannaani Miluumasut Imarmiut pillugit Ataatsimiititaliaata (NAMMCO) akornanni ataatsimut suleqatigiissitamit (JWG) isumagineqartarpoq. Kalaallit Nunaata kitaani JCNB aqqutigalugu inassuteqaatit tiguneqartarpoq, Tunumilu NAMMCO aqqutigalugu.  

 

Naalakkersuisut 2015-imi pisassiissutit ukiuni tallimani 2016-2020-imi atuuttussat pillugit akuersisimapput. Covid-19-ili pissutigalugu ataatsimiinnerit kinguartinneqarneranni, APNN qilalukkat qaqortat qernertallu pillugit ataatsimoortumik pisassiissutinik nutaanik tigusaqarnikuunngilaq, taamaattumillu 2021-imi ataatsimoortumik pisassiissutit aamma pisassiissutinut pilersaarutit nanginneqassapput, carry-over-imut periarfissat ilanngullugit, pisassiissutit tamakkerlugit pisarineqarsimanngippara.

 

Ukiunut arlariinni atuuttussamik pilersaarutip pitsaaqutai makkuupput:

1. CITES-ip ataani EU-llu iluani pisassiissutit nungusaataanngitsut malitsigisaanik eqqussuinissamut annissuinissamullu suli killilersueqqissinnaanerit millisarnissaat.

2. Piniartut piniarnissartik pisanut naatsorsuutigineqartunut naleqqussaanissaannut periarfissinniarlugit pisariaqassappallu aningaasanik isertitaqarfiusinnaasunik allanik nassaarniarnissaannut.

3. Aqutsinermi allaffissornikkut suliassat annikillisinniarlugit pisuussutit taamaalillutik aningaasartuutinut sanilliullugit naapertuunnerusumik atorluarneqarnerusinnaalissallutik.

 

Uumassusilerituut siunnersuinerata saniatigut Naalakkersuisut nunani tamalaani isumaqatigiissutit, atuisut ilisimasaat, Piniarneq pillugu Siunnersuisooqatigiit ilaasortaanit kommuninillu tusarniaanissamut pisussaaffeqarput. Atuisut ilisimasaat ilaatigut kattuffiit attuumassuteqartut kiisalu Piniarneq pillugu Siunnersuisooqatigiit aqqutigalugit ilanngunneqartarput, kiisalu piniagassanik pisassiissutinut inassuteqaatit tunniunneqannginnerani misissuinerni peqataanikkut.

 

Qilalukkat qaqortat

Naak maanna uumassusilerituutinassuteqaataat 2020-mi atorunnaartussaagaluartut, Kitaani qilalukkat pillugit siunnersuinerit 2020-mi pisassiissutinut sanilliullugit allannguuteqanngillat. Kitaa tamakkerlugu qilalukkanut qaqortanut uumassusilerinikkut inassuteqaatit nutaat APNN-mit utaqqineqarput, Covid-19-ili pissutigalugu ataatsimiinnerit kinguartinneqarneranni taakku aatsaat 2020-p ukiaanerani pissarsiarineqassapput. Taama kingusitsigisumik pissarsiarinissaat pissutigalugu uumassusilerinikkut inassuteqaatit nutaat aatsaat 2021-p aallartinnerani suliarineqarsinnaassapput, taamaattumillu aatsaat ukiumi pisassiiffiusumi 2022-imi atortuutilersinneqarsinnaassallutik. Siunnersuinerit nutaat tiguneqarnissaasa tungaanut pisassiissutit allanngortinnginnissaannik APNN siunnersuuteqarpoq.

Kitaani qilalukkanut qaqortanut ukiumoortumik pisassiissut ataatsimoortoq  pisassiissutinut pilersaarut 2016-2020-inut pisassiiffiusunut atuuttoq malillugu pisassiissutit 340-ssasut aalajangerneqarsimavoq. Tamanna attatiinnarneqassaaq 2021-mi siunnersuinerit nutaat suliarineqarnissaasa tungaanut, taamaalillutillu siusinnerpaamik 2022-miit aatsaat atuutilissallutik.

Nunap ilaani immikkoortortani 3-5-mut qilalukkanik qaqortanik piniarneq soqutiginarnerulersinniarlugu pisassiissutinit 340-nit aalajangerneqartunit 320-t 2021-mi assigiinngitsunut marlunnut tunngavilerlugit piffissalerlugillu agguaanneqarnissaat Aalisarnermut, Piniarnermut Nunalerinermullu Naalakkersuisup siunnersuutigaa.

Piffissaq piniarfiusoq siulleq ingerlanneqassaaq januarip aallaqqaataa aallarnerfigalugu, juunillu 30-at ilanngullugu, pisassiinerillu nunap immikkoortuinut marlunnut avinneqassapput. Nunap immikkoortua 1 tassaavoq Avannaani Kullorsuarmiit Kangaatsiap kujaataani Ikerasaarsuup tungaanut, tamatumanilu qilalukkat qaqortat 250-it tunniunneqassapput.

Nunap immikkoortua 2 tassaavoq Sisimiuniit Kujataani Narsarmijinut, tamatumanilu qilalukkat qaqortat 70-it tunniunneqassapput.

Qilalukkanut qaqortanut pisassiissut ammaanneqassaaq, ukiumut piffinnullu pineqartunut aamma inunnut atuuttunik piniarnermut aallagartaqartunut aamma akuersissuteqartunut.

Piffissap piniarfiusup aappaa juulip aallaqqaataanit decembarip 31-ia ilanngullugu ingerlanneqassaaq, piffissamiillu siullermit pisassiissutinit sinnerussimasinnaasut nunap ilaani immikkoortortani 3-mit 5-imut ammaanneqassapput. Piffissarititaasuni marluusuni nunap immikkoortuini siuliani taaneqartuni qilalukkanut qaqortanut pisassiissutit sunngiffimmi aamma inuussutissarsiutigalugu piniartunit atuuttumik piniarnermut  aallagartaqartunit akuersissuteqartunillu pisarineqarsinnaassapput.

Aqutsiveqarfimmut Qaanaamiit Savissivimmut tamanna atuutinngilaq, tassami uumassusilerinermut inassuteqaat aamma Qaanaamiit Savissivimmut teknikikkut pisassiinerit 20-ummata, taakkulu pisassiissutitut aalajangerneqarsimasunit 340-nit sinneruttuupput. Takussutissiaq 1-imi pisassiisutit agguataarnerat takukkit.

Qilalukkat qaqortat pillugit aaqqissuussinerup nutaap kinguneraa, pisassiissutit pineqartut nunap ilaanut immikkoortortanut agguataarneqanngimmata, pisassiiffiullu aappaani aqutsiveqarfinnut aamma taamaattoqarani, tassami qaqortaqatigiiaat Kitaani immikkoortutut ataasiinnaasutut isigineqarmata (mininneqarpulli Qaanaamiit Savissivimmut qilalugaqatigiit). Aamma taamaaliornikkut Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaanni nr. 3, 27. januar 2017-imeersumi pisassiissutinik agguaassisarneq eqqarsaatigalugu paragraffit attuumassutillit kiisalu sunngiffimmi pinialuttartutut "Kitaata qaqortaqatigiianit" 10 %-it tungaanut pisassiissutigineqartarnerat pillugit Naalakkersuisut immikkut akuersissuteqarfigissagaat.

Qaqortarniarnermi malittarisassat sakkukillisinneqarneranni qaqortarniarneq qularnanngitsumik soqutigineqarnerulissaaq. Aaqqiissut nutaaq kommunit aamma KNAPK-p tungaannit qernertanik immikkut pisassiissutinik kissaateqartarneq annikinnerulissasoq APNN-imit neriuutigineqarpoq. Sunngiffimmi pinialuttartunut qilalukkanut qaqortanut ammaassinerunermik ajoqutaasinnaasoq tassaavoq, inuussutissarsiutigalugu piniartut isertitassaminnik annikinnerusumik periarfissaqalernissaat. Iluaqutaasussarli tassaasinnaassaaq ukiup siuliani illoqarfiit qaqortanik ikinnerusunik pisassinneqarsimasut qaqortanik amerlanernik pisaqarsinnaanissaat.

Tunumi qilalukkat qaqortat pillugit uumassusilerinermit inassuteqaammik peqartoqanngilaq, qilalukkallu qaqortat sumiiffimmi qaqutigoortuummata, piniarneq inerteqqutaavoq.

Takussutissiaq 1: Kitaani qilalukkanik qaqortanik pisassiissutissatut siunnersuutit

Zone

Qilalukkat qaqortaqatigiit

2021-imi piffissami siullermi

 

1. jan. – 30. juni

2021-mi piffissap aappaani

1. juli – 31. dec.

1-2

Qaanaaq

20 - 8 =12*

3

Savissivik

Upernavik

Nunap immikkoortua 1

 

250

Nunap immikkoortua 1-imi aamma 2-imi 

iffissami siullermi pisassiissutit sinneruttutpiffissap aappaani

ammaanneqarput

nunap immikkoortortanut 3-miit 5-imut.

4

Uummannaq

5

Ilulissat

Qeqertarsuaq

Qasigiannguit

Aasiaat

Kangaatsiaq

Sisimiut

Nunap immikkoortua 2

 

70

Maniitsoq

Nuuk

Paamiut

Narsaq

Qaqortoq

Nanortalik

 

Katillugit

340:8 – 332

* = 2019-imi pisanik nalunaaruteqarsimanerit naapertorlugit 85-inik sippuisoqarsimanera tunngavigalugu qilalukkanut qaqortanut pisassiissutit 2028-ip tungaanut  arfineq pingasut ilanngaatigineqartassapput, taamaalillunilu Qaanaamut Savissivimmullu 2021-imi pisassiissutit 20-unatik aqqaneq marlunngussallutik, takuuk takussutissiaq 2. 2019-iinnarmi qilalukkanik qaqortanik 105-inik pisaqartoqarsimanera tunngavigalugu, naak 2016-imiit 2020-p tungaanut teknikikkut pisassiissutit 100-t naligiimmik agguataarneqarsimagaluartut, APNN aaqqiissutiliorsimavoq, taamaasillutik sippuisimanerit 85-iusut ukiut siuliinit sinniusimasunit 21-usunik iluarsiivigineqarlutik, tamatumanilu  sippuisimanerit sinneruttut 64-iusut siunissami pisassiissutinit iluarsiivigineqassallutik.

 

Takussutisiaq 2: Ukiuni qulingiluani tulliuttuni imaluunniit allatut uumassusilerinermit inassuteqaateqartoqarnissaa tikillugu Qaanaami Savissivimmilu qilalukkanut qaqortanut pisassiissutissat pillugit aaqqissuussinissatut siunnersuutigineqartoq.

Ukioq

Teknikikkut pisassiineq

Sippuisimanerup sunniutai

2029-ip tungaanut pisassiisutit

2021

20

-  8

12

2022

20*

-  8

12

2023

20*

-  8

12

2024

20*

-  8

12

2025

20*

-  8

12

2026

20*

-  8

12

2027

20*

-  8

12

2028

20*

-  8

12

2029

20*

0

20

Katillugit

120

-64

116

* = 2022-imi qilalukkat qaqortat pillugit uumassusilerinermi inassuteqaatit nutaat ilutigisaanik teknikikkut pisassiinerit allanngortinneqarsinnaapput. 2021-imi nutaamik uumassusilerinermi inassuteqartoqassagaluarpalluunniit, 2019-imi annertoqisumik sippuisoqarpallaarsimanera, suli 2028-p tungaanut arfineq pingasunik iluarsiissuteqartoqartassasoq siunnersuutigineqarpoq.

Qilalukkat qernertat

2020-imi Kitaani qilalukkanut qernertanut pisassiissutit sanilliullugit  pisassiissutinut inassuteqaatit allannguuteqanngillat.

Piffissami 2016-2020-mut pisassiissutit pillugit pilersaarut malillugu Kitaani qilalukkanik qernertanik ataatsimut ukiumoortumik pisassiissutit 424-ussasut aalajangerneqasimapput. Covid-19-ili pissutigalugu uumassuseqarnikkut inassuteqaatit pillugit suliaqarluni ataatsimiinnerit kinguartinneqarneranni, 2021-imi uumassuseqarneq pillugu inassuteqaatit nutaamik ingerlanneqarnissaasa tungaanut pisassiissutit pillugit pilersaarut nanginneqassaaq, taamaalillunilu inassuteqaat nutaaq siusinnerpaamik 2022-mit atortussanngortinneqarsinnaalluni.

Aqutsiveqarfinni qilalukkanik qernertanik 50-init ikinnerusunik pisassiissuteqarfiusuni pisassat paggatassiissutigalugit piniarnerup atorunnaarsinneqarnissaa siunnersuutigineqarpoq, tassami amerlasuunik pisassiissuteqartutikinnerusunik pisassaqartut sanilliullugit mianersornerusumik sivisunermillu nakkutigineqarsinnaammata, ikinnerusunillu pisassaqartoqartillugu piniarnermi ataatsimi sippuineq nalaanneqarsinnaammat. Tamanna aamma aqutsiveqarfimmut Upernavimmut atuuppoq, pisassiinerimmi inoqarfinnut tamanut agguaanneqassammata. Tassa imaappoq; qilalukkanik qernertanik paggatassiilluni pisassiinerit taamaallaat Qaanaami Uummannamilu ingerlanneqarsinnaapput (taamaattorli piniarnermut allagartaq aamma akuersissut atuuttut suli piumasaqaataassapput).

Nuummiit Kujataani Narsarmijinut qilalukkanik qernertanik pisassiinerit septembarip 30-iat nallertinnagu atunngitsuukkat ulloq oktobarip aallaqqaataani aqutsiveqarfik Ilulissanut nuunneqassapput.

Takussutissiaq 2a: Kitaani qilalukkanik qernertanik pisassiissutissatut siunnersuutit

Zone

Qilalukkat qernertaqatigiit

2021

1

Etah

5

2

Qaanaaq

98

3

Savissivik

18

Upernavik

52*

4

Uummannaq

154

5

Ilulissat

5

Qeqertarsuaq

80

Qasigiannguit

Aasiaat

Kangaatsiaq

Sisimiut

6

Maniitsoq

Nuuk

2

Paamiut

Narsaq

4

Qaqortoq

Nanortalik

 

Katillugit

424

* =  APNN-ip Upernavimmut eqqaanilu nunaqarfinnut pisassiissutit agguataarnissaat pillugu siunnersuutaa, takuuk takussutissiaq 2b.

2020-imi APNN-imit siunnersuutigineqarpoq aqutsiveqarfimmi Upernavimmi inoqarfinni inuussutissarsiutigalugu piniartut amerlassusaat malillugu agguaassineq ingerlanneqarnissaa.  Tamanna 2021-mi APNN-imit nanginniarneqarpoq. 2020-mi periutsip allanngortinneqarneranut pissutaavoq, ukiut sisamat tallimalluunniit ingerlaneranni sippuisoqartarmat, unioqqutitsisoqartarmat kiisalu pisanik aamma pissatanik nalunaaruteqartarnerit amigartarsimammata. 2020-mi inuussutissarsiutigalugu piniartut atuuttumik inuussutissarsiutigalugu piniarnermut allagartaqartut amerlassusaat aallaavigalugit pisassanik 2021-imut agguaassisoqarpoq. Tamanna tunngavigalugu nunaqarfimmi inuussutissarsiutigalugu piniartut amerlassusaat naapertorlugu nunaqarfiit tamarmik procentikkaartumik pisassanik tunineqarput. Assersuutigalugu Nuussuaq pisassanit annertunerpaanik pissarsivoq, 2020-imi ukiumut pisassiiffiusumut inuussutissarsiutigalugu piniartut atuuttumik allagartallit nalunaarsorneqarsimasut 90-iummatta.

2021-imi aqutsiveqarfimmi Upernavimmi APNN-ip pisassiissutinik agguaassisarnerata nanginneqarnera kiisalu pisassanik ikinnerusunik pisassallit paggatassinneqartarunnaarnissaannut pissutaavoq, qilalukkanik qaqortanik qernertanillu pisat nakkutigineqarnerisa sakkortusarneqarnissaa Naalakkersuisut 2020-mi januarip aappaani ataatsimiinnerminni aalajangermassuk, taamaalillutik unioqqutitsilluni immaqaluunniit sippuilluni pisaqartarnerit annikillisarneqarsinnaassammata.

Takussutissiaq 2b: Upernavimmut eqqaanilu nunaqarfinnut pisassanik agguataarinissamut APNN-imit siunnersuutit 

Zone 3

Aqutsiveqarfik Upernavimmi pisassat agguataarneqarneri

2020

2021

 

Upernavik

7

3

 

Kullorsuaq

2

10

 

Nuussuaq

3

12

 

Nutaarmiut

1

2

 

Tasiusaq

2

6

 

Innaarsuit

2

4

 

Naajaat

1

2

 

Tussaaq

0

0

 

Aappilattoq

0

6

 

Kangersuatsiaq

1

3

 

Upernavik Kujalleq

2

4

Katillugit

 

*38

52

 

2017-imi Tunumi qilalukkat qernertat pillugit inassuteqaat

2019-imi NAMMCO-p kingullermik ukiumoortumik ataatsimiinnerani inassuteqaat 2017-imeersoq, 2018-imilu aatsaat saqqummiunneqarsimasoq suliareqqinneqarpoq, NAMMCO-mi ataatsimiititaliarsuup qilalukkat qernertat immikkoortiterneranut suut tunngavigineqarsimanersut annertunerusumik paasisaqarusunnerat toqqammavigalugu. Ilisimatuussutsikkut Komité-mit inerniliunneqarpoq, inassuteqaat 2018-imi saqqummiunneqarneratut attatiinnarneqassasoq. 

2017-imi inassutigineqarpoq Tunumi qilalugaqatigiit nunap immikkoortui suli aalajangersagaanngitsumik pingasunngorlugit immikkoortinneqassasut: Ittoqqortoormiit, Kangerlussuaq aamma Tasiilaq, Tunumi nunap immikkoortui pillugit ilanngussaq 2 takuuk. Piniarfiit pingasunut immikkoortinneqarnerannut toqqammavigineqarpoq inassuteqaat ilisimatuussutsikkut suliaqartuniit mianersornarnertut isiginiarneqarmat, sumiiffimmilu qilalugaqatigiit ikiliartunnginnissaannut ilimanaat annertunerussasoq taakkartorneqarluni.

2017-imi inassuteqaat qilalukkat qernertat pisarineqartartut Tunumi tamani annertuumik ikilinissaanut innersuussuteqarpoq, qilalukkat ikiliartornerat pissutaalluni. Pisassiissutitut inassuteqaat tassaalerporlu Ittoqqortoormiini qernertanik qilalugartassiissutit quliunissaat innersuutigineqassasoq, Kangerlussuarmi qilalukkanik qernertanik qilalugartassiissutit quliunissaat innersuutigineqassasoq, kiisalu avannarpasissuseq 68°N kujataani qilalukkanik qernertarniartoqassanngitsoq inassutigineqassasoq, tamanna isumaqarpoq Tasiilap eqqaani qilalukkanik qernertarniartoqassanngitsoq inassutigineqarpoq. Pisassiissutit qilalugaqatigiillu pillugit 2017-imi inassuteqaat qilalugaqatigiit ukiut tallimat tulliuttut amerliartornissaanut 70%-imik ilimanaateqassappat pisariaqartutut isiginiarneqarpoq.

2019-imi Tunu pillugu uumassusilerinikkut inassuteqaat nutaanerpaaq, pisortatigoortumik ulloq 15. November 2019-imi tiguneqartoq, 2017-imi inassuteqaat sanilliullugu sakkortuneroqisoq ersarissivoq. Inassuteqaammi nutaanerpaami 2019-imeersumi inerniliunneqarpoq, Tunumi qilalukkat qernertat pillugit pissutsit ima ilungersunartigisut, allaat Tunumi qilalugaqatigiiaat immikkoortut pingasuusut piniarneqarnissaat artukkiissasoq.  Tassa imaappoq, qernertaqatigiiaat amerlinissaannut 70 %-imik ilimanaateqartitsinermut aaqqissuussineq inassuteqaammi atorunnaarsinneqartarniarpoq, taamaalillutik Tunumi qernertaqatigiit eqqissillutik amerliartorsinnaaniassammata. Taamaattumik NAMMCO-p inassutigaa Tunumi piniarfinni pingasuni immikkoortinneqartuni tamani qilalugarniarneq matuneqassasoq, tamannalu isumaqarpoq qilalugaqatigiinni pingasuusuni immikkoortinneqarsimasuni tamani pisaqartoqassanngitsoq.

Takussutissaq 3: 2017-imi aamma 2019-imi Tunumi qilalukkanik qernertanik pisassiissutit pillugit inassuteqaatit

Zone

Qilalukkat qernertaqatigiit

2017-imi inassuteqaat naapertorlugu pisassiissutitut siunnersuutit

2019-imi inassuteqaatnaapertorlugu pisassiissutitut siunnersuutit

6

Tasiilaq

0

0

-

Kangerlussuaq

10

0

7

Ittoqqortoormiit

10

0

 

Katillugit

20

0

 

Inassuteqaatit 2019-imi tiguneqartut martsimi 2020-imi NAMMCO-p ukiumoortumik ataatsimiinnerani suliarineqartussaagaluarput, Covid-19-imilli tunillaassuisoqalernera pissutigalugu ukiumoortumik ataatsimiinneq 2021-mut kinguartinneqarpoq. Tamanna isumaqarpoq, inassuteqaat aatsaat 2021-imi suliarineqassasoq, aatsaallu 2022-imi atuutilersinneqassalluni.

Taamaattorli Naalakkersuisut aalajangerpaat piffinni pineqartuni neqissaqarniarneq isumannaarniarlugu pisassiissutit milliartuutaasumik ikiliartuaartinneqassasut. Tunumi pisassiissutit milliartuutaasumik ikiliartuaartinneqarnerat 2020-mi aallartinneqarpoq, tamatumani Tunu tamakkerlugu qilalukkat qernertat 50-it inassutigineqarlutik. Ukiuni sisamani pisassat milliartuutaasumik ikiliartuaartinneqarnissaannut siunertaavoq, inuussutissarsiutigalugu piniartut ukiumi pisaqarfiusussami naatsorsuutigisami piniagassaminnik naleqqussarnissaminnut taartaasinnaasunillu piniagaqarnissamik ujartuinissamut periarfissinneqarnissaat piniarlugu. 

APNN-ip Tunumi pisassiisutit pillugit pilersaarut 2020-mut qilalukkanik qernertanik pisassiissutit ilutigalugit saqqummiuppai, tamannalu 2023 ilanngullugu imaluunniit allatut inassuteqartoqarnissaa tikillugu atuutissalluni. Pisassiissutit pillugit pilersaarut aallaavigalugu 2021-imi pisassiissutit allanngortinneqanngillat, tassanilu inassutigineqarpoq Ittoqqortoormiinut qilalukkanik qernertanik pisassiissutit 25-inut aalajangiunneqassasut, Kangerlussuarmut qilalukkat qernertat quliussasut, kiisalu Tasiilap eqqaanut qilalukkat qernertat tallimaassasut, taamaalillutillu 2021-imi Tunumi tamakkiisumik pisassiissutit 40-ssallutik.

Qilalukkanik qernertanik pisassiissutit paggatassiissutigineqarnerisa atorunnaarsinneqarnerat aamma aqutsiveqarfinnut Ittoqqortoormiinut Tasiilamullu atuuppoq (Kangerlussuarmi pisassiissutigineqartut ilanngullugit), pisassiissutit 50-it ataallugit amerlassuseqarmata.

Takussutissaq 4: Tunumi qilalukkat qernertat pillugit pisassiissutissatut siunnersuutit

Zone

Qilalukkat qernertaqatigiit

2020

2021

2022

2023

6

Tasiilaq

10

5

0

0

-

Kangerlussuaq

-

10

15

10

7

Ittoqqortoormiit

40

25

15

10

 

Katillugit

50

40

30

20

 

 

Pisassiissutinik atunngitsuukkanik nuussineq

Ukiuni siuliani (2020-imi) pisassiissutinik sippuisoqarsimassagaluarpat aqutsiveqar­fimmut pineqartumut pisassiissutinit agguaassisoqareernerata kingorna sippuissutaasut ilanngaatigineqassapput.

 

”Carry over” – ukioq pisassiiviusoq 2020-imi qilalugartassat tamakkerneqassanngikkaluarpata, ukiup pisassiiviusup tullianut nuunne­qar­sinnaapput (tassani periuseq ukiumiit ukiumut amerleriaat atorneqas­sanngilaq).

 

2020-mut sanilliullugu allanngortitat:

1) Qilalukkanik qernertanik pisassiissutit 50-init ikinneruppata pisassiissutit  paggatassiissutigineqarnissaat aqutsiveqarfinni atorunnaarsinneqassaaq. Tamanna aamma aqutsiveqarfimmut Upernavimmut atuuppoq, tassami pisassiissutigineqartut inoqarfinnut tamanut agguaanneqassammata. Taamaaqataanik aqutsiveqarfinnut Ittoqqortoormiinut aamma Tasiilamut (Kangerlussuullu eqqaa ilanngullugu) atuuppoq, tassami qilalukkanik qernertanik pisassiissutit 50-it sinnersimanngimmagit.

2) Nuummiit Kujataani Narsarmijinut qilalukkanik qernertanik pisassiinerit septembarip 30-iat nallertinnagu atunngitsuukkat ulloq oktobarip aallaqqaataani aqutsiveqarfik Ilulissanut nuunneqassapput.

 

3) Tunumi pisassiissutinut pilersaarut 2023-ip tungaanut Tunumi milliartuutaasumik ikiartuaatitsisoq aallaavigalugu 2021-imi pisassiissutinut allannguuteqartitsinngilaq, tassanilu inassutigineqarpoq Ittoqqortoormiinut qilalukkanik qernertanik pisassiissutit 25-nut aalajangiunneqassasut, Kangerlussuarmut qilalukkat qernertat quliussasut, kiisalu Tasiilap eqqaanut qilalukkat qernertat tallimaassasut, taamaalillutillu Tunu tamakkerlugu 2021-mut pisassiissutit ataatsimut 40-sallutik.

 

4) 2021-imi qilalukkanut qaqortanut pisassiissutit zone 3-miit 5-imiittut assigiinngitsunik marlunnik tunngavilerlugit piffissalerlugillu agguaanneqassapput. Piffissaq siulleq januarip aallaqqaataanit juunip 30-annut ingerlanneqassaaq, pisassiinerillu nunap immikkoortuinut marlunnut avinneqassapput. Nunap immikkoortua 1 tassaavoq Avannaani Kullorsuarmiit Kangaatsiap kujaataani Ikerasaarsuup tungaanut, tamatumanilu qilalukkat qaqortat 250-it tunniunneqassapput. Nunap immikkoortua 2 tassaavoq Sisimiuniit Kujataani Narsarmijit tikillugu, tamatumanilu qilalukkat qaqortat 70-it tunniunneqassapput. Piffissap aappaa tassaavoq juulip aallaqqaataanit decembarip 31-annut, tassanilu piffissamit siullermit pisassat sinneruttut zone3-mit 5-imut ammaanneqassapput. Piffissarititaasuni marluusuni nunap immikkoortuini siuliani taaneqartuni qilalukkanut qaqortanut pisassiissutit saniatigooralugu pinialuttartunit aamma inuussutissarsiutigalugu piniartunit atuuttumik piniarnermut aallagartaqartunit akuersissuteqartunillu pisarineqarsinnaassapput.

 

Tusarniaanermut killigititaq

APNN-imiit tusarniaanermi killigitinneqarpoq: tallimanngorneq ulloq 23. oktober 2020 nal. 12.00.

 

Akissuteqaateqannginneq siunnersuummik akuersinnittutut naatsorsuutigineqassaaq. Tusarniaassutigineqartumut piffissaliussap sivitsorneqarnissaanut periarfissaqanngilaq.

 

Tusarniummut akissuteqaatit apnn@nanoq.gl-imut nassiuteqquneqarput. Qarasaasiatigut attaveqanngikkaanni fax-nr.: 34 53 55 atorneqarsinnaavoq.

Sammisaq:

Piniarneq

Tusarniaanerup suunera:

Inatsisartut inatsisaat

Saqqummiunneqarfia:

08 septembari 10:07:00

Tusarniaanermi piffissaliussaq:

30 oktobari 12:00:00

Tusarniaanermi akissutit uunga nassiuteqquneqarput:

apnn@nanoq.gl