Siunnersuummik tusarniaaneq: Naartunermut, erninermut meeravissiartaarnermullu atatillugu sulinngiffeqartarnissaq pillugu Inatsisartut inatsisissaattut nr. xx, xx. xxx 2019-imeersumut siunnersuut

Isumaginninnermut Inatsisinillu Atuutsitsinermut Naalakkersuisoqarfiup matumuuna: Naartunermut, erninermut meeravissiartaarnermullu atatillugu sulinngiffeqartarnissaq pillugu Inatsisartut inatsisaattut nr. xx, xx. xxx 2019-imeersumut siunnersuutip pisortatigoortumik tusarniutigineqarnissaanut nassiuppaa.

Tunuliaqut
Namminersorlutik inuussutissarsiuteqartunut meerartaarnermut atatillugu aningaasaateqarfimmik pilersitsinissaq kiisalu pisortani sulisunut meerartaarnermut atatillugu sulinngiffeqartarnermut tunngatillugu naligiissitsilluni aaqqissuussinissaq siunnersuummi siunertarineqarput.

Naartunermut, meerartaarnermut meeravissiartaarnermullu atatillugu sulinngiffeqarnermut tunngatillugu malittarisassat atuuttut iluarsaanneqarlutillu nutarterneqarnissaat aammattaaq siunnersuummi siunertarineqarput, tassunga ilanngullugu meerartaarnermut atatillugu angajoqqaat sulinngiffeqartarnerisa sivitsorneqarnissaat pillugu Inatsisartut aalajangiinerannik UKA2018/106-imi saqqummiunneqartumik atulersitsineq.

Maannakkut inatsisitigut toqqammavigisamut sanilliullugu allannguinerit pingaarnerpaat ukuupput:

- Namminersorlutik inuussutissarsiuteqartunut meerartaarnermut atatillugu aningaasaateqarfimmik pilersitsinissaq kiisalu pisortani sulisunut meerartaarnermut atatillugu sulinngiffeqartarnermut tunngatillugu naligiisitsinermik aaqqissuussineq, taakkulu sulinngiffeqarnerup nalaani sulisitsisut akissarsianut aningaasartuutaannut naligiisitsisuupput.
- Akissarsiortut sulinngiffeqarnerup nalaani akissarsiaqarsinnaatitaalissapput.
- Angajoqqaat sulinngiffeqartarnerat sapaatit akunnerinik sisamanik sivitsorneqassaaq, tamannalu eqaatsumik aaqqissuunneqarsinnaassalluni.
- Arnat angerlarsimaffigisami avataanut erniartornissaminnut innersuunneqarsimasut sulinngiffeqarsinnaatitaanerannik atulersitsineq.
- Sulinngiffeqarnerup nalaani meeqqamik annaasaqarnermi angajoqqaanut sulinngiffeqarsinnaatitaannginnermik atulersitsineq.
- Angajoqqaat assigiimmik suiaassusillit inatsisitigut inissisimanerisa pitsanngoriaateqarnerat.
- Tapertatut pisortanit ikiorsiissutinik pisinnaatitaanermik atulersitsinikkut kiisalu meerartaarnermut atatillugu ullormusianik naatsorsuisarnermut periutsip allanngortinneratigut ilaqutariit isertitakitsut aningaasaqarnikkut pitsanngorsaavigineqassapput, taamaalillutik piffissat sulinngiffiusimasut naatsorsuinermi ilanngunneqartassanatik.
- Meerartaarnermut atatillugu sulinngiffeqarnermi meeqqap ilagineqartarnissaanik piumasaqaat.

Tusarniaaneq pillugu
Siunnersuummut nassiunneqartumut oqaaseqaataasinnaasut Isumaginninnermut Inatsisinillu Atuutsitsinermut Naalakkersuisoqarfimmi kingusinnerpaamik ulloq 15. Maj 2019 tiguneqareernissaat qinnutigineqarpoq.

Tusarniaanermut akissutit uunga nassiunneqassapput Isumaginninnermut Inatsisinillu Atuutsitsinermut Naalakkersuisoqarfik mailikkut uunga iian@nanoq.gl imaluunniit allakkatigut uunga Isumaginninnermut Inatsisinillu Atuutsitsinermut Naalakkersuisoqarfik, Postboks 260, 3900 Nuuk

Allagaatit attuumassuteqartut

Tusarniaanermut allagaatit attuumassuteqartut ilanngussatut ilanngunneqarput tak. ilanngussanut takussutissiaq.

Ilanngussat:
1. Siunnersuut uunga: Naartunermut, erninermut meeravissiartaarnermullu atatillugu sulinngiffeqartarnissaq pillugu Inatsisartut inatsisissaattut nr. xx, xx. xxx 2019-imeersumut
2. Siunnersuummut oqaaseqaatit
3. Nassiussivigineqartut allattorsimaffiat


Inussiarnersumik inuulluaqqusillunga

Isumaginninnermut Inatsisinillu Atuutsitsinermut Naalakkersuisoqarfik

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Naalakkersuisoqarfik:

Isumaginninnermut, Inatsisinillu Atuutsitsinermut Naalakkersuisoqarfik

Saqqummiunneqarfia:

10 apriili 15:54:00

Tusarniaanermi piffissaliussaq:

15 maaji 00:00:00

Tusarniaanermi akissutit uunga nassiuteqquneqarput:

iian@nanoq.gl