Inissianik attartortitsisarneq pillugu Inatsisartut peqqussutaata allanngortinneqarnissaa pillugu Inatsisartut inatsisissaannut siunnersuutip tusarniaassutigineqarnera (Pisortat inissiaataanni uumasuuteqarnissamut tunngatillugu maleruagassat allanngortinneqarnerat)

Attartortup toqukkut qimagunnerani attartornermut tunngasut attartortup qanigisaannit qaninnerpaanit tiguneqarnissaannut maleruagassat sukanninnginnerusut atuuttussanngorlugit, inissianik attartortitsisarneq pillugu Inatsisartut peqqussutaat nr. 2, 12. maj 2005-imeersumi § 60 allanngortinneqassasoq, 2019-imi upernaakkut ataatsimiinnermi siunnersuutigineqarpoq.

 

Tamanna tunngavigalugu inissianik attartortitsisarneq pillugu Inatsisartut peqqussutaata allanngortinneqarnissaa pillugu Inatsisartut inatsisissaannut siunnersuut (Pisortat inissiaataanni uumasuuteqarnissamut tunngatillugu aammalu attartortup toqukkut qimagunnerani attartukkap tiguneqartarnera il.i. pillugut maleruagassat allanngortinneqarnerat) nutaamik tamanut ammasumik tusarniaassutigalugu nassiunneqarpoq. Siusinnerusukkut oqaaseqaatigisimasat siunnersuummut attuumassuteqartut siunnersuummi ilanngunneqarumaarput.

 

Inissianik attartortitsisarneq pillugu Inatsisartut peqqussutaannut nr. 2, 12. maj 2005-imeersumut ilanngussaq 4-imi torersaarnissamut maleruagassat allanngortinneqassasut 2018-imi Inatsisartut ukiaanerani ataatsimiinneranni aalajangiiffigisassatut siunnersuuteqartoqarpoq, taamaalilluni siunissami aallaaviatigut inissiani attartortittakkani pisortanit pigineqartuni qimmiuteqarneq qitsuuteqarnerlu akuerisaalissalluni.

 

Siunnersuut taamaalilluni aalajangiiffigisassatut siunnersuut matuma siuliani taaneqartoq, 2018-imi Inatsisartut ukiaanerani ataatsimiinneranni akuerineqartoq, tunngavigalugu suliarineqarpoq.

 

Siunnersuummut tassunga siunertaavoq inissianik attartortitsisarneq pillugu Inatsisartut peqqussutaanni uumasuuteqarneq pillugu aalajangersakkat allanngortinneqarnissaat, taamaalilluni najugaqaqatigiiffimmi siulersuisut allamik aalajangiisimanngippata, pisortat inissiaataanni attartortittakkani uumasuuteqarneq akuerisaalissalluni.

 

Siunnersuummut tunngaviusut, taassuma siunertaa imarisaalu pillugit erseqqinnerusunut siunnersuummut nassuiaatit ilanngullugit nassiunneqartut innersuussutigineqarput.

 

Oqaaseqaatissaqaraanni taakkua Ineqarnermut Attaveqaqatigiinnermullu Naalakkersuisoqarfimmi kingusinnerpaamik Marlunngorneq 4. juni 2019 tiguneqareersimassasut piumasarineqarpoq.

 

Oqaaseqaatit Naalakkersuisoqarfiup pisortatigoortumik mailianut box909@nanoq.gl imaluunniit uunga nassiuteqquneqarput:

 

Ineqarnermut Attaveqaqatigiinnermullu Naalakkersuisoqarfik

Postboks 909

3900 Nuuk

Sammisaq:

Ineqarneq

Tusarniaanerup suunera:

Inatsisartut inatsisaat

Naalakkersuisoqarfik:

Ineqarnermut Attaveqaqatigiinnermullu Naalakkersuisoqarfik

Saqqummiunneqarfia:

28 maaji 15:46:00

Tusarniaanermi piffissaliussaq:

04 juni 00:00:00

Tusarniaanermi akissutit uunga nassiuteqquneqarput:

box909@nanoq.gl