Uunga siunnersuutip tusarniutigineqarnera: Siusinaartumik pensionisiat pillugit Inatsisartut inatsisaata allanngortinnissaa pillugu Inatsisartut inatsisaat nr .xx xxx 2019-imeersoq

Isumaginninnermut Inatsisinillu Atuutsitsinermut Naalakkersuisoqarfik matumuuna uunga siunnersuummut tusarniaassummik nassiussivoq: Siusinaartumik pensionisiat pillugit Inatsisartut inatsisaata allanngortinnissaa pillugu Inatsisartut inatsisaat nr .xx xxx 2019-imeersoq.

Siunertat
Allannguutissatut siunnersuutikkut anguniagaasoq pingaarneq tassaavoq Kalaallit Nunaata, Danmarkip Savalimmiullu akornanni siusinaartumik pensionisialinnut killeqarfiit iluanni killilersuutaasinnaasunik nungusaanissaq.

Nunat atlantikup avannaaneersut Folketingimi ilaasortaatitaasa naalagaaffeqatigiinnerup killeqarfiisa iluanni killilersuutaasunut sukumiisumik iliuuseqarfiginninnissaq pillugu aalajangiivigisassatut siunnersuut B 34, 2013-imi decembarimi saqqummiuppaat. Aalajangiivigisassatut siunnersuut ulloq 13. maj 2014-imi akuersissutigineqarpoq.

Suleqatigiissitaq Kalaallit Nunaanniit, Danmarkimiit aamma Savalimmiuniit atorfilittanik inuttaqartoq naalagaaffiup immikkoortortaasa pensionisiaqarnermut malittarisassaannik aamma naalagaaffeqatigiinnerup iluani nuunnermi aporfiusinnaasunik qulaajaanissaminik suliakkerneqarpoq. Nalunaarusiaq 2016-imi naammassineqarpoq ilaatigullu inerniliisoqarpoq, naalagaaffiup immikkoortortaanni pensionisiaqarnermut aaqqissuussinerit assigiinngitsuunerat naalagaaffiup immikkoortortaasa akornanni nuunnermi innuttaasut aporfittut misigisaraat.

2018-ip aallartinnerani suleqatigiissitamik Kalaallit Nunaanniit, Danmarkimiit aamma Savalimmiuniit atorfilittanik inuttaqartumik pilersitsisoqarpoq naalagaaffiup immikkoortortaasa akornanni siusinaartumik pensionisiallit nuukkaangata killeqarfiit iluanni killilersuutaasinnaasut nungusarnissaannut aaqqiissutissanik siunnersuusiornissaq siunertaralugu.

Peqqissutsimut, Isumaginninnermut Inatsisinillu Atuutsitsinermut Naalakkersuisup, danskit suliffissaqartitsinermut ministeriata aamma Savalimmiormiut isumaginninnermut naalakkersuisuata akornanni december 2018-imi ataatsimiinneranni nunat ataasiakkaat inatsisaanni ilanngunneqartussanik 3-nik suliniuteqartoqarnissaa isumaqatigiissutigineqarpoq. Suliniutit taakku 3-t siusinaartumik pensionisiallit Kalaallit Nunaata, Danmarkip aamma Savalimmiut akornanni nuunnissaannut ajornannginnerulersitsissapput.

Tusarniaanerup nassuiarneqarnera
Suliniutit taakku 3-t ministerit 3-t akornanni isumaqatigiissutaasut, siusinaartumik pensionisiat pillugit Inatsisartut inatsisaannut allannguutissamik siunnersuuteqarnermik kinguneqarput.

Siunnersuutigineqarpoq, kalaallit nunaanni kommunip qimanneqartup aamma Danmarkimi Savalimmiunilu kommunip nuuffigineqartup akornanni paasissutissanik avitseqatigiittarnissaq pillugu aalajangersakkamik ikkussisoqassasoq. Siunnersuut Kalaallit Nunaanniit siusinaartumik pensionisianik pisartagaqalernissamut akuersissutip qaammatit 12-t tikillugit Danmarkimut imaluunniit Savalimmiunut nassarneqarsinnaatitaanera pillugu imaluunniit siusinaartumik pensionisiallip kommunimi nuuffigineqartumi siusinaartumik pensionisianik pisartagaqalernissaminik akuerineqarnissaa tikillugu imaluunniit allatigut pilersorneqarnissaa pillugu aalajangersakkamik imaqarpoq. Tamatuma saniatigut siunnersuut Danmarkimiit siusinaartumik pensionisiallit aamma Savalimmiuniit qaffasinnerpaanik siusinaartumik pensionisiallit sulisinnaassuseqanngitsut imaluunniit annikitsuinnarmik sulisinnaassusillit sulisinnaassutsiminnik nalilersuiffigineqaqqaarnatik ingerlaannartumik qaffasinnerpaanik siusinaartumik pensionisianik pisartagaqalersinneqartarnissaat pillugu aalajangersakkamik imaqarpoq.

Tusarniaaneq pillugu nalinginnaasut
Siunnersuummut oqaaseqaataasinnaasut Isumaginninnermut Inatsisinillu Atuutsitsinermut Naalakkersuisoqarfimmut nassiunneqassapput ugguuna iian@nanoq.gl


Tusarniaanermut akissuteqarnissamut piffissaliunneqarpoq, kingusinnerpaamik u. 10.05.2019


Allagaatit attuumassuteqartut
Tusarniaanermut allagaatit attuumassuteqartut ilanngussatut ilanngunneqarput tak. ilanngussanut takussutissiaq.

Ilanngussat:
1. Siunnersuut: Siusinaartumik pensionisiat pillugit Inatsisartut inatsisaata nr. Xx, xx. xxx 2019 allanngortinneqarnissaa pillugu.
2. Siunnersuummut nassuiaatit

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Saqqummiunneqarfia:

05 apriili 14:58:00

Tusarniaanermi piffissaliussaq:

10 maaji 00:00:00

Tusarniaanermi akissutit uunga nassiuteqquneqarput:

iian@nanoq.gl