Tapersiissutitalimmik inissialiortiternermut taarsigassarsititsisarneq pillugu Inatsisartut inatsisaata tusarniaassutigineqarnera

Matumuuna tapersiissutitalimmik inissialiortiternermut taarsigassarsititsisarneq pillugu Inatsisartut inatsisissaattut siunnersuut tamanut ammasumik tusarniaassutigineqarpoq.

Kommunit pisortanut taarsigassarsianik aamma inissianik sanaartornermut, iluarsaassinermut, alliliinermut pitsanngorsaanermullu tapiissutinik aqutsinermik kommunit tigusinissaannik tunngaviusumik aalajangiisoqarsimanera siunnersuummut matumunnga tunngavigineqarpoq.

Kommuni inissiaataannut attartortittakkanut aningaasalersuineq, sanaartorneq aqutsinerlu kommuninit tiguneqarsimapput. Piginneqatigiilluni inissianut, inissianut nammineerluni pigisanut (inissianut aningaasalersuineq) aamma illunut sanaqataaffiusunut taarsigassarsiat tapiissutillu aqunneqarneri tiguneqarsimapput.

Ukiut arlallit ingerlanerini aningaasanut inatsimmi tapersissutitalimmik inissialiortiternermut inatsit naapertorlugu inissianik sananissamut, iluarsaassinissamut, alliliinissamut pitsanngorsaanermullu aningaasaliissutinik immikkoortitsisoqartarsimanngilaq.

Tapersiissutitalimmik inissialiortiternermut taarsigassarsititsisarneq pillugu Inatsisartut inatsisissaattut siunnersuummi matumani tamanna nalinginnaanngorsarneqarpoq, taamaalillunilu Naalakkersuisut inissianik sanaartornermut, pisinermut, iluarsaassinermut, alliliinermut pitsanngorsaanermullu nutaanik taarsigassarsititsisarunnaassapput tapiissuteqartarunnaassallutillu.

Siunnersuut inissianut aningaasalersuisarneq pillugu Inatsisartut inatsisaata allanngortinneqarnera pillugu Inatsisartut inatsisissaattut siunnersuummut atasutut isigineqassaaq.

Siunnersuummut tunngaviusunut, tassani siunertaasumut taassumalu imaanut tunngatillugu sukumiisumik paasisaqarusunnermi siunnersuummut nassuiaatit ilanngullugit nassiunneqartut innersuussutigineqarput.

Oqaaseqaatissaartoqaruni oqaaseqaatit kingusinnerpaamik tallimanngornermi 31. maj 2019-imi Ineqarnermut Attaveqaqatigiinnermullu Naalakkersuisoqarfimmut nassiuteqquneqarput.

Oqaaseqaatit Naalakkersuisoqarfiup mailadressia box909@nanoq aqqutigalugu nassiuteqquneqarput, imaluunniit uunga:
Ineqarnermut Attaveqaqatigiinnermullu Naalakkersuisoqarfik
Postboks 909
3900 Nuuk

Sammisaq:

Ineqarneq

Tusarniaanerup suunera:

Inatsisartut inatsisaat

Naalakkersuisoqarfik:

Ineqarnermut Attaveqaqatigiinnermullu Naalakkersuisoqarfik

Saqqummiunneqarfia:

08 maaji 09:57:00

Tusarniaanermi piffissaliussaq:

31 maaji 00:00:00

Tusarniaanermi akissutit uunga nassiuteqquneqarput:

box909@nanoq.gl