“Uunga siunnersuummut: Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaat nr. xx. xx. xxx 2019-imeersoq” ilassutaasumik tusarniaaneq

“Uunga siunnersuut: Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisaat nr. xx. xx. xxx 2019-imeersoq” Isumaginninnermut Inatsisinillu Atuutsitsinermut Naalakkersuisoqarfik matumuuna pisortatigoortumik ilassutaasumik tusarniutigalugu nassiuppaa.

Tunuliaqutaasoq
Piffissami 10. april 2019-imiit 15. maj 2019-imut siunnersuut sapaatit akunnerini tallimani tusarniutigalugu pisortatigoortumik tusarniutigineqaqqaarpoq.

Siunnersuummi allannguutit arlaqartut tusarniaanermi akissutigineqartut kinguneraat, taamaalilluni siunnersuut massakkut pitsaanerusunngorlugu saqqummiunneqarpoq. Tamanna pissutigalugu siullermeerluni tusarniutigineqarneranut atatillugu tusarniaanermut akissutit ilanngunneqareernerisigut, siunnersuut ilassutaasumik tusarniutigineqarpoq, tusarniaavigineqartut allannguutit isummerfiginissaannut periarfissaqarniassammata.

Siullermeerluni tusarniutigineqarneranut atatillugu tusarniaaneq pillugu allakkiaq tamakkiisoq ilanngunneqarpoq. Tassani tusarniaanermut akissutit tamakkiisunngorlugit issuarneqarput, aamma tusarniaavigineqartut oqaaseqaataat siunnersuummi qanoq ilanngunneqarsimanerat takuneqarsinnaavoq.

2020-imi upernaakkut ataatsimiinnissami siunnersuutip saqqummiunneqarnissaa naatsorsuutigineqarpoq.

Tusarniaanermut siullermut naleqqiullugu allannguutit pingaaruteqartut:

  • Sulinngiffeqarneq meerartaarneq sioqqullugu sapaatit akunneri 2-niit 4-nut sivitsorneqarpoq.
  • Ataataasup sulinngiffeqarfigisassatut pisinnaatitaaffiinik anaanaasup nulianut imaluunniit nalunaarsorneqarsimallutik aapparisaannut sulinngiffeqarsinnaanerup tunniunneqarnissaanut kommunalbestyrelsip akuersisinnaanera peerneqarpoq. Tassunga taarsiullugu “anaanaaqataasoq” allanneqarpoq, taamaalilluni arnaq meeqqamut anaanaaqataasutut nalunaarsorneqarsimasoq ataataasutulli sulinngiffeqarsinnaanermut pisinnaatitaaffeqalissammat.
  • Namminersorlutik suliffeqarfinni sulisut sulinngiffeqarnerminni akissarsiaqaannarnissaat pillugu malittarisassat kiisalu sulisitsisup utertitsivigineqarsinnaanera ersarinnerusumik oqaasertalerneqarput.
  • Oqaaseq “koruunimut qummut killigititaq” “akigititap annerpaaffissaa”-nik taarserneqarpoq.
  • Pisortat naligiissaarisarnissaat pillugu siusinnerusukkut aalajangersagassatut siunnersuutigineqartoq siunnersuummit peerneqarpoq.
  • Meerartaarnermut atatillugu sulinngiffeqarnermi ullormusiat pillugit aalajangersakkat erseqqissarneqarput. Inatsimmi pisortat ikiorsiissutaannut allanut tunngassuteqartut peerneqarput, taakkuli ilitsersuummi allanneqarumaarput.
  • Meerartaarnermut atatillugu sulinngiffeqarnermut aningaasaateqarfimmut suliffeqarfiit namminersortut akiliutissaanik akiliisitsiniartarneq peerneqarpoq, taannami Sulisoqarnermut akitsuut pillugu Inatsimmi malittarisassiuunneqarmat.
  • Nalinginnaasumik nassuiaatit erseqqinnerusumik oqaasertalersorneqarput, aningaasaqarnermullu kingunerisassat itisilerneqarput.
  • Atuutilerfissaa 1. januar 2021-imut siuartinneqarpoq.
Tusarniaaneq pillugu nalinginnaasut
Siunnersuummut nassiunneqartumut oqaaseqaataajunnartut Isumaginninnermut Inatsisinullu Atuutsitsinermut Naalakkersuisoqarfiup ulloq 29. novmber 2019 tigoreersimassavai.

Tusarniaanermut akissutit Isumaginninnermut Inatsisinullu Atuutsitsinermut Naalakkersuisoqarfimmut e-mailkkut iian@nanoq.gl-imut imaluunniit allakkatigut Isumaginninnermut Inatsisinullu Atuutsitsinermut Naalakkersuisoqarfik, Postbox 260, 3900 Nuuk-mut nassiunneqassapput.

Allagaatit attuumassuteqartut
Ilanngussanut takussutissiaq malillugu tusarniaanermut allatit attuumassuteqartut ilanngunneqarput.

Ilanngussat:
1. Uunga siunnersuut: Naartunermi, erninermi meeravissiartaarnermilu sulinngiffeqar-tarneq pillugu Inatsisartut inatsisaat nr. xx, uu. qqqq 2019-imeersoq
2. Siunnersuummut nassuiaatit
3. Nassiussiffinnut allattorsimaffik
4. Tusarniaanermut siullermut tusarniaaneq pillugu allakkat
5. Tusarniaanermut siullermut tusarniaaneq pillugu allakkiaq

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Naalakkersuisoqarfik:

Isumaginninnermut, Inatsisinillu Atuutsitsinermut Naalakkersuisoqarfik

Saqqummiunneqarfia:

01 novembari 13:31:00

Tusarniaanermi piffissaliussaq:

29 novembari 00:00:00

Tusarniaanermi akissutit uunga nassiuteqquneqarput:

iian@nanoq.gl