Suliffeqarfiit aamma pisortat oqartussaaffiisa ilinniartunik sungiusartunillu atorfinitsitsisarnikkut inuiaqatigiinnut akisussaaffii pillugit Inatsisartut inatsisaat nr. xx, xx. xxx 2019-imeersoq

Matumuuna ilassutitut tusarniaassutigalugu Suliffeqarfiit aamma pisortat oqartussaaffiisa ilinniartunik sungiusartunillu atorfinitsitsisarnikkut inuiaqatigiinnut akisussaaffii pillugit Inatsisartut inatsisaat nr. xx, xx. xxx 2019-imeersumut siunnersuut nassiunneqarpoq.

Siunnersuut piffissami 8. April - 13. maj 2019-imi tamanut ammasumik tusarniaassutaasimavoq, tamatumuuna tusarniaanermut akissutit arlallit takkullutik. Tusarniaanermut akissutit taakku tunngavigalugit allannguutinik annertunerusunik arlalinnik suliaqarnissaq pisariaqartinneqarsimavoq.

Annertunerusunik pingaaruteqartutut isigineqartariaqartunik allannguuteqartoqarmat siunnersuut ilassutitut tusarniaassutitut nassiunneqarpoq.

Tusarniaanermit kingullermit siunnersuut annertuumik pisariillisagaavoq.

Maannakkut sungiusartarfissanik paasisitsiniaanerup pitsaanerusup qularnaarnissaanut, illua’tungeriit akornanni suleqatigiinnerup annertusinissaanut, aamma inunnik ilinniartutut sungiusartutulluunniit inissarsiortunik pisortaqarfiit suliffeqarfiillu ilinniartussarsiortut imaluunniit sungiusartussarsiortut tamakku tulluartussarsiornissaannut pitsaanerusumik tunngavigisassap qularnaarnissaanut siunnersuut kaammattuuteqalerpoq.

Siunnersuummi allannguutit
Siunnersuut malillugu maannakkut suliffimmi ilinniartoqarfittut imaluunniit sungiusartoqarfittut akuerisaanissaminnut pisortaqarfiit suliffeqarfiillu suliaqarfigisaminnik inuussutissarsiutinut ilinniarfinnut attaveqarnissaminnut pisussaatitaalerput.

Siunnersuut malillugu pisortaqarfiit suliffeqarfiillu ilinniartunut sungiusartunullu qanoq amerlatigisunut akuerisaanertik ilisimatitsissutigalugu Naalakkersuisut suliffissarsiorfittut nittartagaanni nalunaarsuisussaapput.

Siunnersuut malillugu pisortaqarfiit suliffeqarfiillu inuussutissarsiutinut ilinniarfinnit akuerisaaffigisamittut amerlassusilinnik ilinniartunik imaluunniit sungiusartunik atorfinitsitsinissaminnut pisussaaffeqarput. Tamanna pisinnaassanngippat ”malittariuk imaluunniit nassuiaruk”-mik tunngavigisaq malillugu pisussaaffigisap piviusunngortinneqannginneranut patsisaasoq nassuiassavaat.

Siunnersuut malillugu pisortat suliffeqarfiillu inuttassarsiuilluni ussassaarutip tamanut saqqummiuttarnissaat suli piumasaqaataavoq. Siunnersuut malillugu siunertamut tassunga Naalakkersuisut suliffissarsiorfittut nittartagaa atorneqassaaq.

Siunnersuut malillugu inuit ilinniagaqarfimmi tiguneqarnissaq pillugu qinnuteqarsimasut aamma Naalakkersuisut suliffissarsiorfittut nittartagaanni CV-liornissamut aamma pisussaaffeqarput, taamaalillutik imminnut nassaarinissaminnut pisortaqarfiit, suliffeqarfiit ilinniagaqarniarnermillu qinnuteqartut pitsaanerusumik toqqammavissaqassammata. Tamanna amerlanerit suliffimmi ilinniarfittut imaluunniit sungiusarfittut inissarsinissaannik kinguneqassasoq naatsorsuutigineqarpoq.

Siunnersuutip maannakkut iluserisaa tassaavoq tusarniaanermut akissutit takkussimasut tamakku isummerfigineqarnerisa ilanngussornerisalu inernerisaat.

Siunnersuummit sulisorisanut 12-ikkaanut tamanut ilinniartumik imaluunniit sungiusartumik ataatsimik atorfinitsitsinissaq pillugu siusinnerusukkut atorfinitsitsinissamut piumasaqaat peerneqarpoq. Siunnersuummit pisortat piviusunngortitsinngitsoornerini ilinniartunut sungiusartunullu ilapittuutissanik koruuninik 30.000-inik akiliuteqartarneq pillugu aalajangersagaq peerneqarpoq.

Piumasaqaat sinnerlugu naapertuutsitsisunut suliffeqarfinnut namminersortunut ajunngitsorsiassanik aaqqiissutaasoq aamma peerneqarpoq.

Ilinniartunut sungiusartunullu aningaasaateqarfimmik ilusiliarisaq peerneqarpoq.

Siunnersuummit matuminnga pisortat neqerooruteqartitsisarnerannut atatillugu ilinniartunik sungiusartunillu inatsisilersuinermut tunngasutut aalajangersakkat peerneqarput, paarlattuanik tamanna inatsisaasuni allani inatsisilersugaqarnissaq sulissutigineqarluni.

Qulaani pineqartut tamakkiisuunngillat, pingaarnertulli tassaallutik tamanut ammasutut tusarniaanerup kingornatigut siunnersuummi pingaarnertut allannguutaasunut takussutaasut.

Tusarniaaffiup killinga
Oqaaseqaataasinnaasut kingusinnerpaamik nal. 12 tallimanngorneq 9. august 2019-imi nassiuteqquneqarput.

 

Tusarniaanerup suunera:

Inatsisartut inatsisaat

Naalakkersuisoqarfik:

Aatsitassanut, Suliffeqarnermullu Naalakkersuisoqarfik

Saqqummiunneqarfia:

02 aggusti 12:00:00

Tusarniaanermi piffissaliussaq:

09 aggusti 12:00:00

Tusarniaanermi akissutit uunga nassiuteqquneqarput:

asn@nanoq.gl