Tuttunniarnissamut umimmanniarnissamullu piffissaliussat pisassiissutillu – Aasaanerani aamma Ukiaanerani 2019

Matumuuna ukiaanerani 2019-imi piffissaliussat piniarfiusussat, tuttutassiissutit kiisalu umimmattassiissutit pillugit siunnersuutit tusarniutigineqalerput.

Pinngortitaleriffik martsimi 2018-mi Piniarfik 2-mi – Sisimiut-Kangerlussuaq – tuttunik umimmannillu kisitsisimapput, Piniarfimmilu Akia-Maniitsoq-mi kiisalu Piniarfimmi Ameralik-mi martsimi 2019-mi tuttunik kisitsisimallutik. Kisitsinermiit inaarutaasumik nalunaarusiat november 2019 naammassineqarnissaat Pinngortitaleriffimmiit ilimasaarutigineqarpoq taamaammallu Pinngortitaleriffik maannamut siunnersuisinnaanani nalunaarpoq. Taamaattumik tusarniaassutigineqartut 2018-mi aasaaneranut ukiaaneranullu naleqqiullugu allannguuteqanngillat Ivittuuni umimmaat eqqaassanngikkaanni.

Tuttut aamma umimmaat ukiup qanoq ilinera najoqqutaralugu pitsaanerpaamik piniarneqartarnissaat APNN-miit pingaartinneqarpoq. Taamaammat tuttut sapinngisamik aasaanerani ukiaaneranilu piniarneqartarnissaat aamma umimmaat aasaanerani, ukiaanerani kiisalu ukiuunerani piniarneqartarnissaat anguniarneqartarpoq.

Ivittuuni apriilimi 2019-mi minnerpaaffiliinikkut umimmannik kisitsisoqarpoq tamannalu pillugu Ivittuuni pisassiissutit nutaat tusarniutigineqarlutik.

 

Tuttut

1.       Piniarfik 1, 2, 3, 4, 5, 6, 7 kiisalu 8: Inuussutissarsiutigalugu tuttunniarneq 1. augusti-mi aallartissaaq 15. oktoberi ilanngullugu ingerlassalluni.

2.       Piniarfik 1, 2, 3, 4, 5, 6, 7, kiisalu 8: Sunngiffimmi tuttunniarneq 1. augustimi aallartissaaq 30. septembari ilanngullugu ingerlassalluni. Aqutsiveqarfimmi Nuuk-mi sunngiffimmi piniartunut ataasiakkaanut piniarfimmut ataatsimut taamaallaat akuersissummik ataatsimik tunniussisoqartassaaq. Piniarfik 3-mut akuersissut ataaseq aamma Piniarfik 4-mut akuersissut ataaseq. Akuersissut ataaseq tuttunik 5-nik naleqarpoq.

3.       Piniarfik 9 aamma 10 (Kangerluarsorujak, Nuna Prudhoe kiisalu Nuna Inglefield): Inuussutissarsiutigalugu aamma sunngiffimmi tuttunniarneq 1. augustimi aallartissaaq 31. decembari ilanngullugu ingerlassalluni.

 

Tunngavilersuutit: Tuttunniarnermi 2018-imi sunngiffimmi piniartunut aqutsiveqarfik Nuummeersunut 2018-mi 1. maaji sioqqullugu piniarnermut allagartamik akiliinikunut piniarfimmut ataatsimut akuersissummik ataasiinnarmik tunniussisoqarpoq. Taamaaliornikkut akuersissutit 2.287-it tunniunneqarput tassalu piniarfimmut Akia-Maniitsumut akuersissutit 1.162-it piniarfimmullu Ameralimmut akuersissutit 1.125-it. Kisiannili taakkuninnga taamaallaat 771-it pisanik nalunaaruteqarnertalimmik utertinneqarlutik tassalu taamaallaat 34%-ii, tamannalu pillugu tuttut piniarfinni taakkunani marlunni qanoq sakkortutigisumik piniarneqartarnerat tuttoqatigiillu qanoq innerat Pinngortitaleriffimmut aamma APNN-imut nalileruminaalluni.

APNN-ip kommunit qanimut suleqatigalugit akuersissutinik utertitsisarneq malinnaaffigivaa utertinneqartannginnerallu akuersissutinik qinnuteqarsinnaanermut kinguneqarsinnaassaaq.

 

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniarnermilu atornissaat inerteqqutaammata.

 

Umimmaat

4.       Aqutsiveqarfik Maniitsoq: Piniarfik 1-mi, 3-mi aamma 4-mi inuussutissarsiu-tigalugu sunngiffimmilu umimmanniarneq 1. augustimi aallartissaaq 15. oktobari ilanngullugu ingerlassalluni. Kulavaat norrallit aamma tiggaat tammajuitsussanik piniartitsinermut atugassat piniaqqusaassanngillat.

5.       Aqutsiveqarfik Sisimiut: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni umimmattassiissutillu 400-put. Kulavaat norrallit aamma tiggaat tammajuitsussanik piniartitsinermut atugassat piniaqqusaassanngillat.

6.       Aqutsiveqarfik Qaanaaq: Piniarfimmi Kangaarsummi inuussutissarsiutigalugu sunngiffimmilu umimmanniarnissamut umimmattassiissutit 40-pput. Piniarfimmi Nuna Inglefield aamma Nuna Prudhoe-mi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 60-iussapput. Kulavaat norrallit aamma tiggaat tammajuitsussanik piniartitsinermut atugassat piniaqqusaassanngillat.

7.       Aqutsiveqarfik Ivittuut: Inuussutissarsiutigalugu aamma sunngiffimmi piniarnissamut piffissaliussaq allannguuteqarani 1. augustimiit 15. decembari ilanngullugu siunnersuutigineqarpoq. Minnerpaaffiliinikkut kisitsineq apriilimi 2019-mi ingerlanneqartoq tunngavigalugu umimmattassiissutitut siunnersuutigine-qarpoq umimmaat 1-2-ukiullit 30-t, taakkunannga angutivissat 12-it arnavissallu 18-it. Kulavaat norrallit aamma tiggaat tammajuitsussanik piniartitsinermut atugassat piniaqqusaassanngillat.

8.       Aqutsiveqarfik Sigguk: Umimmattassiissutit 150-iunissaat siunnersuutigineqarpoq 2016-mi, 2017-mi aamma 2018-mi assingusumik. Kulavaat norrallit aamma tiggaat tammajuitsussanik piniartitsinermut atugassat piniaqqusaassanngillat.

 

Tunngavilersuutit: Qaanaap aqutsiveqarfiani Kangaarsummi (Kap Atholl) 2015-mi minnerpaaffiliinikkut kisitsereernerup kingorna inuussutissarsiutigalugu aamma sunngiffimmi piniarnissamut umimmattassiissutit allannguuteqaratik 40-pput, imm. 6 takuuk. Nuna Inglefield-imi umimmanniarnissamut piniarfik 2017-mi kujammut Nuna Prudhoe ilanngullugu allineqarpoq umimmaat kujavartertalermata, imm. 6 takuuk.

Siggummi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 150-iussapput, 2016-mi tusarniaareernerup kingorna aalajangerneqartutut, kisianni piniarfimmi minnerpaaffiliinikkut kisitsisoqaqqinn-ginnerani qaffanneqaqqissanngillat, imm. 8 takuuk.

 

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat umimmannik malersuinermi piniarnermilu atornissaat inerteqqutaammata. Qamuteralaat, ATV-t kiisalu qulimiguullit atorlugit umimmannik ungoorinissaq immikkut APNN-imut qinnutigineqarsinnaavoq.

 

Sunngiffimmi piniarnermut allagartap 2019-mi 1. maaji sioqqullugu akilereersimanissaa pillugu piumasaqaat atuutinneqarpoq. Taamatullu sunngiffimmi piniarnermut akuersissutit inunnut Kalaallit Nunaanni najugalittut inuit nalunaarsorsimaffiannut nalunaarneqarsimasunut ukiunilu qaangiuttuni marlunni nalunaarsorneqareersimasunut taamaallaat tunniunneqarsinnaanerat pillugu piumasaqaat atuutinneqarluni.

 

Tusaniaanermut akissuteqaatit kingusinnerpaamik juunip 24-iani 2019-mi APNN-mut uunga apn@nanoq.gl aamma numl@nanoq.gl nassiunneqassapput, akissuteqanngikkaannilu tusarniaanermik akuerinninnertut isigineqassaaq.

Sammisaq:

Piniarneq

Naalakkersuisoqarfik:

Aalisarnermut Piniarnermut Nunalerinermullu Naalakkersuisoqarfik

Saqqummiunneqarfia:

28 maaji 13:35:00

Tusarniaanermi piffissaliussaq:

24 juni 00:00:00

Tusarniaanermi akissutit uunga nassiuteqquneqarput:

apn@nanoq.gl