Uunga missingiut: “Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. xx, x.xx 2019-imeersoq” pillugu tusarniaaneq

Isumaginninnermut Inatsisinillu Atuutsitsinermut Naalakkersuisoqarfiup matumuuna uunga missingiut: “Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. xx, x.xx 2019-imeersoq” pillugu tusarniaaneq pisortatigoortumik tamanut nassiuppaa.

Inatsisartut UPA2019-imi ataatsimiinnermi Inuit innarluutillit tapersersorneqarnissaannut Inatsisartut inatsisaat akuersissutigaat. Inuit innarluutillit tapersersorneqarnissaannut Inatsisartut inatsisaat aalajangersakkanik arlalinnik imaqarpoq, inunnut innarluutilinnut suliassaqarfimmi nakkutilliisarneq pillugu malittarisassanik ersarinnerusunik Naalakkersuisut aalajangersaanissaannut pisussaaffiliisunik aamma periarfissiisunik.

Tamanna tunngavigalugu Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaannut missingiut nutaaq suliarineqarsimavoq, taannalu siumut isigaluni inunnut innarluutilinnut suliassaqarfimmi nakkutilliisarneq pillugu malittarisassanik imaqassaaq, matumani maleruagassat uku pillugit:

- Kommunalbestyrelsit inunnut innarluutilinnut najugaqarfissatut neqeroorummi najugaqartunut inummut sammititamik nakkutilliisarnerat (kapitali 6),
- Kommunalbestyrelsit najugaqaqatigiiffiit aamma najugaqarfiit illersugaasut pillugit ingerlatsinermut sammititamik nakkutilliisarnerat (kapitali 7), aamma
- Naalakkersuisut Nakkutilliinermik Ingerlatsiviata inunnut innarluutilinnut ulloq unnuarlu neqeroorutit pillugit ingerlatsinermut sammititamik nakkutilliisarnerat (kapitali 8).
Tamatuma saniatigut utoqqaat illuanni ingerlatsinermut sammititamik kommunalbestyrelsit nakkutilliisarnerat pillugu malittarisassanik missingiut imaqarpoq. (kapitali 9).

Nalunaarut taamaalilluni inuit innarluutillit pillugit kommunit nakkutilliisarnerat pillugu malittarisassat annertuumik nutarteriffigineqarnerannik kinguneqarpoq, tamatumalu saniatigut kommunalbestyrelsit utoqqaat illuini ingerlatsinermut sammititamik nakkutilliisarnerat pillugu malittarisassanik ullutsinnut naleqquttunik aalajangersaavoq.

Eqqumaffigeqquneqarpoq nalunaarummi kapitalini 1 – 5-ini aamma kapitali 10-mi aalajangersakkat, Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. 3, 3. april 2019-imeersumit maanna atuuttumit malittarisassanik atuuttunik ingerlatitseqqiinerummata, taannalu naalakkersuisoqarfiup maanna tusarniaavigineqartunut piffissami 16. januar – 20. februar 2019-imi aamma tusarniaassutigisimavaa.
Taamaallaat allannguuteqartoqarsimavoq ukunani:
- § 1, imm. 2 peerneqarsimavoq, taamaalillugu kommunalbestyrelsinik pingaarnertut nakkutilliineq, kommunalbestyrelsip taamaallaat inunnik isumaginninnermut inatsisinik aqutsineranik ingerlatsineranillu pingaarnertut nakkutilliinerusoq erseqqissarneqarusummat, tassa najugaqaqatigiiffiit, najugaqarfiit illersugaasut utoqqaallu illui pillugit nakkutilliinerunani, taama ingerlatsinermut sammititamik nakkutilliineq kommunit suliassarimmassuk, nalunaarutip kapitaliini 7-imi aamma 9-mi aalajangersarneqartoq,
- § 16, imm. 3 allanngortinneqarsimavoq, taamaalilluni kommunalbestyrelsit ilaqutariinnut paarsisartunut ukiumoortumik ingerlatsinermut sammititamik nakkutilliinerannut atatillugu peqqussuteqartoqarsinnaajunnaarluni.
- §§-it 29-p aamma 30-p oqaasertai naleqqussarneqarsimapput. Oqaatsitsigut naleqqussaanerit aalajangersakkanik allannguuteqartitsinngillat.
Missingiummut nassiussamut oqaaseqaataasinnaasut Isumaginninnermut Inatsisinillu Atuutsitsinermut Naalakkersuisoqarfiup tigoreersimassavai kingusinnerpaamik ulloq 6. december 2019-imi.

Tusarniaassutigineqartumut akissutit e-mailikkut uunga iian@nanoq.gl imaluunniit allakkatigut uunga nassiunneqassapput: Isumaginninnermut Inatsisinillu Atuutsitsinermut Naalakkersuisoqarfik, Postboks 260, 3900 Nuuk.

Sammisaq:

Inunnik isumaginninneq

Tusarniaanerup suunera:

Nalunaarut

Naalakkersuisoqarfik:

Isumaginninnermut, Inatsisinillu Atuutsitsinermut Naalakkersuisoqarfik

Saqqummiunneqarfia:

08 novembari 15:20:00

Tusarniaanermi piffissaliussaq:

06 decembari 00:00:00

Tusarniaanermi akissutit uunga nassiuteqquneqarput:

iian@nanoq.gl