Pillugu: Ilisinissamik toqusulluunniit timaanik ikuallaanissamik kiisalu arsat toqqortarineqarnissaannik, avinnissaannik siaruarternissaannillu qinnuiginninneq pillugu Namminersorlutik Oqartussat nalunaarutissaattut siunnersuummik tusarniaaneq

Ilisinissamik toqusulluunniit timaanik ikuallaanissamik kiisalu arsat toqqortarineqarnissaannik, avinnissaannik siaruarternissaannillu qinnuiginninneq pillugu nalunaarutissatut siunnersuut tusarniaassutigineqartoq ilanngullugu nassiunneqarpoq.

Siunnersuuteqarnermut tunngaviuvoq Inunngortunik toqusunillu nalunaaruteqartarneq, ilisinerit iliveqarfiillu pillugit Inatsisartut inatsisaanni nr. 13, 6. Juni 2016-imeersumi aalajangersakkat arlallit Naalakkersuisunut pisussaaffiliinerat imaluunniit susassaqarfimmi malittarisassanik Naalakkersuisut aalajangersaasinnaanerat. Naalakkersuisut assersuutigalugu ilisinissamik toqusulluunniit timaanik ikuallaanissamik qinnuiginnittarneq pillugu malittarisassanik aalajangersaassapput, tassunga ilanngullugit kina qinnuiginnissinnaanersoq aamma qinnuiginninneq qanoq saqqummiunneqassanersoq pillugit aalajangersaassapput.

Inatsisartut inatsisaata Inatsisartuni suliarineqarneranut atatillugu Kultureqarnermut, Ilinniartitaanermut Ilageeqarnermullu Ataatsimiititaliap Naalakkersuisut kaammattorpai qummuattamiititsisarnermut aamma arsanik siaruarterisarnermut tunngatillugu eqaannerusumik suleriaaseqaqqullugit. Inatsisissatut siunnersuut aqqutigalugu toqusup ilaqutaasa kissaatigisartagaat naammassineqarsinnaanerulissapput. Ataatsimiititaliap isumaliutissiissutaata malitsigisaanik inatsit tunngavigalugu aalajangersakkat marluk ilanngunneqarput, Naalakkersuisut taamaalillutik nalunaarut aqqutigalugu periarfissaqalerput qummuattap palaseqarfimmiunngitsoq allamili uninngatikkallarneqarsinnaanera pillugu malittarisassaliornissamut aamma arsap allatut qanoq ajunngitsumik isumagineqarsinnaanera, tassunga ilanngullugu arsap nunatsinni sumiiffimmut siaruarterneqarnissaanut akuersissuteqarnissamut piumasaqaatissat akuersissummillu qinnuteqarnissamut qanoq iliortoqarsinnaanera pillugit malittarisassaliornissamut. Inatsit tunngavigalugu aalajangersakkat taakku nalunaarummi matumani atuuttussanngortinneqassapput.

Nalunaarutissatut siunnersuut kapitalinut sisamanut avitaavoq, pineqartut tassaapput ilisinissamik imaluunniit toqusup timaanik ikuallaanissamik qinnuteqarnissaq, qummuattanik uninngasuuteqartarneq, arsamik avitsisarneq siaruarterisarnerlu kiisalu naammagittaalliorsinnaanermut pineqaatissiinissamullu aalajangersakkat.

Oqaaseqaatigineqarsinnaasut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi kingusinnerpaamik ulloq 14. juni 2019 tiguneqareersimassasut qinnutigineqarpoq. Oqaaseqaatit Naalakkersuisoqarfiup pisortatigoortumik mail-adresseanut uunga nassiuteqquneqarput: ikin@nanoq.gl imaluunniit Naalakkersuisoqarfiup pisortatigoortumik najugaqarfianut:

Ilinniartitaanermut, Kultureqarnermut, Ilageeqarnermullu Naalakkersuisoqarfik, Postbox 1029, 3900 Nuuk.

Tusarniaanerup suunera:

Nalunaarut

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

09 maaji 15:22:00

Tusarniaanermi piffissaliussaq:

14 juni 00:00:00

Tusarniaanermi akissutit uunga nassiuteqquneqarput:

ikin@nanoq.gl