Eqqakkanut iliuusissanut pilersaarut 2020-2031 allaqqitassiaq pillugu tusarniaaneq

Pinngortitanut Avatangiisinullu Naalakkersuisoqarfik kommuninit ilanngussiffigineqartumik eqqakkanut iliuusissanut pilersaarut 2020-2031 allaqqitassiamik suliaqarsimavoq. Eqqakkanut iliuusissanut pilersaarut tamanut ammasumik tusarniutigineqassaaq piffissami oktobari 18-niit novembari 22-nut 2019.

Naalakkersuisut nuna tamakkerlugu mingutsitsinngitsumut allanngortitsinerup ilaattut eqqakkannik passussinerup suli annerusumik pitsanngorsarneqarnissaa kissaatigaat. Naalakkersuisut immikkut eqqakkanik passussineq annertuumik pitsannguiffiginiarpaat. Eqqakkanut iliuusissanut pilersaarummik siunertarineqarpoq, nuna tamakkerlugu eqqakkanut politikkimut najoqqutassanik aalajangersaanissaq aamma kommunit eqqakkanut pilersaarusiornissaannut passussinissaannullu killiliussanik aalajangiinissaq.

Eqqakkanut suliassaqarfik tunngaviusumik allanngoriartorpoq. Eqqakkanut suliassaqarfimmi suliniutinut ukiuni aggersuni tunngavik, tassaavoq ataatsimoorussamik nuna tamakkerlugu eqqakkanut iluarsiissummik atortuulersitsinissaq. Tamanna isumaqarpoq, ukiuni aggersuni nuna tamakkerlugu, eqqakkanut ikuallaavinnik marlunnik nutaanik pilersitsisoqassasoq, taakku kommunit ataatsimoorussamik eqqakkanik ingerlatseqatigiiffianit ESANI A/S-imit ingerlanneqassapput. Saniatigut nuna tamakkerlugu tigooqqaavinnik pilersitsisoqassaaq, taakkunannga eqqakkat nuna tamakkerlugu ikuallaavinnut assartorneqartassapput. Eqqakkat immikkoortukkaat allat atoqqinneqassapput imaluunniit akisussaasumik allatut passunneqassallutik. Nutaamik aaqqissuinernut siunertaavoq, eqqakkanik passussineq pitsaasoq, avatangiisinut peqqissutsimullu akisussaasoq, aamma eqqakkanik pitsaanerpamik atueqqinneq, soorlu nukissiorneq il. il. qulakkiissallugit.

Eqqakkanut iliuusissanut pilersaarut aammattaaq eqqakkanik pitsaaliuinermik, atoqqiinermik/allamut atoqqiinermik kiisalu piujuartitsinermik, innuttaasunik inuussutissarsiortunillu peqataatitsinermik ukkataqarpoq.

Eqqakkanut iliuusissanut pilersaarut suliassaqarfinnut tallimanut anguniakkanik suliniutinillu imaqarpoq:

  1. Pilersaarusiorneq aqutsinerlu
  2. Paasissutissat innuttaasunillu peqataatitsineq
  3. Eqqakkanik pitsaaliuineq asuliinnartitsinertaqanngitsumillu aningaasanik aqutsineq
  4. Eqqakkanik passussinermi tigooraaveqarfiit
  5. Ataatsimut ikuallaavimmik iluarsiissut
Eqqakkanut iluusissatut pilersaarut 2020-2031 eqqakkanut suliassaqarfimmi immikkoortumut pilersaarutitut atussaaq taamaalillunilu eqqakkanut iliuusissanut pilersaarut 2008-meersoq taarserlugu.

Tusarniaanermut akissutit Pinngortitamut Avatangiisinullu Naalakkersuisoqarfimmut mail adressimut: pan@nanoq.gl nassiunneqassapput novembari 22-at 2019 nallertinnagu.

Sammisaq:

Avatangiisit

Naalakkersuisoqarfik:

Pinngortitamut, Avatangiisinullu Naalakkersuisoqarfik

Saqqummiunneqarfia:

18 oktobari 13:15:00

Tusarniaanermi piffissaliussaq:

22 novembari 23:30:00

Tusarniaanermi akissutit uunga nassiuteqquneqarput:

pan@nanoq.gl