”Missingersuut uunga: Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat nr. Xx, xx. xxx 2018-imeersup”

Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat nr. Xx, xx. xxx 2018-imeersumut missingersuut ilanngunneqartoq tusarniutigalugu nassiunneqarpoq.

UPA2017-imi Meeqqat tapersersorneqarnissaannut Inatsisartut inatsisaat Inatsisartut akuersissutigaat. Meeqqat tapersersorneqarnissaannut Inatsisartut inatsisaat aalajangersakkanik arlalinnik imaqarpoq, taakkunani aalajangersarneqarluni Naalakkersuisut nalunaarutinik suliaqarnissaminnut peqquneqassasut periarfissaqartullu.

Tassunga atatillugu Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaat nr. 19, 24. novembari 2017-imeersoq Isumaginninnermut Inatsisinillu Atuutsitsinermut Naalakkersuisoqarfiup suliaraa, taannalu 24. november 2017 atuutilerpoq.

Meeqqanut ulloq unnuarlu paaqqinniffinnik pilersitsineq ingerlatsinerlu pillugit Namminersorlutik Oqartussat nalunaarutaannut iluarsaatamut missingersuut nassiunneqartoq allannguutinik aalajangersimasunik imaqarpoq, matumani:

1. Nammineq ineqarnissamik piumasaqaatip avaqqunneqarsinnaanera periarfissinneqarpoq, tamanna meeqqat ataasiakkat, matumani qatanngutigiit, ineqatigiissinnaanerat (§7) perorsaanermi pisariaqartinneqartutut isigineqarpat.
2. Ulloq unnuarlu paaqqinnittarfinnit massakkut atuuttunit illuutit pigineqartut eqquutitsinissaq ajornartippassuk, ineeqqap aaqqissuunneqarnissaanut piumasaqaatit (§7) Isumaginninnermi Aqutsisoqarfimmit akuersissuteqarnikkut avaqqunneqarallarsinnaapput.
3. Akuersissutit piumasaqaatitallit tunniunneqarsinnaanerat ammaanneqarpoq, tassani piffissami ukiut pingasut tikillugit (§§ 17 aamma 32), akuerineqarnissamut piumasaqaatit malinnagit, immikkut akuersissummik tunniussisoqarsinnaalluni.
4. Kommunalbestyrelsit meeqqanut ulloq unnuarlu paaqqinniffinni inissiineranni (§ 50) ullormut unnuamullu akigititami sullissinerit suut ilaatinneqarnersut pillugit erseqqissaasoqarpoq.
5. Naatsorsuutit missingersuutillu pillugit piumasaqaatit pillugit (§§ 39-44) arlalinnik erseqqissaassuteqartoqarpoq.

Allannguutit aalajangersimasut taaneqartut saniatigut oqaatsitigut erseqqissaatinik arlalinnik missingersuut imaqarpoq.

Missingersuummut nassiunneqartumut oqaaseqaataasinnaasut Isumaginninnermut Inatsisinillu Atuutsitsinermut Naalakkersuisoqarfimmut nassiuteqquneqarput kingusinnerpaamik ulloq 7. november 2018.

Tusarniummut akissutut e-mailikkut uunga iian@nanoq.gl-imut imaluunniit allakkatigut uunga nassiunneqassapput: Isumaginninnermut Inatsisinillu Atuutsitsinermut Naalakkersuisoqarfik, Postboks 260, 3900 Nuuk.

Sammisaq:

Inunnik isumaginninneq

Tusarniaanerup suunera:

Nalunaarut

Naalakkersuisoqarfik:

Isumaginninnermut, Inatsisinillu Atuutsitsinermut Naalakkersuisoqarfik

Saqqummiunneqarfia:

04 oktobari 10:49:00

Tusarniaanermi piffissaliussaq:

07 novembari 23:30:00

Tusarniaanermi akissutit uunga nassiuteqquneqarput:

iian@nanoq.gl