Inatsisissatut siunnersuut iluarsisaq pillugu tusarniaassut – Nunamit nunamut nalunaarusiortarneq aamma nakkutigisaasumik iliuutsinut uppernarsaasiinissamik piumasaqaat

Inatsisissatut siunnersuut iluarsisaq tusarniutigalugu Aningaasaqarnermut Naalakkersuisoqarfimmit matumuuna nassiunneqarpoq.

Aningaasarsianit akileraarutit pillugit Inatsisartut inatsisaata allanngortinneqarneranik inatsisissatut siunnersuutissamut missingiummut ulloq 12. juni tusarniutigalugu nassiunneqartumut ilanngussassanik pingaarutilinnik marlunnik siunnersuut imaqarpoq.

Tusarniaanermi siunnersuutit ilanngunneqartut siunnersuutissamut tapiliussanik annertunerusumik imaqarput.

Siunnersuutip iluarsisap tusarniutigineqarneranut akissuteqarnissamut killiliunneqarpoq: 10. august 2018.

Inatsisissatut siunnersuummut oqaaseqaataasinnaasut e-mailikkut uunga nassiuteqquneqarput: oed@nanoq.gl aamma CC-iilerlugu uunga pnil@nanoq.gl

Aammattaaq tusarniaassut www.Naalakkersuisut.gl-imi tusarniaanermut iserfissami takuneqarsinnaavoq.

Siunnersuutip tunuliaqutaa
Innuttaasut suliffeqarfiillu akileraarutinik akiliinngitsoornerit il.il. aqqutigalugit akileraarutinut akiliutit annikillisinneqarnissaannut periarfissaat nunani tamalaani annertuumik eqqumaffiginiarneqarput. Taamaalillunilu OECD-p ilaatigut ingerlappaa BEPS-imik suliniut (Base Erosion and Profit Shifting) suliniutini akileraarfimmik neriuinernut sinneqartoorutinillu nuussinernut tunngassutilik. Suliniummi tamatumani pingaarnertut anguniarneqartoq tassaavoq nalilinnik pilersitsisoqarfiusuni akileraartoqartarnissaanik siuarsaanissaq.

Kalaallit Nunaat ukiuni makkunani nunanit tamalaanit suliassaqarfiit ilaatigut nalilersorneqarpoq, tamatumani anguniarneqarluni Kalaallit nunaanni inatsisit matumanilu pingaartumik akileraartarnermut inatsit nunani tamalaani periutsinik arlalinnik eqquutsitsinersoq misissussallugu.

Suliamut tassunga atatillugu inatsisissatut siunnersuummik iluarsisamik suliaqarnissaq naapertuuttutut isigineqarpoq, tamatumani anguniarneqassalluni nakkutigisaasumik iliuutsit aammalu nunamit nunamut nalunaarusiornerit eqqarsaatigalugit OECD-mit kaammattuutit nunatsinni akileraartarnermut inatsimmi malinneqarnissaannik siuarsaanissaq.

1. Nakkutigisaasumik iliuutsit pillugit nammineerluni nalunaarsuisussaatitaaneq uppernarsaasussaatitaanerlu
Siunnersuutigineqarpoq nakkutigisaasumik iliuutsit pillugit nammineerluni nalunaarsuisussaatitaaneq annertusarneqassasoq illuatungerisanut tamarmik Kalaallit Nunaanni najugaqartunut iliuutsit ilaatilerlugit. Pisussaaffik tamanna ullumikkut taamaallaat atuuppoq nunani allaniittunut iliuutsit pineqartillugit.

Tamatuma saniatigut nakkutigisaasumik iliuutsinut atatillugu suliffeqarfiit uppernarsaasiinissaannut piumasaqaatit annertusineqassasut siunnersuutigineqarpoq. Uppernarsaasiinissamut piumasaqaammut malittarisassanik erseqqinnerusunik nalunaarutikkut aalajangersaanissamut Naalakkersuisut piginnaatinneqassasut siunnersuutigineqarpoq. Inatsisitigut tunngavissap OECD-p kaammattuutaanut naapertuuttunik uppernarsaasiinissamut piumasaqaatinik peqqusissutinik nalunaarutinik atuutsitsilernissamut atorneqarnissaa naatsorsuutigineqarpoq. Malittarisassat atuuffissaasa assigiinngisitaarsinnaanerat eqqarsaatigalugu suliffeqarfiit mikinerit uppernarsaasiinissamut piumasaqaammik sakkukinnerusumik pisussaaffilerneqassasut siunnersuutigineqarpoq. Taamaattumillu suliffeqarfiit 250-init ikinnerusunik sulisullit aammalu pigisanit nalilinnit tamarmiusunit 125 mio. kr.-init ikinnerusunik aningaasartallit imaluunniit 250 mio. kr.-inik kaaviiaartitallit uppernarsaasiinissamut piumasaqaammik sakkukinnerusumik pisussaaffilerneqassapput.

2. Nunamit nunamut nalunaarusiortarnissaq
Imm. 1-imut atatillugu suliffissuaqarfiit ukiumoortumik 5.700 mio.kr.-inik amerlanernilluunniit kaaviiaartitaqartut Kalaallit Nunaannilu il.il. angerlarsimaffeqartut nunamit nunamut nalunaarusiortarnissamik pisussaaffilerneqarnissaat siunnersuutigineqarpoq.


Inatsisissatut siunnersuummut nassuiaatinullu missingiutit ilanngunneqartut innersuussutigineqarput.

Tusarniaanerup suunera:

Inatsisartut inatsisaat

Naalakkersuisoqarfik:

Aningaasaqarnermut Naalakkersuisoqarfik

Saqqummiunneqarfia:

13 juli 14:22:00

Tusarniaanermi piffissaliussaq:

10 aggusti 00:00:00

Tusarniaanermi akissutit uunga nassiuteqquneqarput:

oed@nanoq.gl aamma CC-iilerlugu uunga pnil@nanoq.gl