Inuit innarluutillit tapersersorneqarnissaannut Inatsisartut inatsisaannut nr. xx, xx. xxx 2019-meersumut siunnersuummut tusarniaaneq.

Matumuuna uunga siunnersuut nassiunneqarpoq: Inuit innarluutillit tapersersorneqarnissaannut Inatsisartut inatsisaat nr. xx, xx. xxx 2019-imeersoq. Naatsorsuutigineqarpoq siunnersuut UPA2019-imi saqqummiunneqassasoq.

Isumaginninnermut Inatsisinillu Atuutsitsinermut Naalakkersuisoqarfik matumuuna uunga siunnersuummik nassiussivoq: Inuit innarluutillit tapersersorneqarnissaannut Inatsisartut inatsisissaannut nr. xx, xx. xxx 2019-meersussamut siunnersuummut pisortatigoortumik tusarniaaneq.

Oqartussaasuni akisussaaffiit suliassallu ersarissumik agguarneqarnerisigut, inunnut innarluutilinnut tamanut, suliassanik ingerlatsinerup aamma inatsisitigut isumannaatsuunerup nukittorsagaanissaa, inuit innarluutillit tapersersorneqarnissaannut Inatsisartut inatsisissaattut siunnersuummi pingaarnertut siunertarineqarpoq. Inuit innarluutillit pisinnaatitaaffii pillugit Naalagaaffiit Peqatigiit isumaqatigiissuutaannik siunnersuut tunuliaqutaqarpoq, aamma inuit taakkua nunami innuttaasut allat assigalugit pisinnaatitaaffeqarnissaat periarfissaqarnissaallu siunnersuutip qulakkiissallugu.

Suliniuteqarnermi innuttaasoq qitiutillugu ukkatarineqarpoq, tamannalu isumaqarpoq, inunnut ataasiakkaanut ataatsimullu isiginnilluni tapersersuineq ukkanneqartoq. Aammattaaq siunnersuut malillugu tapersiissutinik pisinnaaneq inunnut innarluutilinnut, taperserneqarnissamik pisariaqartitsisunut tamanut, atorneqarsinnaasunngornissaa ukkatarineqarpoq.

Naalakkersuisut UKA 2017-imi Inuit innarluutillit tapersersorneqarnissaannut Inatsisartut inatsisaannik saqqummiussaqarput. Taanna qinersisitsisoqarnera pissutigalugu atorunnaarpoq. Tamatuma kingorna siunnersuut nassiunneqartoq suliarineqarpoq, taannalu naatsorsuutigineqarpoq UPA 2019-imi saqqummiunneqassasoq.

Maannakkut siunnersuutaasoq UKA 2017-imi siunnersuummut saqqummiunneqartumut naleqqiullugu siunnersuutip ilusaa annertuumik allanngortinneqarpoq. Tassunga tunngaviuvoq atuisussamut piuminarsarneqarnissaa kissaatigineqarmat, taamaalilluni inatsisip sananeqarnerata ulluinnarni kommunini sulianik suliarinnittarnerit sapinngisaq tamaat malillugu malinniassammagu.

Tamatuma saniatigut Annertuumik innarluutillit ikiorserneqartarnerat pillugu Inatsisartut peqqussutaannut atuuttumut siunnersuummullu UKA 2017-imi saqqummiunneqartumut naleqqiullugu siunnersuut allannguutinik arlalinnik imaqarpoq, matumani ilaatigut ilanngullugit:

- Inuup innarluutillip nassuiarneqarnera Inuit innarluutillit pisinnaatitaaffii pillugit Naalagaaffiit Peqatigiit isumaqatigiissuutaa naapertorlugu allanngortinneqarpoq, tapiiffigineqarsinnaatitaassagaannilu annertuumik innarluuteqarnissamik piumasaqaat atorunnaarpoq.

- Qulaajaanerit iliuusissatullu pilersaarutit malittarisassiunneqarnerannik siunnersuut imaqarpoq. Tamatumuuna suliamik ingerlatsinermut atortussatut pingaartutut pingaarutilittullu iliuusissatut pilersaarut ukkanneqarpoq.

- Inunnut innarluutilinnut Sullissivimmik Nunamut Tamarmut Atuuttumik siunnersuisartussamik ilisimasallu pillugit katersiviusussamik kiisalu suliani immikkut pisariusuni kommuninut ikiuutaasussamik aamma pikkorissanernik allanngutsaaliuillunilu sungiusaanernik neqerooruteqartartussamik Naalakkersuisut ingerlatsissasut peqquneqarput.

- Aammattaaq ulloq unnuarlu neqeroorutinut suliassaqarfimmi nukissanik atuinerup pitsaanerpaaffia qulakkeerniarlugu kiisalu innuttaasup aamma ulloq unnuarlu neqeroorutip akornanni eqqortumik naleqquttoqarnissaa qulakkeerniarlugu qitiusumik inissiinissamut innersuussisarfimmik ingerlatseqqullugit Naalakkersuisut peqquneqarput.

- Inuit innarluutillit Pinerluttulerinermi inatsimmik unioqqutitsisimasutut pasisaasut imaluunniit eqqartuunneqartut siunissami Kalaallit Nunaanni inissinneqarsinnaanissaannut Naalakkersuisut ulloq unnuarlu neqeroorutinik matoqqasunik pilersitsisinnaanerat ingerlatsisinnaanerallu ammaanneqarpoq.

Siunnersuummut nassiunneqartumut oqaaseqaataasinnaasut Isumaginninnermut Inatsisinillu Atuutsitsinermut Naalakkersuisoqarfimmit kingusinnerpaamik ulloq 08-11-2018 tiguneqareernissaat qinnutigineqarpoq.


Tusarniaanermut akissut e-mailikkut iian@nanoq.gl.mut imaluunniit allakkatigut uunga nassiunneqassaaq:

Isumaginninnermut Inatsisinillu Atuutsitsinermut Naalakkersuisoqarfik Postboks 260 3900 Nuuk


Med venlig hilsen

Inussiarnersumik Inuulluaqqusillunga 

Isumaginninnermut Inatsisinillu Atuutsitsinermut Naalakkersuisoqarfik

Sammisaq:

Inunnik isumaginninneq

Tusarniaanerup suunera:

Inatsisartut inatsisaat

Saqqummiunneqarfia:

05 oktobari 12:29:00

Tusarniaanermi piffissaliussaq:

08 novembari 23:59:00

Tusarniaanermi akissutit uunga nassiuteqquneqarput:

iian@nanoq.gl