Uunga siunnersuutip: Akileraartarnermi ukiumoortumik naatsorsuutinut ilalu ilanngullugit piumasaqaatit pillugit Namminersorlutik Oqartussat nalunaarutaat nr. xx, xx. xxx 2018-imeersoq, tusarniaassutigineqarnera

Siunnersuutip imarisai:

Siunnersuutigineqarpoq akileraartarnermi ukiumoortumik naatsorsuutinut il.il. piumasaqaatit pillugit nalunaarutaat nr. 27, 1. december 2006-imeersoq, nalunaarummik nutaamik taarserneqassasoq.

Nalunaarummi allannguutit aaqqissuinermut, erseqqissaanermut najoqqutassanullu tunngassuteqarput. Aaqqissuinikkut erseqqissaanikkullu allannguutinut siunnerfigineqarpoq nalunaarutip pitsaanerulersinnissaa, taamaalillunilu inuussutissarsiutinik ingerlatsisuni suliffeqarfinni il.il. pineqartunut ilaasuni maleruagassat paasiuminarnerulernissaat.

Najoqqutassatigut allannguutini ilaapput inunnut inuussutissarsiutinik ingerlatsisunut, taamaallaat naatsorsuutini allattukkanik pingaarnernik allattuisussanut kaaviiaartitanut killiliussat qaffanneqarnerat, kiisalu akiligassiissummi piumasaqaatinik aammalu tamatuminnga malinninnginnermi sunniutaasussanik ilanngussineq.

Kaaviiaartitanut killiliussat qaffanneqarnerisa malitsigisaanik inuit inuussutissarsiummik ingerlataqartut arlallit akileraarutitigut ukiumoortumik naatsorsuutinik nassiussinngissinnaapput.

Siunnersuut tamatuma saniatigut, akiligassiissummik, kredinota-mik il.il. tunniussisoqartassasoq piumasaqaammik imaqarpoq aammalu taakkununnga ilusiliussassanut piumasaqaatinik aalajangersaaviulluni. Akiligassiissumik tunniussisoqarnissaanik piumasaqaat taamaattoq, nalinginnaasumik suliffeqarfinni inuussutissarsiummik ingerlataqartuni il.il. akileraarutitigut misissuinissamut pitsaanerusunik tunngavissaqarnissaq qulakkeerniarlugu, pisariaqarpoq.

Akiligassiissumik tunniussisoqarnissaanik piumasaqaammi, nalinginnaasumik elektroniskimik paasissutissanik paarlaasseqatigiittarnerup annertunerulernissaata tungaanut nalinginnaasumik ineriartortitsinissaq tunngavissinneqassaaq. Assersuutigalugu pisortanut elektroniskimik akiligassiisarnermik atuisarnerup kukkunerit pisinnaaneri annikillisissavaat aammalu pisortani suliassaqarfimmi sunniuteqarluarnerulersitseqataassalluni.

Naatsorsuutini allattueriaatsip atuutereersup atorneqarnerani, ilusiliussassanut piumasaqaatit tamarmik naammassineqarsinnaassasut naliliisoqarpoq. Suliffeqarfiit inuussutissarsiummik ingerlataqartut arlallit ullumikkut ilusiliussassanut piumasaqaatinik naammassinnereerput.

Nalunaarummi allannguutit imarisai pingaarnerit tassaapput:

  • Ukiumut kaaviiaartitanut killiliussaq 400.000 koruuninit 1.000.000 koruuninut qaffanneqarnerat. Allanngortitsinerup malitsigisaanik inuit inuussutissarsiummik ingerlataqartut arlallit akileraarutitigut ukiumoortumik naatsorsuutinik nassiussinngissinnaalissapput.
  • Akileraarutitigut ukiumoortumik naatsorsuutini, angusanut naatsorsukkat, oqimaaqatigiissitsineq aammalu suliffeqarfiup nammineq aningaasaataanni ingerlaarnerit nassuiaataat, ilaatinneqassapput.
  • Umiarsuarni timmisartunilu akileraarutitigut nalikilliliinerni, piffissaq piginnittuuffiusoq tamaat paasissutissiissutigineqassasoq, ilanngunneqarpoq.
  • Nalunaarummi immikkoortoq nutaaq ilanngunneqarpoq, akiligassiinernut nalinginnaasumik piumasaqaatinik ilusiliussassatut piumasaqaatinik, ilaatinneqanngitsunik aammalu piumasaqaatit naammassineqanngippata akileraarutitigut sunniutaasussanik imaqartoq.
  • Akiligassiissummut nalinginnaasumik piumasaqaammi ilaatinneqarpoq, nioqqutissaq imaluunniit sullissineq tunniunneqarpat imaluunniit tamatuma kinguninngua akiligassiissut marluinngorlugu tunniunneqartassasoq.
  • Siunnersuut akiligassiissutit ataatsimoortut, akiliinermi ilanngussat aamma kreditnotat pillugit maleruagassanik imaqarpoq.
  • Siunnersuut ilusiliussassanut piumasaqaammik imaqarpoq, tassaniissallutik ulloq, ulloq tunniussiviusoq, tulleriinnilersukkanik normulersuineq, tunisisoq pisisorlu pillugit paasissutissat, annertussutsit suussutsillu kiisalu tunisinerup aningaasartai tamarmiusut.  
  • Siunnersuut ilaatitsiviunngitsunik arlalinnik imaqarpoq, taanna malillugu ilusiussassanut piumasaqaat, inuussutissarsiummi ileqqorineqartut aammalu pisiniarfiutillip atuisartunut inuinnarnut tuniniaanermini nalinginnaasumik ingerlatsinikkut periaaserisartagai eqqarsaatigalugit, saneqqunneqarsinnaalluni.
  • Siunnersuut 1.000 kr. inorlugu atuisartunut inuinnarnut tunisinermi, kasseapparatimik atuisoqartinnagu, immikkut ilaatitsiviunngitsumik imaqarpoq.
  • Akiligassiissummut piumasaqaatit tuniniaasumit inuussutissarsiummik ingerlataqartumit malinneqanngippata, aningaasartuummut pisisup ilanngaatiginnissinnaatitaaneranut tamanna pingaaruteqarsinnaasoq, siunnersuummi erseqqissarneqarpoq.
  • Suliffeqarfiit inuussutissarsiummik ingerlataqartut naatsorsuutini allattueriaatsiminni il.il. allanngortitsinissanut pisariaqartunut piffissaqartinniarlugit, ilanngaatiginnissinnaatitaaneq pillugu immikkut atuutilersitsinissamut aalajangersakkamik siunnersuut imaqarpoq.

Oqaaseqaatit Aningaasaqarnermut Naalakkersuisoqarfimmi tiguneqareersimassapput kingusinnerpaamik ulloq 11. december 2018.

Oqaaseqaatit uunga nassiuteqquneqarput: OED@nanoq.gl aamma pnil@nanoq.gl


Naalakkersuisoqarfik:

Aningaasaqarnermut Naalakkersuisoqarfik

Saqqummiunneqarfia:

09 novembari 00:00:00

Tusarniaanermi piffissaliussaq:

11 decembari 00:00:00

Tusarniaanermi akissutit uunga nassiuteqquneqarput:

oed@nanoq.gl