Uunga siunnersuut: Inatsisartut aalajangiiffigisassaattut siunnersuut, Namminersorlutik Oqartussat oqaaseqaatissat pillugu, Kalaallit Nunaanni sulitilluni ajoqusersinnaanermut isumannaarineq pillugu inatsisip allanngortinneqarnera pillugu

Siunertaasoq tassaavoq qularnaassallugu inuit sulisinnaanerminnik imaluunniit pilersuisuunerminnik annaasaqarnermikkut taarsiivigineqartut soraarninngornissami tungaanut taartisiassaminnik akilerneqartarnissaat.

Ullumikkut taartisiassanik akiliisoqartarpoq 65-inik ukioqalerneq tikillugu. Tamanna Sulitilluni ajoqusersinnaanermut Kalaallit Nunaannut inatsimmi allassimavoq.

Tamanna maannamut naapertuussimavoq 65-inik ukioqalernermiit utoqqalinersiuteqarsinnaanermut.

Kisiannili maanna ukiut utoqqalinersiuteqarsinnaalerfiusartut qaffanneqarsimapput ukiunut 66-inut, aammalu 2021-imiit ukiut utoqqalinersiuteqarfiusinnaasut qaffaqqinneqassallutik ukiunut 67-inut.

Tamanna isumaqarpoq inuit sulisinnaanerminnik annaasaqarsimasut imaluunniit pilersuisuunerminnik annaasaqarsimasut taartisiaminnik akilerneqartarnerminnik annaasaqarsinnaasut 65-inik ukioqalernerminniit, ilutigisaanillu suli utoqqalinersiutisiaqalersimanatik. Taamaalillutillu inuit taakkua ukiumi ataatsimi aningaasaqarnermikkut sillimmataarutissallutik, 65-inik ukioqalernerminniit 66-inik ukioqalernissaminnut. 2021-imiillu inuit pineqartut taartisiassaqaratillu utoqqalinersiutisiassaqassanngillat ukiuni marlunni, tassa 65-inik ukioqalernerminniit 67-inik ukioqalernissaminnut.

Inatsimmik allannguinikkut sulitilluni ajoqusersinnaanermut isumannaarineq pillugu Kalaallit Nunaanni inatsimmi oqaasertaliussat allanngortinneqassapput, taamaasillunilu taartisiassat utoqqalinersiuteqalernissap tungaanut akilerneqartalissallutik. Taamatut aaqqissuussinikkut qularnaarneqassaaq siunissami sulisinnaanermik imaluunniit pilersuisinnaanermik annaasaqarsimanermut taartisiassat akilerneqartarnissaat ukiut utoqqalinersiuteqalerfiusussat qaffanneqarpata apparneqarpataluunniit apeqqutaatinnagit.

Siunnersuummi illersorneqarput inuit siunissami sulisinnaanerminnik imaluunniit pilersuisuunerminnik annaasaqarsimasut taartisiassaminnik pissarsiassaqaannarnissaat.

Siunnersuullu aamma isumaqarpoq pingaaruteqarlunilu inunnut ullumikkut sulisinnaanermik pilersuisuunermilluunniit annaasaminnik tunngavilimmik taartisiassaqartinneqartartunut, 65-inillu ukioqalernermikkut annaasaqartussaagaluartunut,ilutigisaanillu ukiumik ataatsimik kingusinnerusumik 66-inik ukioqalernerminniit imaluunniit 2021-imiit 67-inik ukioqalernermiit utoqqalinersiutisiaqalertussanut.

Sammisaq:

Suliffeqarneq

Tusarniaanerup suunera:

Inatsisartut inatsisaat

Naalakkersuisoqarfik:

Inuussutissarsiornermut Nukissiuuteqarnermullu Naalakkersuisoqarfik

Saqqummiunneqarfia:

17 januari 09:42:00

Tusarniaanermi piffissaliussaq:

14 februari 12:00:00

Tusarniaanermi akissutit uunga nassiuteqquneqarput:

isiin@nanoq.gl