Sanaartugassami 'Qaqortumi mittarfiup sananeqarnissaa' pinngortitamut sunniutissanik naliliineq

Inatsisartut 2015-imi ukiakkut ataatsimiinnermi mittarfinnut aaqqiissutissat ataatsimoortut akueraat, tassanilu ilaatigut Qaqortumi mittarfiliornissaq ilaatinneqarpoq. Kalaallit Airports A/S Qaqortumi mittarfiliornermi sanatitsisuussaaq.

Suliassaq toqqaannartumik ASN-imut nassuiaasiortussaatitaaffiunngilaq, kisiannili mittarfik 1500 meterinik takissuseqartussaagami ASN-imut nassuiaammi ilanngussaq 2-p ataanut ilaatinneqarluni. Sanaartugassaq ASN-imut nassuiaasiortussaatitaaffiunersoq paasiniarlugu ASN-imut nassuiaammut ilanngussaq 2 misissorneqarpoq. Tamatumunnga atatillugu Qaqortumi mittarfiliornissaq ASN-imut nassuiaasiortussaatitaaffiunngitsutut naliliiffigineqarpoq. Mittarfiup sananeqarnissaanut Pinngortitamik illersuineq pillugu Inatsisartut inatsisaanni nr. 29-mi, 18. december 2003-meersumi § 42 naapertorlugu pinngortitamut sunniutissanik naliliisoqarnissaa pisariaqartinneqarpoq, taamatullu avatangiisit pillugit akuersissummik, imermik errortuutikumik kuutsitsinissamut akuersissummik aammalu imeqarfiup killeqarfiata iluani suliaqarnissamut immikkut ittumik akuersissummik qinnuteqartoqartussaalluni.

Pinngortitamut sunniutissanik naliliineq
Pinngortitamik illersuineq pillugu Inatsisartut inatsisaanni nr. 29-mi, 18. december 2003-meersumi § 41 naapertorlugu sanaartugassat annertunerusut aallartinneqannginnerini, imaluunniit atortut suliffeqarfiilluunniit inissiiffissani nunamik imermilluunniit tarajuleqarfinnik annertuumik allanngortitsisussanik, imaluunniit pinngortitamik annertuumik sunniuteqartussanik inissinneqannginnerini nassuiaammik – pinngortitamut sunniutissanik naliliinermi, nunamut/kangerlummut imartamullu aammalu pinngortitamut sunniutissat suunerinik allaaserisaqarfiusumik suliaqartoqartussaavoq.

Qaqortumi Mittarfiup ilusissaa
Mittarfiup Qaqortup illoqarfianiit 6 kilometerit missaannik ungasissusilimmi, Qaqqarsuup avannaata tungaani sananeqarnissaa eqqarsaatigineqarpoq, mittarfittaalu 1.500 meterinik takissuseqassaaq 30 meterinillu silissuseqassalluni. Mittarfik taama angitigisoq timmisartunit, ullumikkut Kalaallit Nunaanni atorneqartunit tamanit miffigineqarsinnaassaaq, taamatullu mittarfik timmisartunit, imarsuaq qulaallugu angallavinnut qanittunut, soorlu Islandimut angalasartunit atorneqarsinnaassalluni. Mittarfippiaap sananeqarnerani mittarfiup kingusinnerusukkut tallineqarsinnaanissaanut periarfissiisoqassaaq. Mittarfeqarfippiaq terminalimut illutaqassaaq, garageaqassaaq, biilinut unittarfeqassaaq immaqalu hangareqassalluni.

Mittarfiup kujammut kimmut tungaani ilamininngua maanna tatsimut imeqarfiup Tasersuup killeqarfiata iluaniittussaavoq, taamaattumillu suliami tatsip nunataata allannguiffiginissaa pisariaqartinneqarpoq, tamannalu peqqutigalugu imeqarfiup killeqarfiata iluani sulianut immikkut ittumik akuersissuteqartoqartussaalluni.

Innuttaasunik ataatsimiititsinissaq
Kalaallit Airports A/S Qaqortumi mittarfiliornissaq pillugu innuttaasunik ataatsimiititsissaaq. Kalaallit Airports A/S innuttaasut ataatsimiinnissaannut piffissaq sumiiffissarlu pillugit najukkami tusagassiorfiit aqqutigalugit nalunaaruteqarumaarpoq.

Tusarniaaneq
Pinngortitamik illersuineq pillugu Inatsisartut inatsisaanni nr. 29-mi, 18. december 2003-meersumi § 41 tassungalu oqaaseqaatit innersuussutigalugit sanaartugassami 'Qaqortumi mittarfiup sananeqarnissaa' pinngortitamut sunniutissanik naliliineq tamanut ammasumik tusarniaassutigineqarpoq.

Pinngortitamut sunniutissanik naliliineq taannalu pillugu attuumassutillit allat tamarmik Naalakkersuisut tusarniaanermut iserfissiaanni takuneqarsinnaapput.

Nalunaarusiat teknikkimut tunngasut allat, tusarniaanermi najoqqutassanut ilaatinneqanngitsut Kalaallit Airports A/S attaveqarfigalugu piniarneqarsinnaapput.

Tusarniaanermi killissarititaasoq: Pingasunngorneq 10. januar 2018, nal.: 16:00.
Tusarniaanermi akissuteqaat uunga nassiunneqassaaq:

Pinngortitamut Avatangiisinullu Naalakkersuisoqarfik,
postboks 1614
3900 Nuuk

Imaluunniit e-mail-ikkut:
pan@nanoq.gl.

Sammisaq:

Avatangiisit

Tusarniaanerup suunera:

Avatangiisinik nalilersuinerit

Naalakkersuisoqarfik:

Pinngortitamut Avatangiisinullu Naalakkersuisoqarfik

Saqqummiunneqarfia:

15 novembari 10:53:00

Tusarniaanermi piffissaliussaq:

10 januari 16:00:00

Tusarniaanermi akissutit uunga nassiuteqquneqarput:

pan@nanoq.gl