Pillugu: Tusarniaaneq, Inatsisartut inatsisissaattut siunnersuut Ilisimatusarfik pillugu, aamma Inatsisartut inatsisissaattut siunnersuut qaffasinnerusunik ilinniartitaanerit pillugit

Ilanngullugit nassiunneqarput tusarniaassutigineqartut, Inatsisartut inatsisissaattut siunnersuut Ilisimatusarfik pillugu, aamma Inatsisartut inatsisissaattut siunnersuut qaffasinnerusunik ilinniartitaanerit pillugit. Naatsorsuutigineqarpoq siunnersuutit saqqummiunneqassasut oqaluuserisassanngorlugit Inatsisartut 2018-imi upernaakkut ataatsimiinnissaannut. (UPA 2018).

Siunnersuutinik saqqummiussinermut tunuliaqutaavoq Inatsisartut Ilisimatusarfik pillugu inatsisaata malinnaatinneqarnissaa iluarsiivigineqarnissaalu, ilutigisaanillu qaffasinnerusunik ilinniagaqartarnernik aqutsineq Inatsisartut inatsisaanni ataatsimi katersorumallugit.  

 

Ilisimatusarfik pillugu Inatsisartut inatsisissaannut siunnersuut aalajangersaasuuvoq Ilisimatusarfimmik aqutsinermik, annertunerusutigullu maanna inatsimmi atuuttumi aalajangersakkanik ingerlatitseqqinnerulluni. Ilisimatusarfimmili aqutsineq pillugu aalajangersakkat siunissami taamaallaat imarissavaat Ilisimatusarfiup siunertaa, aqunneqarnera, aningaasaqarnera aamma allaffissornikkut ingerlatsinera.

 

Qaffasinnerusumik ilinniartitaanerit pillugit Inatsisartut inatsisissaannut siunnersuut ingerlatitseqqittuuvoq Inatsisartut Ilisimatusarfik pillugu inatsisaanni malittarisassanik atuuttunik, aqutsisuullunilu ilinniartitaanernik aamma taakkua imarisaannik. Siunnersuummilu ilanngullugit aqunneqarput atugassarititaasut ilinniakkanik neqerooruteqartarnerni, pitsaassusissanik aqutsineq, qinnuteqartarneq aamma ilinniagaqalersinnaanermi isernissamut piumasaqaatit, ilinnialersinnaasunik aqutsineq aamma tiguneqarsinnaasut amerlassuserisinnaasaat, Kalaallit Nunaata avataani ilinniarnermut atatillugu najugaqarallartarneq, ilinniartitsisut, ilitsersuisarneq kiisalu maalaaruteqarsinnaanermut aalajangersakkat. Siunnersuummi pineqartut ilaat maanna nalunaarutikkut aalajangersarneqartarput, allalli nutaajullutik.

 

Siunnersuummut tunuliaqutaasut pillugit paasissutissat ersarinnerusut pillugit siunnersuummut tunuliaqutaasut, taakkua siunertaat aamma imaat pillugit innersuunneqassapput siunnersuummut oqaaseqaatit.

 

Oqaaseqaataasinnaasut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmut tunniutereeqquneqarput kingusinnerpaamik ulloq 2. januar 2018. Oqaaseqaatit nassiuteqquneqarput Naalakkersuisoqarfiup pisortatigoortumik e-amil-ianut: ikiin@nanoq.gl, imaluunniit allakkanut nassiussivianut uunga:

 

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik, Postbox 1029, 3900 Nuuk.

 

 

 

Inussiarnersumik inuulluaqqusillunga

 

Helle Mellemgaard Sørensen

Jurist, IKIIN

Sammisaq:

Ilinniartitaanermut Ilisimatusarnermullu

Tusarniaanerup suunera:

Inatsisartut inatsisaat

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

27 novembari 15:27:00

Tusarniaanermi piffissaliussaq:

02 januari 00:00:00

Tusarniaanermi akissutit uunga nassiuteqquneqarput:

ikiin@nanoq.gl