Tusarniaaneq, uunga siunnersuut pillugu ”Inatsisartut inatsisissaattut siunnersuut Eqqissisimatitsisarneq aamma allatigut kulturikkut eriagisassanik kulturikkut kingornussatut illersuineq pillugu Inatsisartut inatsisaannik allanngortitsinikkut”

(nunami allanngutsaaliukkami illersuinermut aalajangersakkat sukannernerulersitat, illunik aserfallatsaaliineq iluarsaasarnerlu pillugit malittarisassani erseqqissaaneq aamma kulturikkut kingornussat sumiiffinni kulturikkut oqaluttuarisaanermut tunngasut inissisimaffigisaanni ingerlatat sunniutaasa nalilersorneqartarneri.)

Ilanngullugu tusarniaassutigalugu nassiunneqarpoq Inatsisartut inatsisissaattut siunnersuut Eqqissisimatitsisarneq aamma allatigut kulturikkut eriagisassanik kulturikkut kingornussatut illersuineq pillugu Inatsisartut inatsisaannik allanngortitsinikkut” Inatsisartut 2018-imi upernaakkut ataatsimiinneranni saqqummiunniarneqartoq (UPA 2018).

Allannguutissatut siunnersuutikkut ikkunneqarpoq aalajangersagaq, ingerlatat kulturikkut kingornussanut sumiiffimmiittunut eqqissisimatitaasunut, imaluunniit kulturikkut kingornussat illersugaanerannut aalajangersakkani ilaasut, allatigulluunniit illersorneqarnissaannik isumaliuteqarfiusut sunniutaasa nalilersorneqartarnerat pillugu aalajangersagaq.

Siunnersuullu aamma ilaqarpoq isumamineertumik eqqissisimatitsilersarnermik inussulianik aamma inussuliat pillugit oqaluttuanik, sumiiffinni nunatut allanngutsaaliukkatut aalajangersaaviusumiittut. Aamma ilanngussisoqarpoq aalajangersakkamik illukut qimatat tamarmik eqqissisimatitaasarnerannik, nunami allanngutaaliugaasutut aalajangersaaviusimasumiikkunik.

Taakkua saniatigut ilanngunneqarpoq aalajangersagaq, nunami allanngutsaaliugassatut aalajangiussaasumi aamma sumiiffinni immikkut killilerlugit aalajangiunneqarsimasuni, imaaliallaannaq peerneqarsinnaanngitsut eqqaanniittuni illersuinermut ungasissusissamik annertunerusumik pilersitsineq pillugu.

Kiisalu aamma siunnersuut imaqarpoq erseqqissaatinik illut eqqissisimatitassat aserfallatsaalineqartarneri pillugit.

Allannguutissatut siunnersuutaasut kingunerisaannik siunnersuutaapput pineqaatissiissuteqarsinnaanermut aalajangersakkani allannguutit iluarsiinerit.

Siunnersuutip tunuliaqutai, aamma siunnersuutip siunertaa imarisaalu pillugit siunnersuummut oqaaseqaatit innersuunneqassapput.

Siunnersuummut oqaaseqaataasinnaasut Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfimmut tunniunneqareersimassapput kingusinnerpaamik ulloq 22. december 2017.
Oqaaseqaatit Naalakkersuisoqarfiup pisortatigoortumik e-mail adressianut uunga nassiunneqassapput:
ikiin@nanoq.gl, imaluunniit Naalakkersuisoqarfiup pisortatigoortumik allakkanut adressianut uunga: Ilinniartitaanermut, Ilisimatusarnermut, Kultureqarnermut Ilageeqarnermullu Naalakkersuisoqarfik Postboks 1029, 3900 Nuuk.

Sammisaq:

Kulturi

Tusarniaanerup suunera:

Inatsisartut inatsisaat

Naalakkersuisoqarfik:

Ilinniartitaanermut, Kultureqarnermut Ilageeqarnermullu Naalakkersuisoqarfik

Saqqummiunneqarfia:

17 novembari 16:22:00

Tusarniaanermi piffissaliussaq:

22 decembari 23:30:00

Tusarniaanermi akissutit uunga nassiuteqquneqarput:

ikiin@nanoq.gl